Pilipai

A warwara talapor nigo

E Pol i kes ting na karabus tumo e Rom anasa i warawai ana Wakak a Warwara. Ning i kes tingia, i tumus diat a pas. Takai tetek a tarai a lotu to e Epeses, takai tetek a tarai a lotu tumo e Pilipai, takai tetek a tarai a lotu tumo e Kolosi pa takai otleng tetek e Pilimon.

A pas ne i tumusi tetek a tarai a lotu tumo e Pilipai, pa i atong wakak tetek la ana mani ning la saran tari tana. La saran tari ta e Epaproditus, pa i abarani teteki.

E Pilipai a tnan hanua tumo na papar Masedonia. Ana nuna munaur a tinan, e Pol i han utumo. Ning i han utumo belot la longor a Wakak a Warwara. Pa taraila ning la lingir a nuknukinla ana warawai ane Pol, la na ningnigo na tarai a lotu tumo na papar Masedonia (oroi Aposel 16:12-40).

A tarai a lotu tumo e Pilipai bel al galis a mani anunla. Ika la gas sur lar artabar ana mani tetek a tarai a lotu tisa na papar Judia ning la kapan kol, pa tetek e Pol otleng sur a arnangai ana tinan anunai.

E Pol i kes ting na karabus, ika i gas pa i mang sur a tarai Pilipai otleng lar gas ning la pastek a mamahatla. E Pol i atai la mang lar tur rakrakai pa lar tai alar la kusun na asasongo na tena asaer ning la asaer a tarai mang lar kot talilis la. La asaer la mang lar tortorot oe Iesu pa lar mur otleng a toltol ana tarai Juda mang lar kot talilis la.

E Pol i atongi otleng mang lar mur a toltol ane Iesu ning i anatarna pasi.

A tinan ana buk Pilipai:

A kamkama buk ne (1:1-11)

E Pol i atai la ana nuna keskes ting na karabus (1:12-26)

A toltol ning na tena tortorot lar muri (1:27—2:18)

E Pol i mang suir sune sen e Timoti pa e Epaproditus (2:19-30)

Lar tur rakrakai ana asaer mang e God i alaun pas dala anasa dala tortorot ka oe Iesu (3:1-16)

Lar mur a ngas a toltol ane Pol (3:17—4:9)

E Pol i gas ana nunla a artabar (4:10-20)

A ararop a warwara ane Pol tetek la (4:21-23)

3 Ana taimla rop ning a sira nuk mulo, a atong wakak tetek anuk a God omulo. 4 Pa ana nuk na niaring rop sur mulo rop, a sira araring taum ana gasgas, 5 [b]anasa mulo tur taum hok ana Wakak a Warwara, turpasi ana ningnigo na pukakiar ning mulo longori tuk onone. 6 A tasman momoli mang e God ning i turpas a wakak a titol omulo, anuna titol kaning ot i han, tuk ning ir aropi ana pukakiar ning e Karisito Iesu ir hanot onoi.

7 I tostos sur ar nuknuk larne omulo rop, anasa mulo kes momol te na nuknukik. Ning a kes te na karabus, pa a keles a warwara anuna tarai ning la atong laulau a Wakak a Warwara, pa a apuasa i tetek a taraila, dala rop dala tur taum ana titol ne e God i saran tari tak ana nuna marmaris. 8 E God i tasmani mang, a mang kol sur ar oroi mulo rop, anasa a mang kol sur mulo ana marmaris ane Karisito Iesu.

9 Anuk a niaring i ne: A araring mang anumulo a marmaris ir itna pa ir itna kol, taum ana mananos pa tastasmai, 10 [c]sur mulor tolsot pasi sur mulor tasman lalan asaning i wakak kol, pa mulor totoh, pa bel dir tiu sot pas mulo on ta rongo ana pukakiar ning e Karisito ir hanot onoi. 11 Pa a araring otleng mang, mulor bukus ana wana tostos a toltol, ning e Iesu Karisito i tol otnan tari ting na numulo a lalaun, sur a taraila lar atong aitna pas e God pa lar alekleki.

12 Na tastasik, a mang sur mulor tasmani mang asaning i hanot hok, i agomo a Wakak a Warwara sur ir han sarara. 13 [d]I maining i talapor tetek na tena harum rop ning la tai alar a rumai anuna ningnigo ana matanitu Rom, pa tetek a taraila rop otleng, mang a kes te na karabus anasa iau ane Karisito. 14 Anuk a keskes ting na karabus ka wunan a galis a tastasik ana tortorot ana Leklek, sur lar warwara talapor ana warwara ane God taum ana rakrakai, pa bel lar matmataut.

15 I momol mang dingla na tarai la warawai oe Karisito anasa la bal laulau tetek iau pa la mang lar sairas iau kusun a keskes a ningnigo. Ika dingla na tarai la warawai ana wakak a nuknukinla. 16 La warawai anasa a marmaris i kes ting na balanla. La tasmani mang a kes te na karabus sur ar keles a warwara anuna tarai ning la atong laulau a Wakak a Warwara. 17 Ika dingla na tarai la warawai oe Karisito anasa la mang lar aitna pas la ot, pa bel i momol a balanla. La mang lar wot ulak ka anuk a mamahatla, ning a kes te na karabus. 18 Ika bel ta utna. Ning la warawai ana laulau a nuknuk o a wakak a nuknuk, la rop ne la warawai ka oe Karisito. Ine a kamna ning a gas.

I momol, ar gas bolbolos, 19 [e]anasa a tasmani mang ana numulo na niaring, pa arnangai anuna Inguna e Iesu Karisito, na utna ning a kilangi ir tol otnan iau sur ar langolango. 20 A tortorot mang bel ar tol ta utna ning ar meme onoi. Ar tur rakrakai pa bel ar matmataut, sur ar aitna bolbolos e Karisito ana nuk na toltol. Ning ar laun o ar mat, ar aitna pasi. 21 [f]Anasa i manglarne: Ning a laun, a laun sur e Karisito, pa ning ar mat ar kibas pas a wakak a utna kol. 22 Ning a laun ana palaok, ar titol sur ta wakak a wana nuk a titol. Pa bel a tasmani esi na halindiau ning ar aslang pasi, a lalaun o a minat. 23 [g]Naur a nuknukik. Takai, a mang kol sur ar han par kes taum oe Karisito, esaning i wakak kol tan ning a halindiau. 24 Ika i wakak kol sur ar laun, sur ar nangan mulo. 25 I maining, a tasmani mang ar laun par kes taum omulo, sur mulor gomo, pa mulor gas ana tortorot. 26 Pa ning dalar tai taum ulak, anumulo na gasgas oe Karisito Iesu ir galis kol, anasa ia ka ulak tetek mulo.

27 [h]Asaning ir hanot, mulor tai alar anumulo a lalaun sur ir mur a Wakak a Warwara ane Karisito. Larne, ning ar han sur ar oroi mulo, o ning ar kes bakbak par longor ka a warwara omulo, ar tasmani mang mulo tur rakrakai ana takai ka a nuknuk, pa mulo titol taum arlar ana takai ka barsan sur mulor tai alar a Wakak a Warwara, ning dala tortorot onoi, 28 pa bel mulor matatan a hiruala. Ning bel mulor matatan la ir asangani mang lar hirua, ika mulo, e God ir alaun mulo. 29 [i]Anasa e God ka angis tar mulo. Bel i angis tar mulo ana numulo na tortorot ka oe Karisito, i angis tar mulo otleng ana mamahat ning mulo kilangi ana risana. 30 Mulo kilang a mamahat anasa mulo tur taum hok ana harum. A harum ning nating mulo oroi mang a toli, pa onone mulo longori mang kanet a toli.

Pilipai 2 ->