A Pas ane Pol tetek

E Pilimon
A warwara talapor nigo
E Pol i kes ting na karabus tumo e Rom anasa i warawai ana Wakak a Warwara. Ning i kes tingia, i tumus diat a pas. Takai tetek a tarai Epeses, takai tetek a tarai Pilipai, takai tetek a tarai Kolosi pa takai otleng tetek e Pilimon.
E Pol i tumus a pas ne tetek e Pilimon. E Pilimon a leklek a barsan miting na hanua Kolosi, pa tena tortorot otleng. Anuna ning a tena titol oros, a risana e Onesimus, i liu pas kusuni. Lamur di doti pa dia arpastek ma e Pol ting na karabus. E Pol i warawai teteki pa i lingir a nuknukna. Ning di pak sen e Onesimus, e Pol i mang sur ir ulak tetek anuna ningnigo e Pilimon, pa i tumus a pas ne tetek e Pilimon sur e Onesimus ir losi teteki. I atai i mang gong i balakut tetek e Onesimus, ir gas pasi, anasa ka lingir tar a nuknukna pa i tortorot oe Iesu arlar oe Pilimon.
A tinan ana buk Pilimon:
A kamkama buk ne (1-3)
A wakak a toltol ane Pilimon (4-7)
E Pol i mang sur e Pilimon ir gas pas e Onesimus (8-22)
A ararop a warwara ane Pol tetek e Pilimon (23-25)

1 Iau, e Pol, a kes ting na karabus anasa a tortorot oe Karisito Iesu. Miau ma e Timoti a tasindala, mia tumus a pas ne tetek u Pilimon, a wakak a halimila ana titol, 2 [a]pa tetek e Apia a tasindala hane, pa tetek e Arkipus a halindala na harum ana Wakak a Warwara, pa tetek a tarai a lotu ning mulo sira han taum ting na num a rumai. 3 A marmaris pa balmolmol ta e God a Tamandala, pa Leklek e Iesu Karisito ir kes taum omulo.

A marmaris pa tortorot ane Pilimon

4 Ning a araring, a sira nuk pas u, pa atong wakak tetek e God hom, 5 anasa a longori mang u mang sur a tarai rop ane God, pa u tortorot ana Leklek e Iesu. 6 A araring mang ur apuasa anum a tortorot oe Karisito tetek a tarai, sur ur mananos kol ana wakak a ututnala rop anundala ning kaning oe Karisito. 7 [b]Tasiklik, ning a longori mang u mang sur a tarai ane God pa u agasgas anunla a lalaun, a gas kol, pa i wunan iau otleng.

A nunung ane Pol sur e Pilimon ir malmaling pas e Onesimus

8 Ning a utna a mang kol sur ur toli. Bel a matmataut sur ar warwara rakrakai tetek u onoi, anasa oe Karisito. 9 Ika a nunung wowon u, anasa a mang sur u. Onone ia ka bun, pa kes te na karabus anasa a tortorot oe Karisito Iesu. 10 [c]A nunung u sur ur malmaling pas e Onesimus, a natuklik ana tortorot. Iau e tamana, anasa a warwara talapor oe Karisito teteki ning i kes te na karabus, pa i tortorot. 11 Lanigo bel i tolsot pas ta titol, ika onone, i a wakak a tena titol, tetek u pa tetek iau.[d]

12 Onone a sune ulak seni tetek u. Ning i han kusun iau i arlar larning i kibas a balak pa i han taum onoi, anasa a mang kol suri. 13 A mang sur ir kes kama napirik, sur ir keles u Pilimon, sur ir tai alar iau, ning a kes te na karabus anasa ana Wakak a Warwara. 14 Ika bel a mang sur ar angongos u sur nangan iau, a mang sur u ot ur toli ona num a gasgas. Bel ar tol ta utna tuk ning u ot ur malmaling. 15 Ngandek e Onesimus i kes siklik pas masik kusun u, sur onone ir kes tikin ulak taum hom. 16 [e]Bel ma ir arlar ulak ana tena titol oros, ir arlar oe tasimlik momol ana tortorot. A mang suri, ika anum a marmaris teteki i itna kol, anasa i anum a tena titol pa tasimlik otleng ana Leklek.

17 Ning u nuki mang da halna, ur gas ulak pas e Onesimus, arlar larning ur gas pas iau ot. 18 Ning ka tol tar ta toltol laulau tetek u o i kibas pas anum ta utna, iau ar kelesi tetek u. 19 Iau e Pol a tumus a warwara ne ana kuk ot: ar keles tar a dinau ning tetek u. Bel ar atong ta utna tam, u ot u ka tasmani mang a tona lalaun ning u kibasi, i kamkamna ot hok, pa i arlar ana dinau tetek u. 20 Momol, tasiklik, ana risana Leklek, a mang sur ur tol asaning ia ka atong tari tam. U a tasiklik oe Karisito, ur agasgas anuk a lalaun. 21 Ning a tumus a pas ne, a tasman momoli mang ur longor ot ana nuk a nunung tetek u, pa tasmani otleng mang ur tol a utna ning i itna kol tana utna ning a nunung u suri.

22 [f]Ning a utna otleng, a nunung u sur sang ta tuka rumai sur iau. A tortorot mang e God ir alangolango sen iau kusun a karabus sur ar han ulak tetek mulo. Ine a wana numulo na niaring.

A ararop a warwara na marmaris

23 [g]E Epapras, esaning i karabus taum hok anasa ana tortorot oe Karisito Iesu, i saran anuna marmaris tetek u. 24 [h]Pa la otleng ne, e Mak, e Aristarkus, e Demas pa e Luk. Mila halalna taum ana titol.

25 A marmaris ana Leklek e Iesu Karisito ir kes ting na ingumulo.