A Pas ane Pol tetek a tarai

Epeses
A warwara talapor nigo
E Pol i kes ting na karabus tumo e Rom anasa i warawai ana Wakak a Warwara. Ning i kes tingia, i tumus diat a pas. Takai tetek a tarai a lotu tumo e Epeses, takai tetek a tarai a lotu tumo e Pilipai, takai tetek a tarai a lotu tumo e Kolosi pa takai otleng tetek e Pilimon.
I tumus a pas ne tetek a tarai a lotu tumo e Epeses sur lar wasi, pa lamur, lar sarani tetek a tarai masik.
E Epeses takai a tnan hanua ting na papar Esia. A tarai miting na hanua ning la mang kol sur a mani, pa la sira lotu tetek a asasongo na god di atongi e Artemis. La tol takai a tnan rumai lotu ane Artemis (oroi a Aposel 19:17).
Ana munaur a tinan ane Pol i warawai tetek a tarai Juda ning la kes tumo e Epeses (oroi a Aposel 18:18-21). Pa lamur ana nuna munatol a tinan i han ulak utumo e Epeses pa i kes tumo natol a rau, pa i asaer a taraila ning la lingir a nuknukinla pa la tortorot oe Iesu (oroi a Aposel 19). Dingla na tarai a tortorot na te Judala, pa dingla na tarai bel. E Pol i asaer la mang dala takai ka oe Iesu Karisito, a tarai Juda taum ana tarai masik otleng. I asaer la ana natol a warwara larlar ana tarai tortorot mange:
Dala arlar ana palaona e Karisito, pa i a pukulundala.
Dala arlar otleng ana rumai lotu ane God, pa e Iesu i a hat kes ning a kidol a rumai i tugus wakak onoi,
Dala arlar ana hane ning di sangi sur ir taulai.
A tinan ana buk Epeses:
A kamkama buk ne (1:1-2)
Dala takai ka oe Karisito (1:3—3:21)
A kes taum anuna tarai a tortorot (4:1-16)
A tona lalaun oe Karisito (4:17—5:20)
Dalar anatarna artalai tetek dala (5:21—6:10)
A mermer a harum kaning oe Karisito (6:11-20)
A ararop a warwara ane Pol tetek a tarai Epeses (6:21-24)

1 [a]Iau e Pol, aposel ane Karisito Iesu ana nuknuk e God. A tumus a pas ne tetek mulo a tarai ane God, ning mulo kes tingia e Epeses,

2 A marmaris pa balmolmol ta e God a Tamandala pa Leklek e Iesu Karisito ir kes tetek mulo.

E God i angis dala ning dala kaning oe Karisito

3 [b]Dalar atong leklek pas e God, a Tamana e Iesu Karisito anundala Leklek. I angisngis dala ana ututnala rop misaot na langit sur ir nangan a ingundala, ning dala kaning oe Karisito. 4 [c]E God ka aslang pas dala, ning dala ane Karisito, nating ot ning belot i akes a rakrakan hanua, sur dala totoh, pa bel dir tiu sot pas dala on ta rongo na matana.

5 [d]Ana nuna marmaris, nating ot ka aslang dala sur ir ras pas dala sur dala na natnatnala, ning dala kaning oe Iesu Karisito. Ana nuknukna ot pa ana nuna gasgas i toli larne. 6 Pa dalar atong aleklek pas e God ana nuna wakak a marmaris, ning ka tabar oros dala onoi, oe Natnalik ning i katnan koli. 7 [e]Pa ning dala kaning oe Karisito, a sulukna i lou alangolango pas dala, pa e God i kepsen anundala na toltol laulaula. A marmaris ane God i itna kol, 8 ning i sira tabar mokos dala onoi, taum ana tastasmai rop pa wakak a nuknuk.

9 [f]E God i apuasa dala ana ututnala ning ir toli, ning nating i mumun, pa ir tolsoti oe Karisito. Ana ututnala ne i mur ot a nuknukna, pa i gas suir toli. 10 [g]A nuknukna i mange: Ir dat taum a ututnala rop saot na langit pa te na rakrakan hanua, sur la rop lar kes nahai a warkurai ane Karisito. Tagun nating ot e God ka tasman a utna ne ir toli oe Karisito, pa ning a pukakiar ir sot ir tolsot pasi ot.

11 [h]Nating ot i aslang pas mila na tarai Juda, sur mila anuna tarai oe Karisito. A ututnala rop ning e God i sira toli, i toli arlar ot ana nuknukna. 12 I aslang pas mila sur mila na ningnigo na tarai ning mila tortorot oe Karisito, sur milar atong leklek pas e God ana nuna matatar. 13 Pa mulo otleng, mulo laun oe Karisito, ning mulo longor a momol a warwara ne, a Wakak a Warwara mang e God i alaun pas mulo. Ning mulo longori pa mulo tortorot oe Karisito, e God i suah tar anuna akinalang omulo, a Talngan Tabu, ning ka lele nigo tar onoi. 14 [i]A Talngan Tabu, a ningnigo na artabar, sur ir amomoli mang lamur ana pukakiar ning e God ir alangolango pas anuna tarai, dalar kibas a ututnala ning e God ka lele tar onoi. Pa dalar atong leklek pas e God ana nuna matatar.

E Pol i araring sur a tarai a lotu

15 I maining, ning a longori mang mulo tortorot ana Leklek e Iesu, pa mulo mang sur a taraila rop ane God, 16 bel a manah ana atong wakak tetek e God omulo. Pa ana nuk a niaringla a sira nuk pas mulo. 17 [j]A sira araring mang a God anuna Leklek anundala e Iesu Karisito, a Tamandala ning i bukus ana matatar, ir tabar mulo ana tastasmai miting tana Talngan Tabu, pa ir atalapor a nuknukimulo, sur mulor tasman wakak e God. 18 [k]A araring mang ir atalapor a ingumulo, sur mulor tasman a ututnala ning dala harnanai ana tortorot suri, ning e God i kabah pas dala sur dalar kibas pasi. A ututnala ning dala na tarai ane God, dalar kibas pasi, i itna kol pa i bukus ana matatar. 19 Pa araring sur mulor tasmani mang a rakrakai e God ning i nangan dala onoi, ning dala tortorot, i itna kol. Bel dir arlar sot pasi ana ta utna. Ana tnan rakrakaina ning, 20 e God i akamtur pas e Karisito kusun a minat, pa i akes tari ting na ris a sot a kuna saot na langit. 21 Pa e Karisito i leklek tana urmatana ingun rop larne, a ningnigola anuna ingunla, a ingunla ning la tong akes a rakrakai sur lar warkurai, pa a ingunla ning la tong akes a rakrakai, pa la ning la keskes na leklek. A risana e Karisito i leklek kol tana risingla rop ana lalaun ne, pa ana lalaun lamur. 22 [l]E God i suah tar a ututnala rop nahai a rakrakai e Karisito, pa e God i akes tar e Karisito sur ir leklek tana ututnala rop, pa i ot a ningnigo ana ututnala rop sur a arnangai tetek a tarai a lotu. 23 [m]Pa tarai a lotu la a palaona e Karisito. Pa e Karisito i bukus onla, pa i abukus a ututnala rop otleng ting na urmatana ngas rop.

Epeses 2 ->