Link to home pageLanguagesLink to all Bible versions on this site
18
1 In finem. Psalmus David.[a]
2 [Cæli enarrant gloriam Dei, et opera manuum ejus annuntiat firmamentum.[b]
3 Dies diei eructat verbum, et nox nocti indicat scientiam.[c]
4 Non sunt loquelæ, neque sermones, quorum non audiantur voces eorum.[d]
5 In omnem terram exivit sonus eorum, et in fines orbis terræ verba eorum.
6 In sole posuit tabernaculum suum; et ipse tamquam sponsus procedens de thalamo suo. Exsultavit ut gigas ad currendam viam;[e]
7 a summo cælo egressio ejus. Et occursus ejus usque ad summum ejus; nec est qui se abscondat a calore ejus.
8 Lex Domini immaculata, convertens animas; testimonium Domini fidele, sapientiam præstans parvulis.[f]
9 Justitiæ Domini rectæ, lætificantes corda; præceptum Domini lucidum, illuminans oculos.[g]
10 Timor Domini sanctus, permanens in sæculum sæculi; judicia Domini vera, justificata in semetipsa,[h]
11 desiderabilia super aurum et lapidem pretiosum multum, et dulciora super mel et favum.[i]
12 Etenim servus tuus custodit ea; in custodiendis illis retributio multa.
13 Delicta quis intelligit? ab occultis meis munda me;[j]
14 et ab alienis parce servo tuo. Si mei non fuerint dominati, tunc immaculatus ero, et emundabor a delicto maximo.
15 Et erunt ut complaceant eloquia oris mei, et meditatio cordis mei in conspectu tuo semper. Domine, adjutor meus, et redemptor meus.]

<- PSALMORUM 17PSALMORUM 19 ->