Tatatai 12

A hane pa dregon

1 A tnan akinalang i hanot saot na langit. Ning a hane i mermer ana kamis, pa kalang kaning i kes ting nahai naur a hana, pa saot na pukulna, a kukuh a king, ning di toli ana ning a bonot pa pisir naur a nangnang. 2 [a]A hane ne i tianan, pa i woiwoi ana tnan kankan, anasa milau ir agon.

3 [b]Ning a akinalang maleng i hanot saot na langit. Oroi, a tnan dregon, a palaona i kubar, mais a pukulna, ning a bonot a komna, pa mais a kukuh a king kaning na mais a pukulna. 4 [c]A mukmukna i surupu purum sen a galis a nangnang misaot na bakut pa i migen purum sen la ute lapiu. I arlar larning di salar tar a nangnangla sur natol a pukna pa ning a pukna tagun ditol la punga ute lapiu. Pa dregon i tur tar salanigo tana hane ning i pele na agon, sur ono otning ir konom e natnalik ning ir agon seni. 5 [d]Pa i agon pas a kaklik barsan, esaning ir warkurai rakrakai na tarai miting na matanitu rop ana bulse na aen. Pa di kibas kapit pas a kaklik usaot tetek e God, pa uting na nuna keskes a king. 6 Pa hane ning i liu uting na hanua bel, sur uting na pukna ning e God ka sang tari, sur dir tai alari arlar ana takai a rip naur a mar pa diono na bonot (1,260) a pukakiar.

7 [e]La tur na harum saot na langit. E Maikel pa nuna angelola la harum taum ana dregon, pa dregon pa nuna angelola otleng la keles la. 8 La tolsot pas a dregon, pa bel ulak ma ta pukna anuna dregon pa nuna angelola saot na langit. 9 [f]Di migen purum sen a tnan dregon, a soi tagun nating, ning di atongi a tena artitiu, pa e Satan, esaning i ben rongon a rakrakan hanua rop. Di migen purumi taum ana nuna angelola ute lapiu.

10 [g]Pa a longor a tnan elngen takai saot na langit i atongi mang,

“Onone a God anundala ka alaun pas a tarai, i asangan a rakrakaina, pa anuna matanitu ka hanot,

pa warkurai anuna Karisito anunai ka hanot.

Anasa a tena artitiu ning i sira tiu na tastasindala,

esaning i sira tiu la na matana e God ana kabakiarla pa moromla,

di ka migen purum seni.

11 Na tastasindala la ka tolsot pasi

ana suluk a Nat a Sipsip

pa ana nunla na warwara talapor.

Bel la mangan alar anunla a lalaun kusun a minat.

12 [h]I maining, a langit pa mulo ning mulo kes tingia,

mulor gas.

Ika ir laulau tetek a rakrakan hanua pa tasi otleng,

anasa a tena artitiu ka han purum tar tetek mu!

A balana i kut kol,

anasa i tasmani mang bel ma i bongnani.”

13 Ning a dregon i tasmani mang di ka migen purum seni ute na rakrakan hanua, i lu a hane ning ka agon tar a kaklik barsan. 14 [i]Di saran tar naur a dehel a tnan manigulai tana hane ning, suir rowoi taum ono sur a pukna ning e God ka sang tari saot na hanua bel, sur dir tai alari kusun a soi, arlar ana natol a rau pa tukna. 15 A soi i lewe sen a malum miting na pahana, arlar ana malum, suir los sen a hane ning. 16 Ika a piu i nangan a hane ning, i panganga pa i konom a malum ning a dregon i lewe seni. 17 [j]Pa dregon i balakut kol tetek a hane ning, pa i han suir harum taum ana dingla na natnatna a hane otleng ning. La ning la sira longor ana warkurai ane God, pa la sira mur a warwara talapor oe Iesu. 18 Pa dregon i tur tar kama tumo latasi.

<- Tatatai 11 Tatatai 13 ->