INCIPIT EVANGELIUM SECUNDUM MATTHEUM

1 Liber generationis Jesu Christi filii David, filii Abraham.[a] 2 Abraham genuit Isaac. Isaac autem genuit Jacob. Jacob autem genuit Judam, et fratres ejus.[b] 3 Judas autem genuit Phares, et Zaram de Thamar. Phares autem genuit Esron. Esron autem genuit Aram.[c] 4 Aram autem genuit Aminadab. Aminadab autem genuit Naasson. Naasson autem genuit Salmon.[d] 5 Salmon autem genuit Booz de Rahab. Booz autem genuit Obed ex Ruth. Obed autem genuit Jesse. Jesse autem genuit David regem.[e] 6 David autem rex genuit Salomonem ex ea quæ fuit Uriæ.[f] 7 Salomon autem genuit Roboam. Roboam autem genuit Abiam. Abias autem genuit Asa.[g] 8 Asa autem genuit Josophat. Josophat autem genuit Joram. Joram autem genuit Oziam.[h] 9 Ozias autem genuit Joatham. Joatham autem genuit Achaz. Achaz autem genuit Ezechiam.[i] 10 Ezechias autem genuit Manassen. Manasses autem genuit Amon. Amon autem genuit Josiam.[j] 11 Josias autem genuit Jechoniam, et fratres ejus in transmigratione Babylonis.[k] 12 Et post transmigrationem Babylonis: Jechonias genuit Salathiel. Salathiel autem genuit Zorobabel.[l] 13 Zorobabel autem genuit Abiud. Abiud autem genuit Eliacim. Eliacim autem genuit Azor.[m] 14 Azor autem genuit Sadoc. Sadoc autem genuit Achim. Achim autem genuit Eliud.[n] 15 Eliud autem genuit Eleazar. Eleazar autem genuit Mathan. Mathan autem genuit Jacob.[o] 16 Jacob autem genuit Joseph virum Mariæ, de qua natus est Jesus, qui vocatur Christus.[p] 17 Omnes itaque generationes ab Abraham usque ad David, generationes quatuordecim: et a David usque ad transmigrationem Babylonis, generationes quatuordecim: et a transmigratione Babylonis usque ad Christum, generationes quatuordecim.[q] 18 Christi autem generatio sic erat: cum esset desponsata mater ejus Maria Joseph, antequam convenirent inventa est in utero habens de Spiritu Sancto.[r] 19 Joseph autem vir ejus cum esset justus, et nollet eam traducere, voluit occulte dimittere eam.[s] 20 Hæc autem eo cogitante, ecce angelus Domini apparuit in somnis ei, dicens: Joseph, fili David, noli timere accipere Mariam conjugem tuam: quod enim in ea natum est, de Spiritu Sancto est.[t] 21 Pariet autem filium: et vocabis nomen ejus Jesum: ipse enim salvum faciet populum suum a peccatis eorum.[u] 22 Hoc autem totum factum est, ut adimpleretur quod dictum est a Domino per prophetam dicentem:[v] 23 Ecce virgo in utero habebit, et pariet filium: et vocabunt nomen ejus Emmanuel, quod est interpretatum Nobiscum Deus.[w] 24 Exsurgens autem Joseph a somno, fecit sicut præcepit ei angelus Domini, et accepit conjugem suam.[x] 25 Et non cognoscebat eam donec peperit filium suum primogenitum: et vocavit nomen ejus Jesum.[y]