1 [a]A mang sur mulor longor anuk siklik longlong a warwara. A tasmani mang mulor longor iau. 2 A tai alar mulo, anasa e God i mang sur mulo anunai ot. Ia ka aslang tar mulo sur mulo ane Karisito, arlar ana totoh a basbas ning belot i kes taum ana ta barsan. 3 [b]Ika onone, a matmataut sakana dir ben rongon a nuknukimulo kusun anumulo a toltol ning bel ta dur onoi, pa anumulo a tortorot momol oe Karisito, arlar ana soi i asongo pas e Iwa. 4 [c]Anasa mulo sira gas sur mulor longor tik ning i hanot tetek mulo pa i warawai ana maskana Iesu, bel e Iesu ning mila warawai ono. Pa mulo sira gas ka sur dir tabar mulo ana maskana ingun, bel a Talngan Tabu. Pa mulo sira gas ka sur mulor longor a maskana Wakak a Warwara, bel a Wakak a Warwara ning mulo ka tortorot ono.

5 [d]Bel a natarna tanla ning mulo atong la na tatatnan aposella. 6 [e]Sakana mulo nuki mang bel a asaer pas sur a tena warawai, ika a tasman ot asaning a warawai ono. Mila ka atalapor tar mulo ana tastasmai rop ne ana ututnala rop mila toli.

7 [f]Mangmangasa, a rongo anasa bel a nunung mulo sur ta mani ning a warawai ana Wakak a Warwara tetek mulo? A anatarna pas iau ot napirimulo, sur mulo, mulor itna. 8 [g]A los a mani miting na tarai a lotu ting na dingla na hanua masik, sur ir nangan iau ana nuk a titol na arpotor tamulo. I arlar larning a kinau anunla a mani sur ar titol tetek mulo. 9 Ning a kes taum omulo pa a kapan sur ta utna, bel a saran ta mamahat tetek mulo anasa na tastasimila ana tortorot misaot e Masedonia la hanot, pa la tabar iau ana utna ning a kapan suri. Bel a nunung tar mulo, pa bel ar nunung tar mulo otleng sur ta utna. 10 Momol, a momolna ane Karisito i kes omila, pa a atai mulo ana momolna mang, bel tik ting na papar Akaia ir sairas sot pas iau sur gong a iaunan iau ana nuk a toltol ne tetek mulo. 11 Ning bel a nunung mani tamulo, mangasa, i apuasa i mang bel a mang sur mulo? E God i tasmani mang a mang kol sur mulo!

12 Ar tol liknan a ututnala ne a toli, sur la ning la atong la mang na aposel, lar tasmani mang anunla a titol bel i arlar ana numila a titol. I maining bel ta kamkamna sur lar iaunan la ana nunla titol. 13 Anasa a taraila ning, a asasongo na aposella, a asasongo na tena titolla, pa la lingir pas la sur lar arlar ana aposella ane Karisito. 14 Bel dalar kulkulan onla, anasa e Satan otleng i sira lingir pasi sur ir arlar ana angelo tagun a talapor. 15 Pa bel dalar kulkulan otleng, ning anuna tena titolla lar lingir pas la sur lar arlar ana tena titolla tagun a tostos a toltol. Lamur lar kibas anunla na arlou, arlar ot ana nunla na laulau a titol.

16 Ar atong ulaki mang gong mulo nuki mang iau a longlong. Ika ning mulor nuki hok manglarne, mulor noren tar a longlong ne sur ir iaunan pasi ot. 17 A momolna, ning a iaunan pas iau ot, bel a warwara arlar ana nuknuk anuna Leklek, a warwara ka arlar ana longlong. 18 A galis a tarai la iaunan pas la arlar ana toltol mite na rakrakan hanua, i maining iau otleng ar iaunan pas iau ot. 19 Mulo noren tar ka na longlong a tarai sur lar asaer mulo, anasa mulo tastasmai kol. 20 Momol, mulo noren la sur lar suah tar mulo sur mulo na tena titol oros ka anunla, pa sur lar alaulau mulo, pa lar arop sen anumulo na ututnala, pa lar aitna pas la na matamulo, pa lar pasar na patarimulo. 21 [h]A meme kol ning ar atongi mang mila ot bel al rakrakaimila sur milar toli manglarne!

A ututnala ning la iaunan pas la ono, iau otleng a tolsot pasi sur ar iaunan pas iau ono. Onone a warwara arlar lar a longlong. 22 La atong aitna pas la mang la na te Hibru, gepi? Iau otleng a te Hibru. La miting na tarai Israel, gepi? Iau otleng a te Israel. La na natnat e Abaram, gepi? Iau otleng a nat e Abaram. 23 [i]La na tena titolla ane Karisito, gepi? Iau a wakak a tena titol tanla rop. A warwara arlar lar a longlong. A titol rakrakai kol tanla rop, ia ka kes pas ting na karabus a galis a taim, na harumla di toli hok i rakrakai kol, a galis a pukakiar milau ar mat. A ututnala rop ning di toli hok i itna tana utna ning di toli onla. 24 [j]A tarai Juda la dapis a intauruk arlar ana natol a bonot pa pisir siuk a dapdapis. I arlar ana mundilima rop ning la toli hok. 25 [k]Di wolot iau muntakai ana hatatla. A tarai Rom otleng la dapis iau a galis a taim ana bulse. La toli munatol hok.[l] Pa a hirua munatol ana sip tisa latasi.[m] Pa ning a pukakiar na morom pa ning a pukakiar a kamis a saler ana solsol a tasi.

26 [n]Ia ka han pas ana galis a tinan. A arlar ana utna na hinirua ana tinan ana malumla, pa dingla na taim milau ar hirua ting na kuna tena kinkinaula. Milau ar barat a hinirua tan anuk a tarai ot, pa a tarai masik otleng. Milau ar barat a hinirua ting na hananuala, pa ting na hanua bel, pa tisa latasi. Pa milau otleng, ar hirua tana asasongo na tastasik ana tortorot. 27 A rakrakai pa a titol rakrakai. Pa galis a taim bel a tolsot sur ar borbor. A galis a taim a mos pa murak. A galis a taim bel a ien ta utna. Pa dingla na taim a kapan sur a kaen pa a kilang a kotkoto.

28 Ika ning a utna i itna kol tana ututnala ne i hanot tetek iau: anuk a tai alar tetek a tarai a lotu ting na hananuala rop i mamahat kol te na nuk a lalaun ana pukakiarla rop. 29 Ning tik anuna tortorot bel i rakrakai, iau otleng ar kilangi larne. Ning tik di ka ben tari uting na toltol laulau, ir itna kol anuk a balmaris ono.

30 Ning ar iaunan pas iau, ar iaunan pas iau ka ana ututnala ning i apuasa i mang, bel al rakrakaik. 31 E God, a Taman a Leklek e Iesu, ning dalar atong aleklek pasi pa bel ir rarop, i tasmani ot mang a atong a momolna. 32 [o]Tumo na hanua Demaskas, a ningnigo miting na hanua ning, ning i titol nahai a king Aretas, i atur tar na tena tai alar ting na taman a woroh, sur lar dat pas iau. 33 Ika di alorong purum iau ana rat, misaot na windo na woroh, pa alah a kuna ningnigo ning, pa laun.

<- 2 Korin 102 Korin 12 ->