इब्रानियों को नाम चिट्ठी

परिचय

यीशु पूरानो नियम को बहुत सो भविष्यवानियों ख पूरो कसो करय हय येख दिखावन वालो “इब्रानियों कि चिट्ठी” या एक धिरज देन वाली किताब आय। एक उपदेश सी येकी रचना करी गयी हय। पूरी भविष्यवानी अऊर मुख्य याजकों की जिम्मेदारियों ख यीशु मसीह न कसो पूरो करयो यो स्पष्टता सी दिखावन वालो ६० सी ज्यादा पूरानो नियम को सन्दर्भ या किताब म हय। योच वजह या किताब यहूदी मसीह लोगों को लायी प्रोत्साहन देन वाली मानी गयी। येको आगु याजकों न यज्ञ करन की जरूरत नहाय या व्यवस्था यीशु न कसो पूरो करयो यो या किताब म स्पष्ट करयो गयो हय। सब पापों को लायी एकच बार अऊर हमेशा हमेशा को यज्ञ असो यीशु भयो। या किताब सी हम्ख असो समझ म आवय हय कि, यीशु मसीह, हम्ख परमेश्वर पर विश्वास करन लायी तैयार करय हय १२:२ योच रीति सी यो युग को हम मसीही विश्वासियों लायी या किताब म बड़ो प्रोत्साहन हय। हम्ख ओको पर निर्भर रहनो चाहिये।

इब्रानियों की चिट्ठी कौन न लिखी यो हम्ख मालूम नहाय त भी कुछ विद्वानों को माननो हय कि, यो प्रेरित पौलुस, लूका, यां बरनबास इन परमेश्वर को सेवकों न लिख्यो होना। वसोच या किताब कब लिखी गयी यो भी हम्ख मालूम नहाय। त भी बहुत सो विद्वान असो मानय हय कि, यो मसीह को जनम को बाद ७० साल को पहिले लिखी गयी होना। यो वजह असो कि, जब यरूशलेम शहर ७० साल म नाश करयो गयो त भी या किताब म यरूशलेम को वर्नन यो तरह करयो गयो कि, जसो कि ऊ नाश करयो गयो नहीं होतो या किताब बहुत सो मण्डलियों म जाय क पड़्यो गयो होना। ऊ रोम शहर म लिख्यो गयो होतो। १३:२४

रूप-रेखा

१. लिखन वालो असो दिखावय हय कि, यीशु यो परमेश्वर को पूरो भविष्यवक्ता अऊर स्वर्गदूत इन सी भी महान हय। १:१–४:१३

२. येको बाद ऊ यो दिखावय हय कि जो याजक यरूशलेम को मन्दिर म सेवा करय हय उन सी भी यीशु महान हय। ४:१४–७:२८

३. मूसा ख दियो गयो आज्ञावों को द्वारा जो पुरानी व्यवस्था परमेश्वर न अपनो लोगों सी करयो ओको सी भी यीशु की सेवा महान हय। ८:१–१०:३१

४. यीशु हर बात म श्रेष्ठ हय यो स्पष्ट करन को बाद लेखक बहुत सो दिनचर्या को व्यवहारों को बारे म सुचना करय हय। १०:३२–१३:१७

५. आखरी म कुछ सीख अऊर शुभेच्छा दे क लेखक या चिट्ठी ख खतम करय हय। १३:१८-२५