1 E Iesu i kas ana mon, pa i han lakai utumo na ning a ris a puka tasi pa i hanot ting na anuna hanua. 2 Pa dingla na tarai la los otnan ning a barsan teteki, a palaona i mat pa i borbor tar ka ana logo ngasna. Ning e Iesu i oroi anunla tortorot, i atai a barsan ning mang, “Natuklik, gong u matmataut, di ka kepsen tar anum na toltol laulau.” 3 Dingla na tena asaer tagun a warkurai la warwara artalai tetek la ot mang, “A barsan ne i atong saksakan e God anasa i warwara larning i e God.”

4 Pa e Iesu i tasman a nuknukinla, pa i deken la mang, “Sur asa mulo nuknuk laulau? 5 Esi na ngas a warwara ning bel i ngangaten sur ar atongi? Ar atongi mang, ‘Di ka kepsen anum na toltol laulaula,’ o, ar atongi mang, ‘Ur kamtur, pa ur han’? 6 Ar atongi larne, sur mulor tasmani mang, e God ka saran tar a warkurai tetek a Nat a Barsan, sur ir kepsen a toltol laulaula te lapiu.” Pa i atongi tetek a barsan ning a palaona i mat mang, “Ur kamtur, ur kibas a logo ngasim, pa ur han uting na rumai ngasim.” 7 I kamtur, pa i han uting na rumai ngasna. 8 Ning a kunum a tarai la oroi a utna ne, la kulkulan kol ono, pa la rakan aleklek pas e God, anasa i saran a rakrakai larne tetek a tarai.

9 Ning e Iesu i han miting ia, i oroi pas ning a barsan, a risana e Matiu, i kes ting na rumai a los totokom. E Iesu i atai i mang, “Ur mur iau.” Pa e Matiu i kamtur pa i muri.

10 Lamur ning e Iesu taum ana anuna kakak a asaerla, la hangan ting na rumai ane Matiu, a galis a tena los totokom pa tena laulaula la han tetek e Iesu, pa la hangan taum onla. 11 Ning a Parisaiola la oroi i, la deken anuna kakak a asaerla mang, “Sur asaning anumulo a tena asaer i hangan taum ana tena los totokomla pa tena laulaula?”

12 E Iesu i longori pa i atongi mang, “A dokta bel i hanot sur la ning la langolango. I hanot sur la ka ning la sasam. 13 Mulor han, pa mulor asaer sur mulor tastasim ana kamkama warwara ne miting na Buk Tabu, ‘A mang sur a marmaris, pa bel a mang sur a artabar ning di sira tuni.’ Hosea 6:6

14 A kakak a asaerla ane Jon la han tetek e Iesu, pa la dekeni mang, “Sur asa ning mila ma na Parisaiola mila tamai, ika anuma kakak a asaerla bel?” 15 E Iesu i keles la mang, “Ning ta barsan ir taulai totoh, na halalna lar domos mangmangasa ning a barsan ning kaning ot i kes taum onla? Ika ta pukakiar ir hanot, ning dir ben maskan pas a barsan ning kusun la, pa lar bot tamai.

16 “Bel tik ir suk ahat a dia tona kaen taum ana muarna ning i taksilir, sakana a dia tona kaen ir silir a muar a kaen, pa ir taksilir kol. 17 Bel tik ir tere a tona wain uting na turai a kotola ning di toli ana palaona inagoi, sakana a kotola lar tapuros pa lar laulau, pa a wain ir tapek. Dir tere a tona wain ot uting na tona koto na wain, sur dia rop diar kes wakak.”

18 Ning e Iesu kaning ot i warwara tetek la, ning a ningnigo i han teteki, pa i kes ana bokona hana sa lanigo tana, pa i atongi mang, “A natuk hane, onokane i mat. Lamut, dar han pa ur suah a kum saot ono, pa ir laun.” 19 Pa e Iesu i kamtur pa dia han taum ana nuna kakak a asaerla.

20-21 Ning a hane i sasam ana suluk arlar ana ning a bonot pa pisir naur a rau. I nuki mang, ning ir tong ka a mermer ane Iesu, ir langolango. Pa i han tumo lamur ta e Iesu, pa i tuk a ris a tuka saket anunai. 22 E Iesu i talingir pa i oroi a hane ning, pa i atai mang, “Natuklik, gong u matmataut, anuma tortorot ka alangolango pas u.” Pa ono otning a hane ning i langolango.

23 Ning e Iesu i kas ting na rumai ana ningnigo, i oroi a tarai ning la asangan anunla a bal maris ana minat. La wus a tulalla, pa kunum a tarai otleng la domos. 24 I atai mang, “Mulor purum kusuni. A hane lik ne bel i mat, kaning i borbor duman ka.” Pa la malani ka. 25 Ning e Iesu ka sune purum sen a taraila, i kas pa i tong a kuna kaklik hane ning, pa i kamtur kakat. 26 A warwara ana utna ne i han sarara ting na papar rop ning.