1 Nolite judicare, ut non judicemini.[a] 2 In quo enim judicio judicaveritis, judicabimini: et in qua mensura mensi fueritis, remetietur vobis.[b] 3 Quid autem vides festucam in oculo fratris tui, et trabem in oculo tuo non vides?[c] 4 aut quomodo dicis fratri tuo: Sine ejiciam festucam de oculo tuo, et ecce trabs est in oculo tuo?[d] 5 Hypocrita, ejice primum trabem de oculo tuo, et tunc videbis ejicere festucam de oculo fratris tui.[e] 6 Nolite dare sanctum canibus: neque mittatis margaritas vestras ante porcos, ne forte conculcent eas pedibus suis, et conversi dirumpant vos.[f] 7 Petite, et dabitur vobis: quærite, et invenietis: pulsate, et aperietur vobis.[g] 8 Omnis enim qui petit, accipit: et qui quærit, invenit: et pulsanti aperietur.[h] 9 Aut quis est ex vobis homo, quem si petierit filius suus panem, numquid lapidem porriget ei?[i] 10 aut si piscem petierit, numquid serpentem porriget ei?[j] 11 Si ergo vos, cum sitis mali, nostis bona data dare filiis vestris: quanto magis Pater vester, qui in cælis est, dabit bona petentibus se?[k] 12 Omnia ergo quæcumque vultis ut faciant vobis homines, et vos facite illis. Hæc est enim lex, et prophetæ.[l] 13 Intrate per angustam portam: quia lata porta, et spatiosa via est, quæ ducit ad perditionem, et multi sunt qui intrant per eam.[m] 14 Quam angusta porta, et arcta via est, quæ ducit ad vitam: et pauci sunt qui inveniunt eam ![n] 15 Attendite a falsis prophetis, qui veniunt ad vos in vestimentis ovium, intrinsecus autem sunt lupi rapaces:[o] 16 a fructibus eorum cognoscetis eos. Numquid colligunt de spinis uvas, aut de tribulis ficus?[p] 17 Sic omnis arbor bona fructus bonos facit: mala autem arbor malos fructus facit.[q] 18 Non potest arbor bona malos fructus facere: neque arbor mala bonos fructus facere.[r] 19 Omnis arbor, quæ non facit fructum bonum, excidetur, et in ignem mittetur.[s] 20 Igitur ex fructibus eorum cognoscetis eos.[t] 21 Non omnis qui dicit mihi, Domine, Domine, intrabit in regnum cælorum: sed qui facit voluntatem Patris mei, qui in cælis est, ipse intrabit in regnum cælorum.[u] 22 Multi dicent mihi in illa die: Domine, Domine, nonne in nomine tuo prophetavimus, et in nomine tuo dæmonia ejecimus, et in nomine tuo virtutes multas fecimus?[v] 23 Et tunc confitebor illis: Quia numquam novi vos: discedite a me, qui operamini iniquitatem.[w] 24 Omnis ergo qui audit verba mea hæc, et facit ea, assimilabitur viro sapienti, qui ædificavit domum suam supra petram,[x] 25 et descendit pluvia, et venerunt flumina, et flaverunt venti, et irruerunt in domum illam, et non cecidit: fundata enim erat super petram.[y] 26 Et omnis qui audit verba mea hæc, et non facit ea, similis erit viro stulto, qui ædificavit domum suam super arenam:[z] 27 et descendit pluvia, et venerunt flumina, et flaverunt venti, et irruerunt in domum illam, et cecidit, et fuit ruina illius magna.[aa] 28 Et factum est: cum consummasset Jesus verba hæc, admirabantur turbæ super doctrina ejus.[bb] 29 Erat enim docens eos sicut potestatem habens, et non sicut scribæ eorum, et pharisæi.