Nan Solat Santiago

Nan Makwani Maipoon isnan Solat Santiago

Nan solat ay nalpo ken Santiago ay pangolon nan mamati id Jerusalem id sangad-om et tokhon isnan am-in ay mamati ken Apo Dios ay naiwalas isnan lofong. Inpaammona ken chaicha nan osto ay ikkan nan takho mo kanancha en mamati cha. Angsan nan al-alig Santiago ay mangipaawat isnan tet-ewa ay laychena ay ibfakha tay laychena ay ostoosto nan okhalin nan mamati.

Ifab-aagna nan semek Apo Dios maipoon isnan kinafaknang, nan kinaposi, nan mangaw-awis isnan takho ta enfasol, nan faken khawis ay kankanancha, nan tet-ewa ay silib ya nan tapina kayet.

Nan napateg isna et masapol ay maila nan kinatet-ewan nan pammatin nan takho isnan okhalicha ta faken kecheng nan topekcha is mangmangwani.

Nan Linaona

Nan lapon nan solat 1:1

Nan tet-ewa ay pammati ya silib 1:2-8

Nan kinaposi ya kinafaknang 1:9-11

Nan mangawis ta fomasol nan takho 1:12-18

Masapol ay ad-i yangkhay chengngen nan takho nan kalin Apo Dios mod-i ket iyangnencha 1:19-27

Nan enngaakhan nan pip-iliyen nan ib-a 2:1-13

Maila nan kinatet-ewan nan pammatin nan takho isnan angnena 2:14-26

Mey-an nan mamati nan angnencha ay enkali 3:1-18

Masapol ay ad-i wanwanchen nan mamati nan ang-angnen nan ad-i mamati 4:1 - 5:6

Nan tap-in nan filin 5:7-20

1 Sak-en si Santiago, ay faan Apo Dios ya si Apo Jesu Cristo.

Pakomostaek chakayo am-in ay takhon Apo Dios[a] ay naiwalas isnan teketeken ay ili.

2 Iib-ak, mo omchan nan ngag issa ay likhat, ifilangyo ay siya nan khotok si chachama ay malaylaychanyo. 3 Ammoyo ay nan mateptepngan/mapadpachasan nan pammatiyo et pafal-ena nan anosyo ay en-ikatpe. 4 Ngem ilaenyo ta pafal-en ya pabfikasen nan sana ay anosyo nan khawis ay okhali engkhana ay maid makmakwaniyan paymo enkolanganyo.

5 Mo wad-ay ken chakayo nan enkolang isnan laing ay mangilasinan isnan khawis isnan ngaag,[b] komchaw ken Apo Dios is silib ya at maagtan siya. Tay si Apo Dios, al-allayad ay en-ichowa isnan am-in ay komchaw ken siya ya ad-ina yangyangan chaicha. 6 Ngem mo sino nan komchaw, masapol ay abfolotena ya ad-i enchwadchwa ay maalana'y maala nan kedchawena. Tay nan enchwadchwa, et maiyalig isnan talipyakew is kafayfay ay patolitoliyen nan chakhem. 7-8 Adi kad mo sino nan enchwadchwa isnan am-in ay ang-angnena, ad-ina kanan en wad-ay fongaena ken Apo Dios, tay ad-i kanonongnong.

9 Lebfengna'y ilal-ayad koma nan maid mabmabfalina ay ib-a nan nangipatongchowan Apo Dios ken siya isnan kasasaadna isnan namatiyana. 10 Siya akhes koma isnan nafaknang mo maibfafan-ig isnan mamatiyana. Tay khechangna'y mamaid nan fafaknang, kag isnan sabsafong nan ponchag. 11 Tay mo fomala nan akhew ya chad-ama'y atong, malango nan mola, mekchag nan safong et mapakawas nan khawis ay foyana. Siya akhes isnan nafaknang, at maamas isnan en-anaanapana isnan ifaknangna.

12 Naoney nan takho ay makaanos isnan likhat, tay mo ad-i enpaafak, at chawatena nan koronan si fiyag ay eng-engkhana ay inkalin Apo Dios isnan menlaylayad ken siya.

13 Mo wad-ay masailowan ken chakayo, ad-ina koma kanan en si Apo Dios nan nangawis ken siya. Tay ad-i mabfalin ay maawis si Apo Dios isnan ngaag ya maid akhes sailowana. 14 Tay olay sino et masailowan mo malalayan ya maawis isnan ngaag ay figfikhawena. 15 Sa et mo nenliton nan fikhaw, at iyanakna nan fasol. Et mo naengngan nan fasol, etey nan wad-ayena.

16 Tay siya chi chakayo ay kalal-ayad ay ib-ak, ad-i kayo masas-ailowan. 17 Tay am-in ay khawis ya maid kolangna ay mailayad ken chatako et malpo id tongcho ken Dios Ama. Siya nan nangaeb isnan am-in ay ensilaw id chaya, ngem olay mo enfaliw ya tomeken nan ilacha, ad-i enfaliw siya. 18 Isnan nemnemna kannay, nenfalinena chatako ay takhona maichalan isnan tet-ewa ay kalina, tatno chatako nan alig fin-i isnan am-in ay khinaebna.

19 Iib-ak ay laylaychek, sesemkenyo na: Masapol ay ensasakhana tako ay enchenge, ilonloney tako ay enkali, sa tako't ad-i nalaka ay somonget. 20 Tay ad-i pawad-ayen nan songet si takho nan kinalenteg Apo Dios. 21 Kaanenyo et mampay nan ngag issa ay kinalokhit ya nan inmawas ay kinangaag. Ibfafan-igyo nan semekyo ay manawat isnan kalina ay inmolana ken chakayo ya makaisalak ken chakayo.[c]

22 Iyangnenyo nan kanan Apo Dios ya ad-iyo aped yangkhay chengchengngen. Tay mo siya chi at loklokowenyo nan awakyo. 23 Nan aped manmannge isnan kalina ya ad-ina iyangnen, et kag isnan cha ensarming. 24 Ilaena nan kamesna sa et komaan ngem ke na't lichongan kannay mo ngag nan ilana. 25 Ngem mabindisyonan isnan ang-angnena nan takho ay mang-osiosig ya mamangset ay cha mangiyangnen isnan ad-i enkolang ya omipawaya ay lenteg Apo Dios. Siya nan mangafolot ya mangiyangnen isnan chinngena ya faken nan aped mannge yangkhay sa na't lichongan.

26 Mo wad-ay mangwani ay siya et en menchayachayaw, sa et ad-i makaipatke isnan chilana, et ongar yangkhay nan enchad-ayawana ya awakna kannay nan loklokowena.[d] 27 Nan nadchalos ay angnen ay enchayaw ay maid kasina kakwaniyan isnan sakhang Dios Ama et siya na: nan mamachang isnan nangoso ya nailekkasan isnan likhatcha, ya nan kaikasiwan isnan kinalokhit nan lofong.

Santiago 2 ->