Yunus 3

Yunus natlina-natailla ORGAHI-ORHA'A

1 Noma ORGAHI-ORHA'A Nhar lirni la re'eni wornu la'a Yunus. 2 Niwra: “Yunus pleta-plet pa mlia'awa la Niniwe, la letlawan de, pa mukot nohora ir la hya' maka A'ukot tiy o'a re.”

3 Noma Yunus natlin la ORGAHI-ORHA'A lirni pa nler pa nla'awa la Niniwe. Let de let sapon lawna id hade. Pede la'pa itiwra tawloh nana hota tala'a la lera wotelu memna. 4 La' ler tetema id ralamni de Yunus nala' pa nlola let de plahwani, na'nama nharlini pa nakot nohora Uplerlawna lirni niwra: “Tre' ma'ta lera terampwogat pa hota Niniwe namkoha-namnanni!” 5 Noma let de mniotni rpesiaya Uplerlawna nnio'oni de. Dewade leta mniotni honona retlia pa hota honona ratahan ya'ana, me kuku'uni-lalawanni rnairia rainia yaluli-yahona totpena rtutga de iriwra rhoitio'or doini-rtahnei dioin ir do'oni-halli.

6 La'pa ray Ninwe natlin tutga kot de dewade nerun la liwangenni. Noma no'lu doinia rain lawna lodna-hairi, na'nama nohga rain yaluli-yahona la inonni, me namtatna la awu li'ina wawannu. 7 Noma nala tita ida me nhopan pa riy rla rakot nohora riwra:

“Tit di de ray Ninwe nora mentrini re ed mak kalgota. De totpena rimormior rora nhiurni-wnia'anni honona la' let di de yan ra'ana-remnia hadomdoma. 8 Rimormiori rnairia naniayarni la inonni mak ktutga de rhoitio'or doin-rtahnei dioin oleka do'oni-halli, ne rweran targa nainiayarni mak emkade la nhiurni-wnia'anni wawannu wali. Riy honona hota rpolu-rwak rer lia' Uplerlawna. Honona re rhopliala hihi'ini-yapyapni yatyatni-halalli la'a ir rimormior wialli la'pa do'oni-halli honona re. 9 Twakwak de Uplerlawna pen neka Nhuria ralamni pa edonna Nwahla it do'oni-halli. Twakwak de Enherun doin hya' mak E Neti olek wa totpena yana tler la yatyatni-halalli yatlorni-yatra'ani!”

10 Uplerlawna Nlin reri-nmat reria hya' maka ha rhi'a re. E orgahani Namkeka de honona rolin doini oleka nhiolli-lietni mak khala re olekwa. Dewade E orgahani Nherun doinia hya' maka E Neti oleka wa, me edonna Nukmua re.

<- Yunus 2 Yunus 4 ->