A Tatatai
ane Jon
A warwara talapor nigo
A buk ne e Jon i tumusi sur ir warwara talapor ana tatatai ning i oroi i. I ning a halinla ning a bonot pa pisir naur a kakak a asaer ane Iesu. I tumus a buk ne, ning i kes na karabus tumo na lolo Patimos. I tumusi diono na bonot pa pisir dilima na rau lamur tana tinan ane Iesu usaot na langit. Ana raula ning, a tarai a lotu la pastek a galis a mamahat, pa tarai la alaulau la pa di umkol a galis onla otleng. E God i asangan e Jon ana tatatai, anasa i mang sur lar tur rakrakai pa lar nuk pas e Iesu.
E Jon i oroi i ana tatatai mang e God i tasman a ututnala rop ning ir hanot, pa ir tolsot pas e Satan. Pa ana ararop a rakrakan hanua, a mamahat ning dala pasteki te lapiu ir rarop. Pa e God ir alaun pas a tarai ning la tortorot, pa ir warkurai a tarai ning bel la tortorot. Pa ka sang tar a wakak a hanua sur la ning anunai.
A galis a utna te na buk ne i arlar ana warwara larlar.
A tinan ana buk Tatatai:
A kamkama buk ne (1:1-8)
A tumtumus tetek a tarai a lotu ting na mais a hanua (1:9—3:22)
A Leklek i sapang a buk ning di ka hin tari (4:1—8:1)
Mais a angelo la wus mais a tawuru (8:2—11:19)
A dregon pa naur a rokoio na inagoi (12:1—13:18)
Na tatatai (14:1—15:8)
Mais a besen a balakut ane God (16:1-21)
E Babilon i punga pa e God i tolsot pas e Satan (17:1—20:10)
A pukakiar a warkurai (20:11-15)
A tona langit pa tona rakrakan hanua (21:1—22:6)
A ararop a warwara (22:7-21)

1 [a]A buk ne, a warwara puasa ane Iesu Karisito, ning e God i saran tari tana, suir asangan tar anuna tena titol orosla ana saning milau ir hanot. E Iesu i sune sen anuna angelo tetek anuna tena titol oros e Jon, suir warwara puasa ana ututnala ne tana. 2 E Jon i warwara talapor ana ututnala rop ning ka oroi tari. Ine a ututnala ning, a warwara ane God pa warwara talapor ane Iesu Karisito. 3 [b]Esining ir was a warwarala na propet ne ir angis, pa la otleng ning lar longori pa lar muri, la otleng lar angis, anasa a taim ning a ututnala ne ir hanot ka milau.

A tumtumus ane Jon tetek a tarai a lotu ting na mais a hanua

4 [c]Iau e Jon, a tumtumus tetek mulo a tarai a lotu ting na mais a hanua tumo na papar Esia.

A marmaris pa balmolmol tetek mulo miting ta esaning i laun nigo, i laun onone pa ir hanot lamur, pa tana mais a ingun otleng kanisa lanigo na nuna keskes a king, 5 [d]pa ta e Iesu Karisito, a momol a tena warwara talapor oe God, a ningnigo tanla ning lar laun ulak kusun a minat, pa ningnigo anuna kingla te na rakrakan hanua.

I maris dala, pa i alangolango pas dala kusun anundala na toltol laulau ana sulukna, 6 [e]pa i akes dala sur dalar warkurai taum onoi pa sur dala na tena artabar tetek e Tamana, esaning anuna God. A matatar pa rakrakai rop i kes oe Iesu Karisito, bel ir rarop. Amen.

7 [f]Oroi, i han purum ana diah bakut,

pa matana tarai rop lar oroi i,

pa la otleng ning la so tari,

pa mangis a tarai rop te na rakrakan hanua lar domos anasa onoi.

Ir hanot larotning. Amen.

8 [g]A Leklek e God i atongi mang, “Iau a Alpa pa Omega[h], esaning i laun nigo, i laun onone pa ir hanot lamur, esaning i rakrakai kol.”

E Jon i oroi takai i arlar ana Nat a Barsan

9 Iau e Jon, a tasimulo pa halimulo ning dala tur taum oe Iesu ana kankan, pa ana nuna matanitu pa tuntunur rakrakai ning dala kilang a kankan. A kes na karabus tumo na lolo Patimos, anasa a warawai ana warwara ane God, pa warwara talapor ane Iesu. 10 Ana pukakiar anuna Leklek[i] a bukus ana Talngan Tabu, pa tumo lamur tak, a longor a tnan elngen takai, i arlar ana tinangis a tawuru. 11 I atongi larne, “A utna ning u oroi i, ur tumus akesi ting na buk ning di hini pa ur abaran seni utumo tetek a tarai a lotu ting na mais a hanua ne: Epeses, Smerna, Pergamum, Tiatira, Sardis, Piladelpia pa Laodisia.”

12 A talingir suar oroi esining i warwara tetek iau. Ning a talingir, a oroi a mais a turtur a lam na gol. 13 [j]Pa na arpotor tana turtur a lamla a oroi takai “i arlar ana Nat a Barsan,” i mermer ana barbarah a kaen i barah misaot tuk tumo na naur a hana, pa i dot a malwasna ana inau a gol. 14 [k]A pukulna pa hih a pukulna dia kokok kol, arlar ana hih a sipsip, pa i arlar otleng ana busa na top, pa naur a matana i arlar ana irnga na iah. 15 Naur a hana dia arlar ana bras ning di ka tun totoh tari ana iah, pa elngena i arlar ana unga na malum ning i naro. 16 [l]I tong mais a nangnang ana sot a kuna, pa liwan a harum, ning naur a risna rop dia harat kol, kaning na pahana i gom pasi. Pa patarna i arlar ana kamis ning i sasai kol.

17 [m]Ning a oroi i, a punga purum tar milau naur a hana, arlar ana minat. Lamur i suah tar a sot a kuna saot hok, pa i atongi mang, “Gong u matmataut, iau a ningnigona pa araropna. 18 Iau esaning i laun. Ia ka mat pas, oroi i, ia ka laun tikin pa a tong a kila ana minat pa ana hanua Hedes, a hanua anunla ning la mat.

19 “I maining, ur tumus a ututnala ning u ka oroi tari: a ututnala ning ka hanot pa ututnala ning ir hanot lamur. 20 Ine a kamkama ututnala na pidik ana mais a nangnang ning u ka oroi tari te na sot a kuk, pa mais a turtur a lam na gol: A mais a nangnang i tur aslang a angelola anuna tarai a lotu ting na mais a hanua, pa mais a turtur a lam i tur aslang a tarai a lotu ting na mais a hanua.”

Tatatai 2 ->