1 [a]Ning e Apolos i kes ting e Korin, e Pol i mur a ngas bual pa i hanot to e Epeses, pa i pastek pas dingla na tarai a asaer tingia. 2 [b]Pa i deken la mange, “Mangasa, a Talngan Tabu i kes omulo ning mulo tortorot?” Pa la kelesi mange, “Bel. Bel di atai mila ana Talngan Tabu.” 3 Pa i deken la mange, “Di baptais mulo on esi na ngas a baptais?” Pa la kelesi mange, “A baptais ane Jon.” 4 [c]Pa e Pol i atongi mange, “E Jon i baptais ana baptais na lingir a nuknuk, pa i atai a tarai, sur lar tortorot o esaning ir hanot lamur tana. I e Iesu.” 5 Ning la ka longor tar a warwara ane Pol, di baptais la ana risana Leklek e Iesu. 6 [d]Ning e Pol i suah naur a kuna saot onla, a Talngan Tabu i kes onla, pa la warwara ana urmatana warwara, pa la warwara na propet. 7 Ngandek la takai a bonot pa pisir naur, pa la a taraila ka.

8 E Pol i sira kas uting na rumai lotu, i warwara pa bel i matmataut, pa i papak wakak ana matanitu ane God sur lar tortorot. I toli larning arlar ana natol a kalang. 9 Ika a balan dingla na tarai onla i rakrakai kol, pa bel la mang sur lar tortorot, pa la atong laulau a Ngas ane Karisito na matana taraila. Pa e Pol i han kusun la sur uting na rumai a asaer ane Tiranus. A tarai a asaer la muri pa la warwara taum ana pukakiarla ting na rumai ning. 10 Ana naur a rau i sira toli manglarning. Pa la rop, a tarai Juda pa tarai ning bel a tarai Juda, ning la kes ting na papar Esia, la longor a warwara anuna Leklek.

11 [e]E Pol i tol a maskan a ututnala na kulkulan ana rakrakai e God. 12 [f]Pa tarai la los pas anunla na diah tawolla pa didiah kaenla otleng, la suah pasi ting na palaona e Pol, lamur la suahi ana tinsamanla pa la langolango, pa motla otleng la purum kusun la.

13 Dingla na te Juda, la sira han taltal uting na hananuala, sur lar kepsen a motla kusun a tarai. Pa la tohoi sur lar kepsen otleng a motla taum ana risana e Iesu. La sira atongi mange, “A kepsen mulo ana risana e Iesu, ning e Pol i warawai onoi.” 14 Mais a nat e Skewa a te Juda, a tnan tena artabar tetek e God, la toli larne. 15 Ning a pukakiar a mot i keles la mange, “A tasman ot e Iesu, pa a tasman otleng e Pol. Ika mulo, esila mulo?” 16 Pa barsan ning a mot i kas tar onoi, i sirok pas la, pa i um laulau la pa i silir anunla na kaen pa la dun mengere kama utumo lapiu.

17 [g]A warwara ana utna ne, i hanot tetek a tarai Juda pa taraila ning bel a tarai Juda ning la kes to e Epeses, pa la matmataut rop, pa la hanrawai a risan a Leklek e Iesu. 18 A galis onla ning la tortorot, la hanot pa la patuai ana laulau a gininla. 19 Pa galis otleng onla ning la wah, la los taman pas anunla na buk a wah, pa la tun la na matana taraila. Ning la was taman a matana bukla, i arlar ot ana dilima na bonot a rip (50,000) a mani. 20 A warwara anuna Leklek i han sarara, pa i gomo ana rakrakai.

21 [h]Ning a ututnala ne ka rop, e Pol i mang sur ir han usaot e Jerusalem, pa ir bolos ting na papar Masedonia pa papar Akaia. Pa i atongi mange, “Ning ia kar han pas saot e Jerusalem, ar han kale uto e Rom.” 22 I sune nigon e Timoti pa e Erastus utumo e Masedonia. Dia naur a halinla ning la sira nangani. Pa e Pol i kes kaba to na papar Esia.

23 [i]Ana pukakiarla ning, a tnan mamahat i hanot, anasa a taraila bel la mang sur a Ngas anuna Leklek. 24 Ning a barsan a risana e Demitrius, a tena tol manar ana silwa. I toltol a nanatar a rumai lotu ane Artemis a hane na god, ana silwa. Pa titol ne i tol otnan a tnan mani ane Demitrius pa tarai a titol. 25 I ben taum pas anuna tarai a titol, pa dingla na tarai otleng ning anunla na titol i arlar, pa i atai la mange, “Taraila, mulo tasmani mang dala sira tol otnan a tnan mani miting na titol ne. 26 Te e Epeses, pa ting na hananuala rop te na papar Esia, a barsan ne, e Pol, ka ben rongon pas a galis a tarai. I atai la mang a ututnala ne dala sira toli ana kundala, bel a godla. 27 Ning a utna ne ir hanot tetek dala, bel ir alaulau ka a wakak a risana nundala titol, lar nuk anatarna pas otleng a rumai lotu ane Artemis a hane na god, pa lar anatarna pas a risana. Anundala a god, ning onone a tarai Esia rop pa rakrakan hanua otleng la lotu teteki.”

28 Ning la longor a utna ne, la balakut kol, pa la warwara kol mange, “Artemis anuna tarai Epeses, i itna kol!” 29 [j]Pa taraila rop miting na hanua ning la arsakai. La dun pa la tong akes pas e Gaius pa e Aristarkus, naur a te Masedonia ning ditol armuri ma e Pol, pa la kas taum ondiau uting na nunla tnan pukna na han taum. 30 Ning e Pol i mang sur ir kas tetek a tarai, a tarai a asaer la sairasi. 31 Pa dingla na ningnigo ana matanitu ting na papar Esia, a halalna e Pol, la saran a warwara teteki sur gong i kas uting na rumai a kiwung.

32 Pa nuknuk a kunum a tarai i loklokor. Dingla na tarai la atong ning a warwara ot, pa dingla otleng la atong maskana warwara, pa galis onla bel la tasmani mang asaning la hanot suri. 33 A tarai Juda la sugut otnan e Aleksanda tetek a kunum a tarai, pa la ben pasi usa lanigo. Pa dingla la atai i ana saning ir atongi. E Aleksanda i sairas la ana kuna, sur lar kes longoroi, pa i mang sur ir warwara alar i ot na matana tarai. 34 Ika ning a tarai Epeses la tasmani mang e Aleksanda a te Juda, bel la longor, la warwara kol ana naur a awa mange, “E Artemis anuna tarai Epeses, i leklek kol!”

35 Ning a tena tumtumus anuna hanua ning i sairas a tarai sur lar kes longoroi, i atai la mange, “A tarai Epeses, esi na hanua kane ning bel i tasmani mang a tarai mite e Epeses la tai alar a rumai lotu anuna tnan god Artemis, pa manarna otleng ning i punga purum misaot na langit? 36 Bel tik ir puai ana ututnala ne, i wakak ning mulor kes longoroi pa gong mulo tol oros. 37 Mulo ka ben tar naur a barsan ne ute, ika bel dia kinkinau ting na rumai lotula, pa bel dia atong laulau anundala a hane na god. 38 A keskes a warkurai pa a tena warkuraila kanet. Ning e Demitrius pa tena titolla ning la armuri, la mang sur lar tiu tik on ta utna, lar atai a keskes a warkurai onoi. Pa la, lar atostos a warkurai onoi. 39 Ning ta utna kaning ot mulo mang sur mulor warwara ono, dir atostosi ot ting na kiwung na hanua. 40 Sakana dir tiu dala ana mamahat ning i hanot ana pukakiar ne. Pa asa ma dalar atong alar dala ono? Anasa bel ta kamkamna.” 41 Ning ka atong tari larning, i sune sauran sen a taraila kusun a kiwung.

<- Aposel 18Aposel 20 ->