A titolla anuna

Aposella
A warwara talapor nigo
A buk ne, e Luk i tumusi. I han taum ana nuna ningnigo na buk ning i tumusi, a Wakak a Warwara oe Iesu Karisito. Ting na buk Aposel dala oroi mang a Talngan Tabu i arakrakai a kakak a asaerla sur lar warawai ana Wakak a Warwara oe Iesu.
A buk ne i warwara ana lotu ane Karisito, ning i turpasi tumo na papar Judia pa lamur i han sarara uting na pukpuknala rop ting na rakrakan hanua. A ningnigo na te Karisito, la miting na tarai Juda ka. La nuki mang a lotu ane Karisito anunla ka, pa bel anuna tarai masik otleng. Ika lamur e God i asangani mang a lotu anuna taraila rop (Aposel 10). A te Karisitola miting na tarai Juda la mang sur a te Karisitola ning bel a tarai Juda la otleng lar mur a warkuraila ting na lotu Juda. A kot talilis a palaona kaklik barsan, i ning a warkurai ning la mang sur a tarai masik otleng lar muri. Ika ning la kes taum ana tnan kiwung la warkurai pasi mang dingla na warkuraila ka a te Karisitola ning bel a tarai Juda lar muri (Aposel 15).
Ning a tnan utna ning a buk ne i warwara onoi, a titol anuna Talngan Tabu, a inguna e God. A Talngan Tabu i hanot nigo tetek a tarai a asaer ane Iesu ana pukakiar a Pentikos. A Talngan Tabu ot i nigon a nuknukinla pa i saran a rakrakai tetek la.
Ona dingla na tinan ane Pol e Luk i han taum onoi (Aposel 16:10-17; 20:5-21; 27:1—28:16).
A tinan ana buk Aposel:
A ararop a warwara ane Iesu tetek a kakak a asaerla (1:1-26)
A kakak a asaer la warawai saot e Jerusalem (2:1—8:3)
A kakak a asaer la warawai tumo na papar Judia pa papar Samaria (8:4—12:25)
A ningnigo na tinan ane Pol (13:1—14:28)
A kiwung anuna aposella saot e Jerusalem (15:1-35)
A munaur a tinan ane Pol (15:36—18:22)
A munatol a tinan ane Pol (18:23—21:16)
Di akas tar e Pol uting na karabus saot e Jerusalem (21:17—23:22)
E Pol i kes tumo e Sisaria (23:23—26:32)
E Pol i han utumo e Rom (27:1—28:30)

1-3 [a]Tetek e Tiopilus,

Ana nuk a ningnigo na buk a tumus a ututnala rop ning e Iesu ka tol tari, pa ka asaer tar a taraila onoi, turpasi ana kamkama titol anunai, tuk ana pukakiar ning e God i los pasi usaot na langit. Lamur tan anuna minat, i hananot ulak tetek anuna aposella, pa a ututnala ning i toli i amomol tari mang ka laun ulak kusun a minat. Diat a bonot a pukakiar ning i kes ulak pasi te lapiu, i sira hananot tetek la, pa i warwara ana matanitu ane God. I asaer tar anuna aposella ana rakrakai ana Talngan Tabu, a aposella ning ka aslang pas la. 4 [b]Ona ning a pukakiar miting na pukakiarla ning, ning ka kamtur ulak kusun a minat, la hangan taum pa i sairas la mang, “Gong mulo han kusun e Jerusalem, mulor kes nanan esaning e Tata ka lele tar onoi, ning ia ka atai tar mulo ono. 5 [c]E Jon i baptais ana malum, pa bel i bongnani ning dir baptais mulo ana Talngan Tabu.”

E Iesu i han kas usaot na langit

6 [d]Ning a aposella la kes taum oe Iesu, la dekeni mang, “Leklek, onone ur saran ulak a matanitu tetek mila, a tarai Israel, sur milar kes langolango kusun a matanitu Rom?”[e] 7 [f]I keles la mange, “Bel a utna anumuloi sur mulor tasman a pukakiar pa rau ning e Tata i warkurai tari sur ir sarani ono. 8 [g]Ning a Talngan Tabu ir kes omulo, mulor kibas a rakrakai, pa ututnala ning mulo oroi tak mulor warwara talapor ono saot e Jerusalem, pa ting na hananuala rop tumo na naur a papar Judia pa e Samaria, pa ting na rakrakan hanua rop.”

9 Ning i arop anuna warwara, e God i los kas pasi usaot na langit na matmatanla. Lamur a laukap i poroi alari kusun la.

10 Kaning ot la tadai murmur e Iesu, ning i han kusun la usaot na langit, naur a barsan dia mermer taum ana kokok a kaenla, dia turot kakat ting na risinla. 11 [h]Pa dia atongi mang, “A tarai Galili, sur asaning mulo tur pa mulo tadai tikin usaot na langit? E Iesu ning di ka los pasi kusun mulo usaot na langit, ir hanot ulak ute, larotne mulo ka oroi i, ning i han usaot.”

E Matias i keles e Judas Iskariot

12 [i]Lamur a aposella la ulak usaot e Jerusalem, misaot na mangir di atongi a Mangir Oliw. I milau ka e Jerusalem, i arlar ka ana takai a kilomita. 13 [j]Ning la hanot saot e Jerusalem, la kas usaot na tuka rumai, ning la borborbor pa la keskes ia. La ne, la kes taum tingia: E Pita, Jon, Jems, Endru, Pilip, Tomas, Batolomiu, Matiu, Jems a nat e Alpius, e Saimon ning tagun a kunum Silot, pa e Judas, a nat a maskan a Jems. 14 La taum ma e Maria, e tana e Iesu, pa na tastasna e Iesu, pa dingla na gurarala otleng. La rop bel la manah ona niaring ana pukakiarla.

15 Ona ning a pukakiar na arpotor tana pukakiarla ning, a tena tortorotla la kes taum, la rop la arlar ana takai a mar pa pisir naur a bonot. E Pita i tur pa i atongi mang, 16 [k]“Na tastasikla, a warwara anuna Talngan Tabu, ning e Dewit i warwara tar onoi nating ting na Buk Tabu, onone di ka tolsot pasi. I warwara oe Judas esaning i nigon la ning la tong pas e Iesu. 17 I ning a halimila, pa i arnangai ana titol ne.”

18 [l]E Judas i lou pas ning a puka kabalapiu ana mani tagun anuna toltol laulau. Tingia na nuna kabalapiu i punga purum, pa balana i tapuros potor, pa suan na balana i purum rop. 19 La rop ning la kes tisa e Jerusalem, la longori, pa la atong a kabalapiu ning ana nunla warwara mang Akeldama, a kamkamna mange, a kabalapiu a suluk.

20 E Pita i atongi mang, “Di ka tumus tari ting na Saksakla ane Dewit mang,

‘Anuna rumai ir belbel,

pa gong tik i kes tingia.’ Buk Song 69:25

Pa di tumusi otleng manglarne,

‘Tik ir kelesi ana nuna titol.’ Buk Song 109:8

21-22 [m]I wakak ning dalar aslang pas ta barsan sur i otleng a tena warwara talapor taum ondala oe Iesu, ana nuna kamkamtur ulak kusun a minat. I wakak ning ta halindala, ning dala keskes taum oe Iesu. A barsan ning i kes taum ondala turpasi ning e Jon i baptais tuk ana pukakiar ning di los pas e Iesu kusun dala usaot na langit.”

23 Pa la atong otnan pas naur: E Josep, di atongi e Barsabas, pa ning a risana otleng e Jastus, diau ma e Matias. 24 Pa la araring mang, “Leklek, u tasman a balana taraila rop, ur asangan mila, esi na halindiau momol ning u ka aslang tari, 25 sur ir kibas a titol na aposel, ning e Judas ka mat pas kusuni pa ka han uting na hanua ning i arlar taum ana nuna toltol laulau.” 26 Pa la tol a titol na aslang ana naur a hat, pa hat ane Matias i hanot. Pa la was taman e Matias tetek ning a bonot pa pisir takai a aposella.

Aposel 2 ->