A Munatol a Pas
ane
Jon
A warwara talapor nigo
A buk ne e Jon i tumusi. I tumusi tetek ning a tena tortorot a risana e Gaius. I atong wakak teteki anasa i nangan a tena titol ning la han ana Wakak a Warwara. I warwara otleng ana ning a barsan a risana e Diotrepe, ning anuna toltol bel i wakak.
A tinan ana Munatol a Buk ane Jon:
A kamkama buk ne (1-4)
E Jon i gas o e Gaius (5-8)
A toltol ane Diotrepe bel i wakak (9-10)
A toltol ane Demitrius i wakak (11-12)
A ararop na warwara (13-15)

1 Iau, e Jon, a ningnigo, a tumtumus tetek u, a halik e Gaius, ning a mang kol sur u ana momolna.

2 Halik, a nunung sur anuma keskes ir wakak pa ur laun wakak, larning a ingum i laun wakak. 3 A gas kol ning dingla na tastasindala la hanot, pa la warwara talapor hom mang u mur momol a momolna, pa u laun onoi. 4 Ana nuk a longlongor mang na natnatuk la laun ana momolna, a gas kol, pa bel ta utna ulak ir aleklek anuka gasgas.

A harnangai tetek a tastasindala ning la han ana Wakak a Warwara

5 Halik, u momol ana titol ning u toli tetek na tastasindala, ning la wasira tetek u. 6 Pa dingla tagun la, la warwara talapor tetek a tarai a lotu ana num a marmaris. Pa i wakak ning ur nangan la anal utna ana nunla tinan. A toltol ne e God i gas onoi. 7 La han ana risana e Karisito, pa bel la kibas harnangai tana taraila ning bel la tortorot. 8 Manglarning i wakak sur dalar nangan a ngas a tarai ning, sur dalar titol taum sur a momolna.

A lalaun ane Diotrepe pa e Demitrius

9 Ia ka tumus tar a pas tetek a tarai a lotu, ika e Diotrepe ning i mang kol sur ir ningnigo anumulo, bel i longor pas mila. 10 Pa ning ar hanot, ar atai mulo ana ututnala ning i toli, i warwara kumkumna omila. Pa bel i ka i ning, i otleng ne, bel i gasgas pas na tastasindala ning la hanot ana Wakak a Warwara, pa i sairas la ning la mang sur lar gasgas pas la pa i kepsen la kusun a lotu.

11 Halik, gong u oroi asasaer ana toltol laulau ne, ur mur a wakakna. Esining i tol a wakakna, ai anune God. Pa esining i tol a laulauna, bel i tasman e God.

12 A taraila rop la warwara talapor o e Demitrius, mang a wakak a barsan, pa anuna momol a asasaerla otleng i warwara talapor onoi. Mila otleng mila warwara talapor onoi, pa u tasmani mang anumila na warwara i momol.

A ararop a warwara

13 A galis a utna ning ar tumusi tetek u, ika bel a mang sur ar tumtumus tetek u ana pen. 14 Ika a nuki mang ar pastek u par awara u.

15 A bal molmol tetek u. Na halalim mite, la saran anunla marmaris tektek u. Pa u otleng ur saran anuka marmaris tetek na halalindau rop ning la kes tingia.