Nan Maikadwa ay Solat Juan
Nan Makwani Maipoon isnan Maikadwa ay Solat Juan
Nan maikadwa ay solat Juan et insolatna isnan laylaychena ay in-ina ya nan an-akna. Away nan laychena ay kanan et nan esa'y machagchakhopancha ya nan mamati. Nan kapatekhan ay ifab-aagna isnan solatna et enlilinnayad cha koma ya ad-icha koma ab-abfoloten nan isos-olon nan ad-i osto'y en-isos-olo.
Nan Linaona
Nan lapon nan solat 1-3
Nan pateg nan layad 4-6
Tokhon maipoon isnan ad-i tet-ewa ay sos-olo 7-11
Nan anongos nan solat 12-13

1 Sak-en si Juan ay esang ay mangichad-alan isnan mamati,*Nan osto ay naisolat isnan Griego isna et, “Sak-en nan esang ay am-ama” ya isolatko na ken sik-a ina ay pinilin Apo Dios ya isnan an-akmo. Tet-ewa nan layadko ken chakayo ay sin-ina, ya faken yangkhay sak-en, mod-i ket olay akhes nan am-in ay mamati isnan tet-ewa ay sos-olo. 2 Siya na nan angnenmi khapo isnan kinatet-ewa ay wad-ay ken chatako ya entetee ken chatako is eng-engkhana. 3 Wad-ay ay wad-ay ken chatako nan fachang, seg-ang ya talna ay malpo ken Dios Ama ya ken Jesu Cristo ay Anakna. Maigkhisan chana isnan kinatet-ewa ya nan layad isnan fiyag tako.

Nan Sikhod ay Filin isnan Mamati

4 Chachama'y malaylaychan ak isnan nangammowak ay wad-ay cha nan an-akmo ay mangab-afolot isnan kinatet-ewa, ay kag nan infilin Dios Ama ken chatako. 5 Idwani, kedchawek ken sik-a ina, ta enlilinnayad tako. Faken falo ay filin nan nay ay isolatko ken sik-a, tay siya na san sikhod ay filin ay chinnge tako mailapo issan namatiyan tako. 6 Siya na nan kail-an nan layad: nan mangiyangnenan tako isnan infilina. Ya siya na nan filin ay chinngeyo mailapo issan namatiyanyo: Masapol ay layad nan mangichalan isnan fiyagyo.

7 Angsan cha nan finmala ay ensas-ailo ay enfaabfaat isnan lofong. Ad-icha figfikhen ay si Jesus nan Cristo ay nenfalin ay takho. Chaicha nan ensas-ailo ya mangapos ken Cristo. 8 Ilaenyo ta ad-i kayo masaew isnan chinnomi ken chakayo,†Nan teken ay kaifalikkasan nan nay et, “Ilaenyo ta ad-i kayo masaew isnan chinnoyo.” mod-i ket ta alaenyo nan am-in ay at ichowana ken chakayo.

Nan Tokhon Maipoon isnan Eng-engag ay Mistolo

9 Olay sino ay manos-olok isnan sos-olon Cristo, ay ad-i mangeegnan ay osto isnan sos-olona, maid ornosna ken Apo Dios. Ngem nan mangeegnan isnan tet-ewa ay sos-olo, maiyoornos ken Dios Ama ya isnan Anakna. 10 Adi kad mo wad-ay mangiyali isnan teken ay sos-olo ken chakayo, ad-iyo paspaskhepen isnan afongyo ya ad-iyo khakhawisen chaicha. 11 Tay mo sino nan mangagkhawis isnan kag todicha, at maitapi cha isnan enngaakhancha.

Nan Anongos nan Ikadwa ay Solat Juan

12 Olay mo angsan nan laychek ay isolat ken chakayo, ngem ad-ik laychen ay papil ya lapis nan angnek ay makikali ken chakayo, mod-i ket asop ya makaeey ak sisa ta masasaskhang tako ay matotya, ta maanay nan lagsak tako.

13 Pakpakomostaan nan an-ak nan akhim ay fafai ay pinilin Apo Dios sik-a.