1 [a]Oroi! E Tamandala i asangan anuna tnan marmaris tetek dala, ning i atong dala mang dala na natnatnala. I momol ot, dala na natnat e God. A tarai mite na rakrakan hanua bel la tasmani mang dala na natnat e God, anasa bel la tasman e God. 2 [b]Na halalik, onone dala na natnat e God, pa belot di atalapor dala mang lamur dalar mangmangasa. Ika dala tasmani mang, lamur ning e Iesu ir hanot, dalar arlar onoi, anasa dalar bot oroi momoli. 3 Esining i harnanai ana tortorot sur e Karisito ir ulak, i atotohi larning e Karisito i totoh.

4 Esining i tol a toltol laulau, bel i mur a warkurai ane God, anasa a toltol laulau i a tabun longor ana warkuraila. 5 [c]Pa mulo tasmani mang e Karisito i hanot sur ir kepsen anundala na toltol laulau, pa i ot bel anuna ta toltol laulau. 6 Pa esining i laun oe Karisito, bel i sira tol a toltol laulau. Pa esining i sira tol a toltol laulau, bel i oroi e Karisito, pa bel i tasmani otleng.

7 Na natnatukla, gong mulo noren tar tik ir ben arongon mulo. Esining i tol a tostos a toltol, i tostos arlar oe Karisito. 8 [d]Pa esining i tol a toltol laulau, i ane Satan, anasa e Satan i tol a laulauna turpasi ot ana turturkamna. Pa Nat e God i hanot sur ir kamar sen a titolla ane Satan. 9 [e]La rop ning na natnat e God, bel lar tol ulak a toltol laulau, anasa a lalaun ane God i kes onla. Bel lar tol ulak a toltol laulau, anasa la na natnat e God. 10 Dala oroi lalan na natnat e God pa na natnat e Satan otleng mange: Esining bel i tol a tostos a toltol pa esi otleng ning bel i mang sur e tasnalik, bel a nat e God.

11 [f]A warwara ning, mulo longori tagun nating ot, mang dalar mang artalai sur dala. 12 [g]Pa gong dala arlar oe Kain, esaning ane Satan, pa i umkol e tasnalik e Abel. Asa kamkamna ning i umkoli? Anasa anuna toltol i laulau, pa toltol ane tasnalik i tostos.

13 [h]Na tastasikla, gong mulo kulkulan ning a tarai mite na rakrakan hanua la nget mulo. 14 [i]Dala tasmani mang dala ka han kusun a minat sur a lalaun, anasa dala mang sur na tastasindala. Esining bel al marmaris kaning ot i kes ana minat. 15 [j]Esining i nget e tasnalik, i a tena umkol a taraila, pa mulo tasmani mang a tena umkol a taraila bel i kibas a lalaun tikin.

16 [k]Dala tasman a marmaris momol mange: E Iesu Karisito i saran anuna lalaun sur dala. Pa i wakak sur dalar saran anundala lalaun sur na tastasindala. 17 [l]Ning tik, anuna al utna, pa i oroi e tasnalik i kapan, ika bel i marisi, a marmaris ane God bel i kes onoi. 18 [m]Na natnatukla, gong dala maris tik ana warwara ka, pa ana pahandala ka. Dalar maris tik ana wakak a titol momol.

19 Ning dala maris tik larning, dala tasmani mang dala anuna momolna, pa bel dalar matmataut ning dala kaningui oe God. 20 Ning a nuknukindala i tiu dala, e God i leklek tana artitiu ting na nuknukindala, pa i tasman a ututnala rop. 21 [n]Na halalik, ning a nuknukindala bel i tiu dala, bel dalar matmataut na matana e God. 22 Pa ututnala rop ning dala nunungi tana, i sarani tandala, anasa dala longor ana nuna warkuraila, pa dala tol a utna ning i gas onoi. 23 [o]A warkurai ane God i mange: Dalar tortorot ana risana e Natnalik, e Iesu Karisito, pa dalar mang artalai sur dala, arlar ana nuna warkurai tetek dala. 24 [p]Esining i longor ana nuna warkuraila, i laun oe God, pa e God i laun onoi. Pa dala tasmani mang e God i laun ondala, anasa a Talngan Tabu ning i tabar dala ono, i laun ondala.

<- 1 Jon 21 Jon 4 ->