Jems

A warwara talapor nigo

E Jems i tumus a pas ne. A galis a tena tastasmai la nuki mang e Jems a tas e Iesu (oroi e Matiu 13:55). E Jems i ning a ningnigo anuna tarai a lotu saot e Jerusalem (oroi Aposel 15:13, 21:18).

I tumus a pas ne tetek a tena tortorotla, ning la pastetek a galis a mamahat tana tarai ning bel la tortorot. La lu sen na tena tortorot. Pa lamur na tena tortorot la kes na wasira ting na hananuala.

Ana pas ne i warwara ana wakak a toltol ning a tena tortorotla lar muri. I atai dala otleng mang anundala a wakak a toltol i amomol anundala a tortorot.

A tinan ana buk Jems:

A kamkama buk ne (1:1)

A tortorot pa tastasmai (1:2-8)

A kapan a tarai pa na tena gongon (1:9-11)

Dalar tur rakrakai ning a arlam ir hanot (1:12-18)

A longlongor ana warwara ane God (1:19-27)

Dalar hanrawai a tarai rop (2:1-13)

A wakak a titol i han taum ana tortorot (2:14-26)

A laigeremindala (3:1-18)

A atumarang tetek la ning la mang sur a toltol mite na rakrakan hanua (4:1—5:6)

Dalar tur rakrakai ana tortorot (5:7-20)

2 [b]Na tastasikla, ning al ngas a mamahat ir hanot tetek mulo, mulor gas, 3 [c]anasa mulo tasmani mang ning mulo pastek a mamahatla ning di lar anumulo a tortorot onoi, ir aitna anumulo a tuntunur rakrakai. 4 Ning mulor tur rakrakai, anumulo a lalaun rop ir tostos, pa bel mulor kapan sur ta utna na ingun.

5 [d]Ning tik omulo i kapan sur a mananos, i wakak ning ir nunung e God suri. Pa e God ir tabari onoi, anasa i sira tabar dala rop, pa bel i sira san alar ta utna. Pa bel i sira balakut tetek tik ning i nunungi. 6 Ika ning ir nunung, ir nunung ana tortorot, pa gong i urmatana nuknuk, anasa esining ir urmatana nuknuk i arlar ka ona top, ning a wuwu i wus taltali. 7 A barsan ning i urmatana nuknuk, gong i nuki mang ir kibas ta utna tana Leklek. 8 Anasa naur a nuknukna, pa bel ir tur rakrakai ana nuna titol rop.

9 Ta tasindala ana tortorot ning ir tong akes ta natar a utna ka te lapiu, i wakak ning ir gas ka, anasa e God ot ir aleklek pas a barsan ning. 10 [e]Ika ta tena gongon, ir gas ka ning e God ir anatarna seni. Anasa anuna lalaun i arlar ka ana purpur, ir rorom ka. 11 A kamis ir hanot taum ana laplapangna, ir rang a rakai, pa sarna ir punga, pa wakak a tatatai ono ir rarop. Larka otleng a tena gongon, ir rorom ning ir molot ot ana nuna gongonla.

12 A barsan ning i tolsot pas a arlam, pa i tur rakrakai, i angis. Anasa esining i tolsot pas a ututnala ning di lar anuna tortorot onoi, ir kibas pas a kukuh a lalaun tikin, ning e God i lele tar sur ir sarani tanla rop ning la mang suri.

13 Ning a arlam ir hanot tetek tik, gong i atongi mang e God i alami. Anasa e God bel ta toltol laulau ir alam lar pasi, pa e God ot bel ir alam tik. 14 Ika, a taraila rop, taktakai, anunla a laulau a nuknuk ot i alam pas la pa i dat la sur lar tol a toltol laulau. 15 Lamur, ning anunla a laulau a nuknuk ir itna, ir agon otnan pas a toltol laulau. Ning a toltol laulau ir itna, ir agon otnan pas a minat.

16 Na wakak a tastasikla, gong mulo noren tar tik sur ir asongo mulo. 17 Na wakak a artabar rop, ning la tostos, la han purum misaot na langit. La hanot ta e Tata, esaning i akes a kamis, a kalang pa nangnangla. Ika e Tata bel i arkeles pa bel i ries a magirana lar a kamis, ning i sasai ana kabakiar pa morom bel. 18 [f]Ana nuknukna ot, e Tata i agon tona dala ana nuna warwara momol. I aslang pas dala kusun a akakesla rop, sur dala anuna tarai ot, arlar ana ningnigo na wana rakai ning di sira artabar onoi teteki.

19 [g]Na wakak a tastasikla, mulor tasman a utna ne: I wakak ning mulo rop, mulor longlongor kapit, pa gong mulo iapiap sur mulor warwara, pa gong mulo iapiap sur mulor balakut. 20 Anasa a balakut anuna tik bel ir tol otnan a tostos a toltol ning e God i mang suri. 21 [h]Mulor manah kusun a dur a toltol pa na toltol laulau ning kane i bukus te na rakrakan hanua. Pa mulor anatarna pas mulo ning mulo kibas a warwara ning di ka oman tari ting na balamulo, a warwara ane God ning ir alaun sot pas mulo.

22 [i]Mulor mur a warwara ane God, pa gong mulo longor oros tari ka, sakana mulor asongo ulak pas mulo ot. 23 Esining i longor oros tar ka a warwara ane God, pa bel i muri, i arlar ka ana barsan ning i oroi a manarna ting na galas. 24 Ning i han masik, aiap ka i duman sen a manarna i tai mangmangasa. 25 [j]Ika ning tik ir longor wakak a tostos a warkurai ane God, ning i alangolango a tarai, pa ir sira muri, pa bel i dumani, a barsan ning i angis ana nuna titol.

26 [k]Ning tik ir nuki mang i a momol a tena lotu, ika bel i tumarang a laigeremna kusun a laulau a warwara, anuna lotu i utna oros ka, pa i asongo pasi ot. 27 Ika ning dala nangan a nat a biasuila, pa laola ning la pot na marmaris, pa ning dala tumarang dala otleng kusun a dur a toltol mite na rakrakan hanua, ine a tostos a lotu, pa bel ta utna i rongo ono na matana e God a Tamandala.

Jems 2 ->