Link to home pageLanguagesLink to all Bible versions on this site
19
Di atong aitna pas e God saot na langit
1 [a]Ning ka rop a ututnala ne, a longor a tnan agaia lar a elngen a tnan kunum a taraila saot na langit, la kukuk mang,
“Haleluia!
E God anundalai, ka alaun pas dala, a matatar pa rakrakai anunai ka,
2 anasa anuna warkuraila i momol pa i tostos.
Ka saran tar a warkurai a arkeles tetek a pamuk a hane, ning a risana i han sarara ana nuna toltol laulau,
esaning i alaulau a rakrakan hanua ana nuna pamuk a toltolla.
E God ka saran tar a warkurai a arkeles teteki,
anasa ana suluk anuna tena titol orosla,
ning i umkol la.”

3 Pa la kukuk ulak mang,

“Haleluia!
Pa sasawan a hane ning i han kas usaot bel ir rarop.”

4 Naur a bonot pa pisir diat a ningnigo pa diat a lalaun a akakes la punga hanrawai, pa la lotu tetek e God, esaning i kes ana nuna keskes a king pa la atongi mang,

“Amen, Haleluia!”

5 Pa elngen takai i hanot miting na keskes a king, i atongi mang,

“Mulor atong aitna pas anundala a God,
mulo anuna tena titol orosla,
mulo ning bel al risamulo pa mulo ning mulo leklek,
mulo ning mulo hanrawai i!”

6 [b]Pa a longor a agaia lar a elngen a tnan kunum a tarai, lar otleng a unga na malum ning i naro, pa rakrakai a pungpugur, i kukuk mang,

“Haleluia!
Anasa anundala a Leklek e God,
ning i rakrakai kol,
i kes na king.
7 [c]Dalar gas,
pa dalar rakan aleklek pasi!
Anasa a pukakiar a tinaulai anuna Nat a Sipsip ka hanot,
pa nuna hane ka sang.
8 Di ka saran tar na wakak a kaen, ning i talapor pa i totoh tetek a hane,
suir mermer ono.”
Na wakak a kaen ning, i tur aslang na tostos a toltol ana tarai ane God.

9 [d]Pa angelo i atai iau mang, “Ur tumusi larne: La ning di atai tar la sur a ngasa na tinaulai ana Nat a Sipsip, la angis!” Pa i atongi otleng mang, “Na warwara ne na momol a warwara ot ane God.”

10 [e]Lamur a punga hanrawai milau naur a hana suar lotu teteki. Ika i atai iau mang, “Gong! Iau otleng a tena titol oros ka lar u pa na tastasim ning la tong akes a warwara talapor oe Iesu. Ur lotu tetek e God! Anasa a warwara talapor oe Iesu, i ot i anuknuk a tarai sur lar warwara na propet.”

Esaning i kes saot na kokok a hos
11 [f]A oroi a langit ka sapang pa a oroi a kokok a hos i tur salanigo tak. Pa esaning i kes saot ono di atongi mang “I sira tolsot anuna titol” pa “I momol.” Anuna warkurai pa nuna harum i tostos. 12 [g]Naur a matana i arlar ana irnga na iah, pa galis a kukuh a king kanisaot na pukulna. Pa di ka tumus tar a rising ting na palaona, ning bel tik i tasmani, i sot ka i tasmani. 13 [h]I mermer ana kaen ning di amurungi ting na suluk. Pa risana, “A Warwara ane God.” 14 A kunum a tarai a harum misaot na langit la kas ana kokok a hosla pa la muri. La mermer ana wakak a kokok a kaenla i totoh. 15 [i]Pa liwan a harum ning i harat kol kaning na pahana i gom pasi, suir ting amat na tarai miting na matanitula ono, pa ir warkurai rakrakai la ana bulse na aen. I pas gingini a wana wain ting na tung a hat ning i tur aslang a ngalngaliah a balakut ane God, esaning i rakrakai kol. 16 [j]Ting na nuna kaen pa ting na kinwar a hana, di ka tumus tar a risana larne,
A King anuna kingla
pa Leklek anuna leklekla.

17 [k]Pa a oroi ning a angelo i tur tar ting na kamis, pa i arkabah ana tnan elngena tetek a manila rop ning la rowoi saot na solsolna mang, “Mulo rowoi ute, mulor han taum ana tnan ngasa ane God, 18 sur mulor ien a sis a palaona kingla, na ningnigo anuna tarai a harum, a tarai a harum, a hosla pa la otleng ning la kas onla, pa sis a palaona tarai rop, na tena titol oros, pa la ning bel na tena titol oros, la ning bel al risanla pa la ning la leklek.”

19 Lamur a oroi a rokoio na inagoi pa kingla mite na rakrakan hanua, pa anunla na kunum a tarai a harum ning la han taum sur lar harum taum o esaning i kas ana hos pa nuna kunum a tarai a harum. 20 [l]Ika di tong akes pas a rokoio na inagoi pa asasongo na propet, esaning ka tol a akinalangla ana risana rokoio na inagoi. Ning i tol a akinalangla ning, i asongo pas la ning a akinalang ana rokoio na inagoi kaning onla, pa la lotu tetek a manar a rokoio na inagoi. Di migen lalaun tar a asasongo na propet pa rokoio na inagoi ting na tnan tung a iah ning i irnga ana salfa. 21 Di umkol anundiau a kunum a tarai a harum ana liwan a harum kaning na pahana esaning i kas ana hos. Pa manila rop la ien a sis a palaonla pa la masur onoi.

<- Tatatai 18Tatatai 20 ->