1 Jon 2

E Karisito anundala tena harnangai

1 Na natnatukla, a tumus a ututnala ne tetek mulo sur gong mulo tol a toltol laulau. Ika ning tik ir tol a toltol laulau, anundala a tena harnangai, e Iesu Karisito a Tena Tostos, ir atalapori tetek e Tamana. 2 I ot i mat sur ir lou langolango pas dala kusun anundala na toltol laulaula, pa ir arop sen a balakut ane God, ning nating kaning on dala. Pa bel i mat sur anundala na toltol laulaula ka, a toltol laulaula anuna taraila rop te na rakrakan hanua.

3 Ning dala longor ana nuna warkuraila, dala talapor mang dala tasman ot e God. 4 Ning tik i atongi mang, “A tasman e God,” ika bel i longor ana nuna warkuraila, i a tena asasongo, pa a momolna bel i kes ono. 5 Ning tik ir longor ana warwara ane God, ir mang momol sur e God. Dala tasmani dala ane God mange: 6 Ning tik i atongi onoi mang ai ane God, ir laun arlar ana lalaun ane Karisito.

A tona warkurai

7 Na halalik, bel a tona warkurai ne a tumusi tetek mulo, a turaina, ning mulo ka longor tari tagun nating ot. A warkurai ne, mulor mang sur na tastasimulo. 8 Ika a warkurai ning, tuk onone i totoh ot. A momol ana warkurai ne di oroi o e Karisito, pa o mulo otleng, anasa a mormorom i rop amon, pa a talapor momol ka hanot.

9 Esining i atongi mang i kes ana talapor, ika i nget e tasnalik, a barsan ning kaning ot i kes ana mormorom. 10 Ika ning tik ir mang sur e tasnalik, i laun ana talapor pa bel ta utna kaning ana nuna lalaun ir tolsot sur ir apungani. 11 Ika esining i nget e tasnalik, i kes ana mormorom, pa i hanan ana mormorom, pa bel i tasmani mang i han utaha, anasa a mormorom ka sanakut pas a matana.

12 A tumtumus tetek mulo a kakakla, anasa di ka kepsen anumulo na toltol laulau ana risana e Karisito.

13 A tumtumus tetek mulo a tatatnan tarai, anasa mulo ka tasman esining i laun tagun nating ot.

A tumtumus tetek mulo a barmanla, anasa mulo ka tolsot pas e Satan.

A tumtumus tetek mulo a kakakla, anasa mulo ka tasman e Tamandala.

14 A tumtumus tetek mulo a tatatnan tarai, anasa mulo ka tasman esining i laun tagun nating ot.

A tumtumus tetek mulo a barmanla, anasa mulo rakrakai, pa a warwara ane God i kes ting na balamulo, pa mulo ka tolsot pas e Satan.

15 Gong mulo mang sur a rakrakan hanua, pa ututnala otleng ning kaning ia. Ning tik ir mang sur a rakrakan hanua, i asangani mang bel i mang sur a Tamandala. 16 Anasa a ututnala ning la kes ting na rakrakan hanua, larne a laulau a nuknuk ting na balandala, a ram sur a ututnala ning dala oroi, pa a toltol na iaunani ana gongon anundala pa anundala titol. A ututnala ning, bel i han miting ta e Tata, i hanot tagun a rakrakan hanua. 17 A rakrakan hanua pa a laulau a nuknukna lar rarop ka, ika esining i mur a nuknuk ane God, ir laun tikin.

A hiruala ane Karisito

18 Na natnatukla, onone dala kes ana ararop a pukakiarla. Mulo ka longor tari mang a hirua ane Karisito ir hanot, pa onone a galis a hirua la ka hanot. Larning dala tasmani mang a ararop a pukakiar ka milau. 19 Na hirua ane Karisito la lasan taum ondala, ika la ka han, anasa la bel tagun dala momol. Ngandek ning la tagun dala momol, lar kes tikin taum ondala. Ika anunla tinan kusun dala i asangani mang la bel tagun dala.

20 Ika mulo, e Karisito ka saran tar a Talngan Tabu tetek mulo. Pa mulo rop mulo ka tasman tar a momolna. 21 Bel a tumtumus tetek mulo kamkamna mang bel mulo tasman a momolna. A tumtumus tetek mulo anasa mulo ka tasman tar a momolna, pa a momolna bel i kamkamna on ta asasongo. 22 Esining a tena asasongo? Esaning i puai mang e Iesu bel a Karisito. Tik ning i atongi larne, ai a hirua ane Karisito, anasa i puai sen otleng e Tamana pa e Natnalik. 23 Tik ning i puai sen a Nat e God, e Tamana otleng bel i kes onoi. Pa tik ning i patuai talapor o e Natnalik, e Tamana otleng i kes onoi.

24 I wakak ning a asasaerla rop ning mulo longor tari nating ot ir laun o mulo. Ning i laun o mulo, mulo otleng mulor laun o e Natnalik, pa o e Tamana. 25 Asa ning i lele tari sur ir sarani tetek dala, a lalaun tikin.

26 A tumus a ututnala ne tetek mulo, sur ar atumarang mulo kusun la ning la mang sur lar ben rongon mulo. 27 A Talngan Tabu ning e Karisito i saran tari tetek mulo, i patap o mulo, pa bel mulo kapan sur tik ir asaer mulo. Anasa a Talngan Tabu i asaer mulo ana ututnala rop. Pa a utna ning i asaer mulo ono i momol, pa bel i asongo. Mulor nuk akes a asasaer ne sur mulor patap o e Karisito.

28 Momol, a natnatukla, mulor patap tikin o e Karisito, sur gong dala matmataut pa gong dala meme namatana ana nuna tinan ot. 29 Mulo tasmani mang e God a tena tostos, pa mulo tasmani otleng mang la rop ning la tol a tostos a toltol, la na natnat e God.

<- 1 Jon 1 1 Jon 3 ->