Jon 6

E Iesu i tabar dilima na rip a tarai

(Mt 14:13-21; Mk 6:30-44; Lk 9:10-17)

1 Lamur e Iesu i han lakai a puka tasi Galili, ning di atongi otleng mang a puka tasi Tiberias. 2 A tnan kunum a tarai la muri, anasa la ka oroi tar a akinalangla e Iesu i toli, ning i alangolango la ning la kurah. 3 E Iesu i han kas usaot ana mangir, pa i kes taum ana nuna kakak a asaerla. 4 A lotu na Han Lakai anuna tarai Juda ka milau.

5 Ning e Iesu i tai tar, i oroi pas a tnan kunum a tarai la han teteki. I atai e Pilip mange, “Dalar lou al utna na hangan taha, sur dalar tabar a taraila ne ono?” 6 E Iesu i atongi larne sur ir toho e Pilip. I ot ka tasman asaning ir toli. 7 E Pilip i kelesi mange, “A arlou tagun a siwal a kalang ning dir lou pas a utna na hangan ono, bel ir arlar onla.” 8 Ning a hala nuna kakak a asaerla, a risana e Endru, a tas e Saimon Pita, i atai e Iesu mange, 9 “Ning a kaklik barsan kane i los dilima na bret ning di toli ana bali, pa naur a natar a sis. Ika ir arlar mangmangasa ona taraila ne?”

10 A ulai rop ka ting na pukna ning, pa e Iesu i sune anuna kakak a asaerla sur lar akes a taraila tingia. Pa la kes. A wawas ana tarai ka i arlar ana dilima na rip, ika a gurarala pa kakakla otleng la hangan taum onla. 11 E Iesu i kibas pas dilima na bret, i atong wakak pas tetek e God onoi. Pa i asalari tana taraila ning la kes tingia, arlar larning la mang suri. Pa i asalar otleng a sis tanla. 12 Ning la ka masur rop, i atai anuna kakak a asaerla mange, “Mulor suah taum wakak a mah a utna na hanganla, sur gong di alaulau a utna na hangan.” 13 Pa la suah taum a mah a utna na hangan tagun dilima na bret ning, pa la song bukus pas ning a bonot pa pisir naur a rat. 14 Ning a tarai la oroi a akinalang ne i toli, la atongi mange, “I momol ot, a barsan ne, i a Propet ning di atongi mang ir hanot ute na rakrakan hanua.” 15 Ning e Iesu i tasmani mang la mang sur lar han teteki sur lar angongosi sur ir king, io, i han masik kusun la usaot ana ning a mangir.

E Iesu i han saot ana puka tasi

(Mt 14:22-33; Mk 6:45-52)

16 Ning ka rahmorom, a kakak a asaerla ane Iesu la han utumo na puka tasi. 17 La kas ana mon, pa la turpas a lakai a puka tasi sur e Kapernaum. Ka morom, pa e Iesu belot i hanot tetek la. 18 A tnan wuwu i ragati pa a tatatnan top i kamtur. 19 Ning la ka ulusu bakbak, arlar ana dilima na kilomita, la oroi pas e Iesu i han saot na palai a puka tasi tetek la. Pa la matmataut kol. 20 Ika e Iesu i atai la mange, “Gong mulo matmataut, iau ka ne.” 21 La gasgas pasi pa la akasi ana mon. Pa la sot kakat ana pukna ning la han suri.

A tarai la tai sur e Iesu

22 Ana ning a pukakiar lamur, a kunum a taraila ning la kes tumo na ris a puka tasi, la tasmani mang ning a mon ka i kes tingia. Pa la tasmani mang a kakak a asaerla ka la han, e Iesu bel i kas taum onla. 23 Lamur dingla na mon mitimo e Tiberias la sot milau ana pukna ning a Leklek i atong wakak ana bret pa a kunum a tarai la hangan ano. 24 Ning a kunum a tarai la oroi mang e Iesu taum ana nuna kakak a asaerla bel la kes tingia, la kas ana monla, pa la han utumo e Kapernaum sur lar tai sur e Iesu.

E Iesu a bret a lalaun

25 Pa ning a tarai la pastetek pas e Iesu tumo na ris a puka tasi, la dekeni mange, “Tena Asaer, nangse u han tar ute?” 26 E Iesu i keles la mange, “A atong momoli ta mulo, bel mulo tai sur iau anasa mulo oroi a akinalangla ning a toli, belal. Mulo tai ka sur iau anasa mulo ien a bret pa mulo masur ono. 27 Gong mulo rakrakai ka sur a utna na hangan ning i sira marase. Mulor rakrakai sur a utna ning ir kes sur a lalaun tikin, ning a Nat a Barsan ir tabar mulo ono. Anasa e God e Tata ka saran tar a rakrakai tak sur ar toli larne.” 28 La dekeni mange, “Asa ning milar toli sur milar tol a titolla ning e God i mang suri?” 29 E Iesu i keles la mange, “A titolla ne, ning e God i mang suri, mulor tortorot o esaning i sune i ute.” 30 Pa la dekeni mange, “Ur tol esi na akinalang sur milar oroi pa milar tortorot hom onoi? Asa ning ur toli? 31 A tumtubumila la ien a mana ana hanua bel, larotning di ka tumus tari ting na Buk Tabu mange, ‘I tabar la ana bret misaot na langit pa la ieni.’ ” Buk Song 78:24

32 E Iesu i atai la mange, “A atong momoli ta mulo, bel e Moses ning i tabar la ana bret misaot na langit, e Tata i tabar la. Pa ine i tabar mulo ana bret momol misaot na langit. 33 Esaning i han purum misaot na langit, i ot a bret ane God, ning i saran a lalaun tetek a taraila rop te na rakrakan hanua.”

34 La atai i mange, “Leklek, ur tabar mila ana bret ning, ana pukakiarla rop.” 35 E Iesu i atai la mange, “Iau a bret na lalaun. Esila ning lar han tetek iau, bel lar murak, pa esila ning lar tortorot hok, bel lar mos ulak. 36 Ia ka atai tar mulo mang mulo ka oroi tar iau, ika bel mulo tortorot. 37 La rop ning e Tata i saran tar la tak, lar han tetek iau, pa esining ir han tetek iau, bel ar kepseni, belal. 38 Anasa a han purum misaot na langit, bel sur ar mur a nuknukik, ika sur ar mur ot a nuknukna esaning i sune iau ute. 39 A nuknukna esaning i sune iau ute ine, gong tik ta halinla ning i saran tar la tak ir hirua. Ar akamtur ulak la rop kusun a minat ana ararop a pukakiar. 40 A nuknuk ane Tata i mange, la rop ning la tai tetek e Natnalik pa la tortorot onoi, lar laun tikin, pa iau ar akamtur la kusun a minat ana ararop a pukakiar.”

41 Dingla na Juda la ururai o e Iesu, anasa i atongi mange, “Iau a bret ning i han purum misaot na langit.” 42 Pa la atongi mange, “E Iesu a nat e Josep ka. Dala tasman ot e tamana pa e tana. Pa sur asa ning i atongi mang i han purum misaot na langit?” 43 E Iesu i keles la mange, “Gong mulo abereng wara. 44 Bel tik ir han lar pasi tetek iau. Ika e Tata ot ning i sune iau, ir ben tari tetek iau, pa ar akamturi kusun a minat ana ararop a pukakiar. 45 A propetla la ka tumus tari mange, ‘E God ir asaer la rop.’ Ais 54:13

Pa la rop ning la longor e Tata pa la asaer tana, lar han tetek iau. 46 Bel tik i oroi e Tata. Esan kaning i han pas tagun e God, i oroi tar e Tamana. 47 A atong momoli ta mulo, esining i tortorot hok, ka kibas a lalaun tikin.

48 “Iau a bret a lalaun. 49 Nating a tumtubumulo la ien a mana ting na hanua bel, ika la ka mat. 50 Ika a bret ne i han misaot na langit, ning tik ir ieni, bel ir mat. 51 Iau a bret a lalauna, ning i han purum misaot na langit. Tik ning ir hangan tagun a bret ne, ir laun tikin. A bret ning ar artabar ono, a palaok. A sarani sur a taraila ana rakrakan hanua lar kibas lalaun onoi.”

52 Dingla na Juda, la arlak artalaila, pa la atongi mange, “A barsan ne ir tabar mangmangasa dala ana palaona sur dalar ieni?” 53 Pa e Iesu i atai la mange, “A atong momoli ta mulo, ning bel mulor ien a palaona Nat a Barsan pa bel mulor gang a sulukna, belal lalaun momol ir kes o mulo. 54 Esining ir ien a palaok pa ir gang a sulukik, ka kibas a lalaun tikin, pa iau ar akamturi kusun a minat ana ararop a pukakiar. 55 Anasa a palaok a utna na hangan momol, pa a sulukik a malum a gang momol. 56 Esining ir ien a palaok pa ir gang a sulukik, ir laun hok, pa iau ar laun onoi. 57 E Tata ning a lalauna i sune iau, pa a laun anasa o e Tata. Mangotleng larning tetek esining ir ien a palaok, ir laun anasa hok. 58 A bret ning i han misaot na langit ine. Bel i arlar ana mana ning a tumtubumulola nating la ieni, pa la ka mat. Ika esining ir hangan tagun a bret ne, ir laun tikin.” 59 E Iesu i atong a warwarala ne, ning i asaer a taraila ting na rumai lotu tumo e Kapernaum.

A warwarala na lalaun tikin

60 A galis tagun anuna tarai a asasaerla ning la longor a warwarala ne la atongi mange, “A asasaer ne i ngangaten kol, esi ir malmaling pasi?” 61 E Iesu i tasmani mang anuna na tarai a asasaer la ururai onoi. I deken la mange, “Mangmangasa, a warwara ne i alaulau mulo? 62 Ir mangmangasa tetek mulo ning mulor oroi a Nat a Barsan ir ulak usaot sur a hanua ning nating ka kes pas ano? 63 A Talngan Tabu i saran a lalaun. A rakrakai ana palaona tik bel i to pas ta utna. A warwarala ning a atongi ta mulo, i hanot tagun a Talngan Tabu, pa i saran a lalaun. 64 Ika dingla o mulo bel la tortorot.”

Ning ot e Iesu ka tasman la ning bel lar tortorot onoi, pa i otleng ning ir tuami. 65 Pa i atongi otleng mange, “Ine a kamkamna ning a atai mulo mang bel tik ir han lar pasi tetek iau. Ika, ning ot e Tata ir sarani tetek iau, io, ir han tetek iau.”

66 Pa a galis tagun anuna tarai a asasaer la ulak kusuni, pa bel ma la muri. 67 E Iesu i deken ning a bonot pa pisir naur a kakak a asaer anunai mange, “Mangmangasa, mulo otleng, mulo mang sur mulor ulak kusun iau?” 68 E Saimon Pita i kelesi mange, “Leklek, milar han tetek esi? Anasa a warwarala na lalaun tikin anumi ka. 69 Mila ka tortorot pa mila tasmani mang u a Tena Totoh ane God.” 70 E Iesu i atai la mange, “Ia ka aslang pas mulo ning a bonot pa pisir naur a kakak a asaerla, gepi? Ika takai o mulo a mot ka!” 71 I warwara o e Judas, a nat e Saimon Iskariot, i takai tagun ning a bonot pa pisir naur a kakak a asaerla, ning ir tuam e Iesu.

<- Jon 5 Jon 7 ->