1 Idwani, kinwanin Apo Dios ken Jacob, “Enligwat ka ta omey ka id Betel ya kanatee ka ischi. Tomoping ka is altar sid-i ay enchad-ayawam ken sak-en ay Dios ay nenpaila ken sik-a issan chey ay ilaylayawam si yon-am ay Esau.”
2 Sa et kinwanin Jacob isnan pangafongna ya isnan am-in ay takhona, “Kaanenyo nan teketeken ay chiosyo. Pakhawisenyo nan okhaliyo ya chalosanyo nan fachoyo. 3 Ta taynan tako isna ta omey tako id Betel, ay manoppingak isnan altar ay enchayawan tako ken Apo Dios ay finmachang isnan likhatko ya wawawawad-ay isnan am-in ay inay-ayak.” 4 Et siya chi ay inchowacha am-in ken Jacob nan cheycha'y teketeken ay ap-aped ay dioscha ay wad-ay ken chaicha, ya sa et nan singsing nan kowengcha. Et inkaob Jacob am-in chana is kapoon nan kaew ay kag alimmos ay maisasag-en id Sikem.
5 Isnan naligwatan cha Jacob ya nan an-akcha ay komaan, inpaegyat Apo Dios nan cheycha'y omili isnan maisasag-en ay ili, et eg-aycha inonod chaicha. 6 Inomchan cha Jacob ya nan am-in ay takhona id Luz ay siya nan makwani ay Betel idwani, id Canaan. 7 Tinmoping is altar sid-i sa na't nginadnan is, “Nan enchad-ayawan isnan Dios nan Betel,” tay ischi nan nenpail-an Apo Dios ken siya issan cha na ilayawan si yon-ana. 8 Isnan akhes kawadcha ischi ya ket ay natey nan in-ina ay kafachang Rebecca ay si Debora, ya inkaobcha siya is kapoon nan kaew is apet ambagatan id Betel. Et nginadnan Jacob akhes ischi is Kaew si Akha.
9 Idwani ay sinmakhong et si Jacob ay nalpo id Mesopotamia, nenpaila kasin si Apo Dios ay namindisyon ken siya. 10 Kinwanin Apo Dios,
“Milapo idwani faken et Jacob nan ngachanmo
mod-i ket Israel.”
Et siya chi ay nginadnan Apo Dios siya is Israel. 11 Kinwanin Apo Dios,
“Sak-en nan Dios ay Makabfalin Am-in.
Makhanakhanak ka,
et maiwaned ken sik-a nan takho isnan angsan ay ili,
et sik-a nan ikit si kaaliali.
12 At ichowak ken sik-a nan lota
ay inchowak ken cha Abraham ken Isaac,
ya ichowak akhes isnan cheycha'y wanen-edmo.”
13 Sa et tinmongcho si Apo Dios ay nanaynan ken Jacob isnan chey ay nanot-oyyana ken siya. 14 Adi kad ischi kannay ay chadlos nanot-oyyan Apo Dios ken siya nan nangtoochana isnan fato ay panemsemkan, sa na't finokfokan si fayas ya lana ay nangichoo ken Apo Dios. 15 Siya chi et nginadnana is Betel*Nan ayen nan ngachan ay Benoni isnan kalin si Hebreo et, anakko is likhat. nan chey ay nanot-oyyan Apo Dios ken siya.
Nan Nateyan Raquel ya Naiyanakan Benjamin
16 Awni ya ket tinaynan cha Jacob ay sinpangafong id Betel ta enpaEfrata cha. Sisya'y adchawi cha ischi, ya ket inomchan nan timpo ay omanakan Raquel et chachama nan nensikhafana isnan cha na enpasikalan. 17 Isnan chadlos ensakitan nan cha na enpaspasikalan, kinwanin et nan enpaan-anak ken siya, “Ad-i ka omegyat Raquel tay nay lalaki kayet na!” 18 Ngem matmatey et si Raquel. Isnan matmateyana nginadnana nan anakna is Benoni.†Nan ayen nan ngachan ay Benjamin isnan kalin si Hebreo et, naoney ay anak. Ngem ket ay nginadnan amana nan onga is Benjamin.‡Nan sipingcha et silver ay nabfalor ay kag fallitok. Ilaenyo nan Genesis 45:22.
19 Issan nateyan Raquel, naikaob siya isnan ilit nan karsa ay omey id Efrata, ay makwanin Betlehem idwanin. 20 Tinmood si Jacob is fato ay manemsemkan ischi, et sisya'y wad-ay ischi ay maton nan pantiyong Raquel engkhana idwani ay akhew. 21 Intoloy Israel ay nenfaat sa et nenkampo isnan chemang nan at-atakchag ay toping ay enfeb-elewan Eder.
Nan An-ak Jacob ay Lallalaki
(1 Cronicas 2:1-2)
22 Isnan nenkakampowan cha Israel ischi, ket ay inseyep Ruben si Bilha ay esa isnan asawan Israel ay amana. Isnan nanngelan amana ischi, chachama nan songetna.
Sinpoo ya chwa nan an-ak Jacob ay lallalaki. 23 Nan an-akna ken Lea, et si Ruben (ay yon-a isnan an-ak Jacob), sa et cha Simeon, Levi, Juda, Issacar ya si Zabulon. 24 Nan an-akna ken Raquel et cha Jose ken Benjamin. 25 Nan an-akna ken Bilha ay faan Raquel et cha Dan ken Neftali. 26 Ya nan an-akna ken Zilpa ay faan Lea et cha Gad ken Aser. Naiyanak chana id Mesopotamia.
Nan Nateyan Isaac
27 Awni ya ket sinmaa si Jacob ken amana ay enkakampo id Mamre ay sag-en nan Hebron, ay sikhod ay nenkakampowan san si ikitna ay Abraham ya si amana ay Isaac. 28 Natakhotakho si Isaac et nentawen is sinkhasot ya walon poo, 29 et natey ay chadlos nalakalakay. Inkaob nan an-akna ay cha Jacob ken Esau.
<- Genesis 34Genesis 36 ->
aNan ayen nan ngachan ay Benoni isnan kalin si Hebreo et, anakko is likhat.
bNan ayen nan ngachan ay Benjamin isnan kalin si Hebreo et, naoney ay anak.
cNan sipingcha et silver ay nabfalor ay kag fallitok. Ilaenyo nan Genesis 45:22.
