4
A lotu saot na langit
1 Lamur a tai, a oroi pas a taman i sapang saot na langit. Pa elngena esaning a longor nigon tari, ning i warwara tetek iau arlar ana tawuru, i atongi mang, “Han kas ute, ar asangan tar u ana sa ning ir hanot lamur.” 2 Ono otning a bukus ana Talngan Tabu. Pa salanigo tak, a oroi a keskes na king saot na langit, pa takai i kes tar ono. 3 Pa esaning i kes tar ana keskes na king, i talapor arlar ana naur a hat ning a matandiau i abit, ning di atong diau mang jaspa pa karnelian. Pa pakasir i tur talilis pas a keskes a king, i tatatai arlar ana wakak a hat ning di atongi a emeral. 4 Pa naur a bonot pa diat a keskes na king la tur talilis a keskes na king ning, pa naur a bonot pa diat a ningnigo kaning la kes tar tingia. La mermer ana kokok a kaenla, pa ting na pukulunla la suah na kukuh a king ning di toli ana gol. 5 A pil, a pupugur pa unga, ditol hanot miting na keskes na king. Pa salanigo na keskes a king, mais a lam kaning la irnga. La ning a mais a ingun e God. 6 Ting otleng napir a keskes a king, ning a utna i tatatai arlar ana puka tasi ning di toli ana galas, pa i talapor kol.
Ting na arpotor, diat a lalaun a utna la tur talilis a keskes a king, a kalso matanla i bonot arop a palaonla, salanigo pa tumo lamur. 7 A ningnigo na lalaun a akakes i arlar ana laion, a munaurna i arlar ana bulumakau, a munatolna a patarna i arlar ana barsan, pa mundiatna i arlar ana manigulai ning i rowoi. 8 Diat a lalaun a akakes ne, taktakai onla, diono na dehelna, pa a kalso matanla i bonot arop a palaonla, pa ting nahai na dehelinla otleng. Ana morom pa kamis, bel la manah ana atong a warwara mang,
“I totoh, i totoh, i totoh,
A Leklek e God, esaning i rakrakai kol,
esaning i laun nigo, i laun onone pa ir hanot lamur.”
9 Esaning i kes ana keskes a king, ning i laun tikin bel ir rop pa bel ir rop, diat a lalaun na akakes ne la aitna pasi, la hanrawai pa la atong wakak teteki. A tuka kamis rop ning la toli larne, 10 naur a bonot pa diat a ningnigo otleng la punga hanrawai namatana esaning i kes ana keskes a king, pa i laun tikin bel ir rop pa bel ir rop, pa la lotu teteki. La suah tar anunla na kukuh a king salanigo na keskes a king pa la atongi mang,
11 “Anumila a Leklek pa anumila a God,
i tostos kol sur dir aitna pas u pa dir hanrawai u,
pa i tostos kol ning ur tong akes a rakrakai,
anasa u, u akes a ututnala rop.
U akes la ana nuknukim ot,