1 परमेश्वर न मूसा सी कह्यो, “तय हारून, नादाब, अबीहू, अऊर इस्राएलियों को सत्तर बुजूर्गों को संग परमेश्वर को जवर ऊपर आय क दूर सी आराधना करजो। 2 केवल मूसा परमेश्वर को जवर आयेंन, पर हि जवर नहीं आये, अऊर दूसरो लोग तोरो संग ऊपर नहीं आये।”

3 मूसा न लोगों को जवर जाय क परमेश्वर की पूरी बात अऊर नियम सुना दियो। तब सब लोग एक आवाज म बोल्यो, “जितनो बात परमेश्वर न कह्यो हंय उन सब बात ख हम मानबों।” 4 [a]तब मूसा न परमेश्वर को सब वचन लिख दियो; अऊर बहुत सुबेरे उठ क पहाड़ी को खल्लो एक वेदी अऊर इस्राएल को बारा कुल को अनुसार बारा खम्बा भी बनायो। 5 तब ओन इस्राएली जवानों ख भेज्यो, जिन्न परमेश्वर लायी होमबलि अऊर [b]जनावर की मेलबलि चढ़ायी। 6 अऊर मूसा न अरधो खून ले क कटोरा म रख्यो, अऊर अरधो वेदी पर छिड़क दियो। 7 तब वाचा की किताब ख ले क लोगों ख पढ़ क सुनायो; ओख सुन क उन्न कह्यो, “जो कुछ परमेश्वर न कह्यो हय ऊ सब ख हम करबो, अऊर ओकी आज्ञा मानबो।” 8 [c]तब मूसा न खून ले क लोगों पर छिड़क्यो, अऊर उन सी कह्यो, “देखो, यो ऊ वाचा को खून आय, जेख परमेश्वर न इन सब वचनों पर तुम्हरो संग बान्धी हय।”

9 तब मूसा, हारून, नादाब, अबीहू अऊर इस्राएलियों को सत्तर बुजूर्ग लोग ऊपर पहाड़ी पर चढ़ गयो, 10 अऊर इस्राएल को परमेश्वर को दर्शन करयो; अऊर ओको पाय को खल्लो नीलमनि को चौरंग को जसो कुछ होतो, जो आसमान को समान साफ होतो। 11 अऊर ओन इस्राएलियों को मुखियावों पर हाथ नहीं बढ़ायो; तब उन्न परमेश्वर को दर्शन करयो, अऊर खायो पीयो।

12 [d]तब परमेश्वर न मूसा सी कह्यो, “पहाड़ी पर मोरो जवर चढ़ आव, अऊर वहां मोरी बाट देखजो; अऊर मय तोख गोटा की पट्टियां, अऊर अपनी लिखी हुयी व्यवस्था अऊर आज्ञा देऊं कि तय उन्ख सिखाजो।” 13 तब मूसा यहोशू नाम को अपनो सेवक को संग परमेश्वर की पहाड़ी पर चढ़ गयो। 14 अऊर बुजूर्गों सी यो कह्यो गयो, “जब तक हम तुम्हरो जवर फिर नहीं आबो तब तक तुम यहांच हमरी बाट देखत रहो; अऊर सुनो, हारून अऊर हूर तुम्हरो संग हंय; यदि कोयी को मुकद्दमा हय त उन्कोच जवर जाये।”

15 तब मूसा पहाड़ी पर चढ़ गयो, अऊर बादर न पहाड़ी ख छाय लियो। 16 तब परमेश्वर को तेज न सीनै पहाड़ी पर निवास करयो, अऊर ऊ बादर ओको पर छय दिन तक पहाड़ी पर छायो रह्यो; अऊर सातवों दिन ओन मूसा ख बादर को बीच म सी बुलायो। 17 इस्राएलियों की नजर म परमेश्वर को तेज पहाड़ी की सेंडी पर भस्म करनवाली आगी को समान दिखायी देत होतो। 18 [e]तब मूसा बादर को बीच जाय क पहाड़ी पर चढ़ गयो। अऊर पहाड़ी पर चालीस दिन अऊर चालीस रात रह्यो।

<- निर्गमन 23निर्गमन 25 ->