Nan Omona ay Solat Pablo isnan iTesalonica
Nan Makwani Maipoon isnan Inmona ay Solat Pablo isnan iTesalonica
Tesalonica nan kapital nan Macedonia ay esa'y probinsiyan nan Roma. Wad-ay cha nan mamati ischi khapo isnan nen-isolowan Pablo isnan kinmaanana id Filipos. Ngem awni ya ket wad-ay cha nan Judio ay omapal khapo isnan inmabfolotan nan faken Judio isnan insos-olon Pablo ken chaicha maipoon ken Jesu Cristo. Sa cha't inaposan, isonga napilit ay kinmaan id Tesalonica. Isnan inomchanana id Corinto ke na't chengngen ken Timoteo ay ib-ana ay men-isos-olo nan mapap-alikhatan nan mamati id Tesalonica.
Isonga insolat Pablo nan naay omona ay solatna isnan iTesalonica tatno pabfikasena ya liwliwaena nan mamati ischi. Nenyaman siya khapo isnan chinngena ay khawis ya ab-afikas nan pammaticha ya layadcha. Inpasmekna nan kasasaad nan fiyagna issan nakitey-ana ken chaicha sa na't infakha nan songfat nan sinas-alodsodcha maipoon isnan kasin omaliyan Jesu Cristo. Tay sinalodsodcha mo mabfalin ay maitapi isnan fiyag ay maid pengpengna nan mamati ay apchas natey isnan omaliyan Cristo. Sinalodsodcha akhes mo kaatna nan kasin omaliyana. Mabfalin ay mafasa nan songfat nan salodsod ay naay isnan ikap-at ya ikalma ay kapitolo.
Nan Linaona
Nan lapon nan solat 1:1
Nan manayawan Pablo ken Apo Dios khapo isnan iTesalonica 1:2 - 3:13
Tokhon maipoon isnan okhalin nan mamati 4:1-12
Fagfakha maipoon isnan kasin omaliyan Cristo 4:13 - 5:11
Nan anongos nan solat 5:12-28

1 Chakami na ay Pablo, Silas, ya Timoteo, ya siya na nan solatmi ken chakayo ay mamati issa id Tesalonica ay naiyornos ken Dios Ama ya si Apo Jesu Cristo. Asop ya wad-ay ken chakayo nan fachang ya talna ay malpo ken chaicha.

Nan Nenyamanan cha Pablo isnan Khawis ay Okhali ya Pammatin nan iTesalonica

2 Kad-in enyaman kami ken Apo Dios maipoon ken chakayo am-in isnan enlol-owalowanmi. 3 Tay isnan enlowalowanmi ken Dios Ama tako sesemkenmi nan cha yo iyangnen khapo isnan pammati, nan kakhetyo ya nan anosyo khapo isnan namnamayo ken Jesu Cristo ay Apo tako. 4 Iib-ami ay laylaychen Apo Dios, ammomi ay pinilin Apo Dios chakayo. 5 Tay issan nangiyaliyanmi isnan Khawis ay Chamag ken chakayo, et faken kali yangkhay mod-i ket wad-ay akhes kamabfalina ay nalpo isnan Ispirito Santo ay nanet-ewa isnan kalimi.

Ammoyo akhes mo ngag nan okhalimi issan nakitetey-anmi ken chakayo tay nan enkhawisanyo nan pangkhepmi. 6 Sa yo't inpey nan kafaelanyo ay menwanwaned isnan okhalimi ya si Apo Jesus. Et nay olay mo chad-ama ay naipap-alikhat kayo, chinawatyo kayet nan kalin Apo Dios ay nangilal-ayad isnan layad ay malpo isnan Ispirito Santo. 7 Tay siya chi chakayo nan mabfalin ay wanchen nan am-in ay mamati isnan Probinsiya ay Macedonia ya Acaya. 8 Tay chakayo nan nailapowan nan naipadchamakhan nan kalin Apo Jesus id Macedonia ya Acaya.* Ngem faken yangkhay chi, mod-i ket nadnadnge kayet nan okhod maipoon isnan pammatiyo ken Apo Dios isnan olay entona et nay maid kasin mi kanan. 9 Tay chaicha kannay nan nangokhod isnan inangnenyo ay nanawat ken chakami, ya nan nanokokhanyo isnan khinag-aeb ay diosyo, ta ensilfi kayo isnan matatakho ya tet-ewa ay Dios. 10 Inog-okhodcha akhes nan manadsad-anyo isnan omaliyan nan Anakna ay malpo id chaya. Siya si Jesus ay finangona isnan etey, ya nan mangisalak ken chatako isnan songet Apo Dios ay at omchan.

Nan Naila ay Okhalin cha Pablo id Tesalonica

a Nan teken ay ngachan nan Probinsiya ay Acaya et Grecia.