A Ningnigo na Pas
ane Pol tetek
e Timoti
A warwara talapor nigo
A pas ne a ningnigo na pas ane Pol, tetek e Timoti. E Timoti mito na papar Esia. E tana a hane Juda pa e tamana a te Grik. Ning e Pol i han ana nuna areur a tinan, i aslang pas e Timoti sur diar armuri pa diar titol taum (oroi Aposel 16:1-3). Lamur e Pol i aslang pas e Timoti sur ir tena tai alar ana lotu to e Epeses.
Te na pas ne, e Pol i atai e Timoti mang ir tai alar a lotu kusun a asasongo na tena asaerla, sakana lar alaulau a tortorot anuna taraila. I atai i otleng ana wakak a asaer, pa i atai i ana si na ngas a taraila dir aslang pas la sur lar tena titol ana lotu, pa ana wakak a toltol ning ir muri.
A tinan ana Ningnigo na Buk Timoti:
A kamkama buk ne (1:1-2)
E Timoti ir sairas a asasongo na asaerla (1:3-20)
A ngas ana lotu (2:1-15)
A ningnigola ana lotu (3:1-16)
E Timoti ir tai alari, sur ir hanot a wakak a tena titol (4:1-16)
A asaer tetek e Timoti ana nuna titol (5:1—6:21)

1 Iau e Pol, ning e God pa e Karisito Iesu dia sune iau sur ar aposel ane Karisito Iesu. E God anundala Tena Alaun pa e Karisito Iesu, esaning dala harnanai suri ana tortorot. 2 [a]A tumus a pas ne tetek u Timoti, a natuklik momol ana tortorot. A marmaris, a wakak a toltol pa balmolmol ta e God, a Tamandala, pa e Karisito Iesu anundala Leklek, ir kes taum hom.

E Timoti ir sairas a asasongo na asaerla

3 Onone a arakrakai u kale sur ur kes ot ting e Epeses, larning a atong tari tam ning a han utumo e Masedonia. Ur kes sur ur sairas la ning la asaer a taraila anal asasongo na asaer. 4 [b]Pa gong la molot ana asaerla oros ka, pa ana ususrai ana mangis a tarai, ning bel ta araropna. I tol otnan ka a arlak, pa bel i arnangai ana titol ane God. A titol ane God i gomo ka ana tortorot. 5 A atongi manglarning, sur a marmaris ir itna artalai na arpotor indala. A marmaris ning i han miting na totoh na balandala, pa nuknukindala ning bel ta rongo na mata e God, pa tortorot momol. 6 Dingla na tarai la ka han masik kusun a wakak a toltol ne, pa la mur kama a warwara orosla. 7 La mang sur lar asaer a taraila ana Warkuraila ane God, ika bel la tasman asaning la warwara onoi, pa kamkama warwara ning la nuki mang la tastasman onoi.

8 [c]Dala tasmani mang a Warkuraila la wakak, ning tik ir titol wakak onoi. 9 Dala tasmani mang a Warkuraila bel di sarani sur a tena tostos. Di sarani ka sur a ngas a taraila mange: la ning la kutus warkurai, a tabun longorla, la ning bel la lotu tetek e God, a tena tol laulaula, la ning bel la mur a nuknuk e God, la ning la mur a toltol mite na rakrakan hanua, la ning la umkol a taraila, pa la ning la umkol na tamtamanla pa na kabatnanla, 10 la ning la tol a pamuk a toltol, a taraila ning la taulai ulak ka a taraila, la ning la tong akes pas a taraila sur lar siuran la, a tena asasongola, la ning la lele asasongo, pa la rop ning la tol a ututnala ning bel i arlar ana tostos a asaer ane God. 11 A tostos a asaer i kes ana Wakak a Warwara, ning e God i saran tari tak sur ar atatai onoi. A Wakak a Warwara ne ane God, a God na matatar, esaning i angis tikin.

A warwara gasgas ana marmaris ane God

12 [d]A atong wakak tetek e Karisito Iesu anundala Leklek, esaning i tortorot hok pa i saran tar a rakrakai tak, pa i aslang pas iau sur ar titol teteki. 13 [e]Nating a sira atong laulau e Iesu, a alaulau a taraila ning la tortorot pa akadik la. Ika e God i maris iau, anasa bel a tasman a utna ning a toli, pa belot a tortorot. 14 Anundala Leklek i pek anuna tnan marmaris hok, pa i tabar iau ana tortorot pa ginina ning ar mang sur a tarai. A artabar ne i kamkamna oe Karisito Iesu.

15 [f]E Karisito Iesu i han purum ute na rakrakan hanua sur ir alaun a tena laulaula. A warwara ne i momol kol, pa dalar tortorot onoi. Pa iau, a laulau kol tana tena laulaula rop. 16 Ika e God i maris iau, sur e Karisito Iesu ir asangan anuna wowon a toltol tetek iau, ning i alaun pas iau pa i kepsen anuk a toltol laulaula. Pa i tol a toltol ne hok, sur a taraila otleng lar oroi pa lar tortorot ono, pa lar kibas a lalaun tikin. 17 Dalar hanrawai a King ning i laun tikin, pa dalar atong aleklek pasi. Esaning bel dala oroi, pa i ka e God. A aleklek ne bel ir rarop. Amen.

18 E Timoti a natuklik, a asaerla ne a sarani tam, i arlar ana warwara na propet ning di ka atong tari hom ning la araring sur u. Ning ur mur a asaerla ne, u ning a wakak a tena harum ana Wakak a Warwara. 19 Ur tur rakrakai ana num a tortorot, pa ur mur a nuknukim ning bel ta rongo na matana e God. Dingla na tarai bel la toli larne, pa anunla tortorot i hirua arlar ana sip ning a top i dapis regen seni pa i murung. 20 [g]E Himeneus pa e Aleksanda naur a halinla, ning ia ka saran tar diau na kuna e Satan, sur diar tasmani mang gong ulak ma dia atong laulau e God.

1 Timoti 2 ->