Nan Maikadwa ay Solat Pedro
Nan Makwani Maipoon isnan Maikadwa ay Solat Pedro
Nan maikadwa ay solat Pedro et insolatna isnan enkhawisan nan angsan ay mamati. Nan napateg ay ibfakhan nan solatna et ta ad-icha maaw-awis isnan ad-i osto ay kankanan nan faken tet-ewa ay mimistolo, tay chadlos fomasol nan mamatpati ken chaicha. Ibfakhana ay masapol ay itot-oloycha ay mamati isnan tet-ewa ay maisos-olo maipoon ken Jesus ay chinchinngecha ay nalpo isnan takho ay tet-ewa ay nangila ken siya. Tay mo siya chi nan ikkancha et ad-icha nalaka ay maawis isnan faken tet-ewa.
Nan esa'y ifab-aagna et nan songfat nan isos-olon nan mangmangwanin ad-i omali kasin si Cristo. Kanana en nan omannongan nan omaliyan kasin Cristo et khapo tay ad-i laychen Apo Dios ay machosa nan olay sino ay takho mod-i ket laychena ay am-in ay takho et ibfafawicha nan fasolcha koma ta maitapi cha ken siya. Siya chana nan khotok nan ad-i somakhongan Cristo kannay mod-i ket omannong tay sadsad-ena nan enfabfawiyan nan takho.
Nan Linaona
Nan lapon nan solat 1:1-2
Nan laychen Apo Dios ay ik-ikkan nan mamati 1:3-21
Nan faken osto ay maisos-olo 2:1-22
Nan kasin omaliyan Cristo 3:1-18

1 Sak-en si Simon Pedro, ay faa ya apostol Jesu Cristo.

Isolatko na isnan am-in ay mamati ay naagtan isnan napateg ay pammati ay is-ison nan kapateg nan pammatimi, tay maid pawadwad-en nan nalenteg ay Dios tako ay si Jesu Cristo ay omisas-alak, ay nangilayad isnan pammati tako.

2 Asop ya omad-ad-acha kayet nan fachang ya talna ay malpo ken Apo Dios isnan cha yo mangammowan ken siya ya ken Jesus ay Apo tako.

Inayakhan Apo Dios chatako ta Wanchen tako Siya

3 Maigkhapo isnan kamabfalina, inigwana nan am-in ay kasapolan tako, ta ipaila tako nan okhalina isnan fiyag tako, maichalan isnan cha tako mangammowan ken siya, ay nangayag ken chatako ta maitapi tako isnan katangtangachana ya nan kinagkhawisna. 4 Siya sa nan inikkana ay nangichawchaw ken chatako isnan kaammechan ya chadlos napateg ay ilayadna ay inkalina, ta maichalan isnan naycha ay ichawchawna, et maikasiw kayo isnan pomakawas ay figfikhawen si awak isnan kalotaan, ya ta maitapi kayo isnan kinadchios Apo Dios. 5 Idwani tay siya chi, ippeyyo et nan kafaelanyo ay mangiyangnen isnan khawis ay okhali ay mangitapi isnan pammatiyo.

Sa yo't chad-oman nan apchas yo ammo ta maitapi isnan khawis ay okhali.

6 Sa yo't itapi nan katpe isnan ammoyo.

Sa yo't itapi nan anos isnan katpeyo.

Sa yo't akhes itapi nan nadchiosan ay okhali isnan anosyo.

7 Sa yo't itapi nan mangakhawisanyo isnan ib-ayo ay mamati isnan nadchiosan ay okhaliyo.

Sa et isnan anongosna, itapiyo nan layad isnan olay sino isnan mangakhawisanyo isnan ib-ayo.

8 Et mo wad-ay am-in chana ay okhali ken chakayo, ya cha cha kayet amed fomikas ken chakayo, et pawad-ayencha nan kakhetyo ta kad-in enfonga kayo is khawis, isnan cha yo mangammowan ay osto ken Jesu Cristo ay Apo tako. 9 Ngem mo sa ya wad-ay ken chakayo nan ad-i mangiyokhali isnacha, et ad-ina ilaen ay osto nan kinatet-ewa. Kag nakolap siya ya ad-i makaila ay khawis, ya nalichongana ay nachalosan nan sikhod ay fasolna.

10 Tay siya chi ay iib-ak, am-amed yo kayet esten nan angnenyo, ta ipailayo ay tet-ewa ay inayakhan ya pinilin Apo Dios chakayo. Tay mo eestenyo chasa ay okhali, et ad-i kayo kayagyagyag. 11 Ya sa et chachama nan layadna ay mangichowa isnan kalebfenganyo ay somkhep ay maitapi isnan maid pengpengna ay en-ap-apowan nan omisalak ken chatako ay si Jesu Cristo ay Apo tako.

12 Siya nan khotokna ay kad-in ipasmekko am-in chachi ken chakayo, olay mo ammoyo et chachi, ya olay mo nailamot kayo et isnan kinatet-ewa ay sinoloyo. 13 Et siya chi nan omno ay angnek ay mangipafikas ya mangipasmek ken chakayo isnan sisya'y matatakhowak, 14 tay ammok ay sin-ak-itan yangkhay ya at matey ak,[a] ay kag isnan inischon Jesu Cristo ay Apo tako. 15 Siya na nan khotokna is mamangsetak idwani ay manginongnong isnacha, ta mo komaan ak, et kad-in sesemkenyo nan naycha ay sos-olo.

Chakami nan Tistikho isnan Katangtangachan Cristo

16 Egaymi aped inala nan sinasangad-om ay khinag-aeb ay og-okhod si mamasilib issan nangipaammowanmi ken chakayo maipoon isnan kamabfalin ya omaliyan nan Apo tako ay si Jesu Cristo. Tay chakami, et chadlos mi iniila nan chachama ay katangtangachana. 17 Wad-ay kami ay chadlos nanannge ya namoya isnan kachad-ayawana ya katangtangachana ken Dios Ama, ay Katotongchowan ya Matangtangad ay Dios ay nangwanin, “Siya na nan chadlos laylaychek ay Anak. Malaylaychan ak ken siya!” 18 Wad-ay kami ay nannge isnan chey ay kali ay nalpo id chaya, issan naifowekhanmi ken siya isnan chey nasantowan ay filig.[b]

19 Siya chasa nan nangipatet-ewa isnan inpadton nan mamadto id sangad-om, ya idwani am-amed kami entatalek ischi. Isonga chengngenyo koma chasa tay kag silaw ay manangkhew isnan kag enfollinget ay lofong engkhana isnan pomawayana, ay siya nan akhew ay omaliyan Cristo ay makwanin tokwifi isnan wiit ay manangkhew isnan semekyo.[c] 20 Ngem nan chadlos wadwad-ay ay maawatanyo, et maid makaipafala isnan semekna kannay maipoon isnan ayen nan naipadto isnan naisolat ay kalin Apo Dios. 21 Tay maid naipadto ay nalpo isnan aped semek si takho, mod-i ket nalpo ken Apo Dios nan inpadtocha maichalan isnan Ispirito Santo ay nangichalan ken chaicha.

2 Pedro 2 ->