A Pas ane Pol tetek
e Taitus
A warwara talapor nigo
A pas ne e Pol i tumusi tetek e Taitus. E Taitus bel a te Juda. I longor a warawai ane Pol pa i lingir a nuknukna pa i tortorot oe Iesu Karisito. E Taitus i han taum oe Pol usaot e Jerusalem ning a aposella rop la kes taum (oroi Aposel 15:2). E Pol i sune sen e Taitus utumo e Korin naur a taim (oroi 2 Kor 7:6-7 pa e 8:17). Lamur e Pol i aslang pas e Taitus sur ir tena tai alar ana lotu tumo na lolo Krit (oroi e Taitus 1:5).
Te na pas ne, e Pol i atai e Taitus ana si na ngas a tarai dir aslang pas la, sur la na tena titol ana lotu. Pa i atai i mang ir tai alar a lotu kusun a asasongo na tena asaerla, pa ir asaer wakak a tarai a lotu ana wakak a toltol.
A tinan ana Buk Taitus:
A kamkama buk ne (1:1-4)
A ningnigola ana lotu (1:5-16)
A asaer tetek a tarai a lotu (2:1-15)
A wakak a toltol ning dalar muri (3:1-11)
A ararop a warwara ane Pol tetek e Taitus (3:12-15)

1 Iau e Pol a tena titol oros ane God pa aposel ane Iesu Karisito, sur ar nangan a tortorot ana tarai ane God ning ka aslang tar la, par asaer la sur lar tasman a momolna. A momolna ning ir ben la sur lar mur a toltol ning e God i mang suri. 2 [a]A tortorot ning, pa momolna ning, i hanot miting na keskes harnanai ana tortorot sur a lalaun tikin. A lalaun tikin ning e God i lele tar onoi, ning belot i akes a rakrakan hanua. Pa e God bel i sira asongo. 3 Ning a pukakiar i sot i apuasa anuna lele ning mila warawai onoi. E God anundala a Tena Alaun ning i saran tar a titol na warawai tak arlar ot ana nuna arsune.

4 [b]A tumtumus tetek u Taitus, a natuklik, anasa takai ka a tortorot anundala. A marmaris pa balmolmol ta e God, a Tamandala, pa e Karisito Iesu anundala a Tena Alaun, ir kes hom.

A ningnigola ana lotu

5 A han kusun u tumo na lolo Krit, sur u ma ur arop a titolla ning belot i rop, pa ur aslang pas al ningnigo ana lotu ting na hananuala rop arlar ot larning ia ka atong tari tam. 6 [c]Ur aslang pas tik ning bel dir tiu tari ona ta rongo, ning i taulai ka takai a hane pa na natnatna la na tena tortorot, pa bel ta artitiu i kibas la ana ta toltol, pa bel la tabun longor tetek tik. 7 A ningnigo ana lotu, i ot a tena tai alar ana titol ane God, pa i wakak ning i a ngas a barsan larne: bel dir tiu tari ona ta rongo, gong i aitna pasi, gong i sira balakut kapit, gong i a tena gang, gong i a tena harum, pa gong i mang sur al galis a mani. 8 Ir sira gas pas a tarai ting na nuna rumai, pa ir mang sur a wakak a toltol, ir warkurai tostos anuna lalaun, ir tena tostos, ir totoh na matana e God, pa ir tai alar a nuknukna. 9 Ir tong akes a momol a asaer ning di ka asaer tari ono, sur ir wunan otleng a tarai ana tostos a asaer, pa ir atong puasa a rongo anunla ning la sairas a asaer ning.

A warwara na arnangai tetek e Taitus ana nuna titol

10 [d]Ur aslang pas a ngas a ningnigola ne, anasa a galis a tarai na tabun longor. La awara a tarai ana ututnala oros ka pa la asongo pas la. Dingla na tarai onla, la ning la atongi mang, dir kot talilis a palaona tarai ning bel a tarai Juda. 11 [e]Ur sairas anunla na warwara, anasa la sira alaulau a tortorot anuna galis a kabaitamana ana asaer ning bel i wakak sur dir asaer la ono. La sira asaer la, sur lar asongo pas ka a mani tanla. 12 Ning a propet miting ot na tarai Krit i atongi larne, “A tarai Krit, na tena asasongo momol, la arlar ana laulau a rokoio, la na ngoro na tarai, la tagun a hangan ka.” 13 [f]A warwara ne i momol kol. Ur warwara rakrakai tetek la ana nunla na rongo sur lar tong akes a tostos a tortorot. 14 [g]Pa gong ma la mur a asaer oros anuna tarai Juda, pa warkurai anuna tarai ning la gilam ris kusun a momolna. 15 A ututnala rop la totoh tetek la ning la totoh, ika tetek la ning bel la totoh pa bel la tortorot, a ututnala rop bel la totoh. A nuknukinla i laulau kol pa bel ta tostos ting na nuknukinla. 16 [h]La atongi mang la tasman e God, ika anunla a titolla ot i apuasa i mang bel la tasmani. La na laulau a tarai kol, a tabun longorla, pa bel la tolsot pas ta wakak a titol.

Taitus 2 ->