1 Kɛn Pɔl ute Barnabas jaay aan maakŋ gɛgɛr kɛn Ikɔniɔm ki se, naaɗe ɓaa ɛnd maakŋ *ɓee kɛn Yaudge lee tusn maak ki aan gɔɔ kɛn naaɗe tɛɗo maakŋ gɛgɛr kɛn Antiɔs ki se. Gɔtn se, naaɗe taaɗɗen taar *Raa bini ɔl naaɗen Yaudge ute kɛngen Yaudge eyo dɛnin̰ took aal maakɗe do Isa *al‑Masi ki. 2 Gaŋ Yaudgen baate tookŋ taarɗe se ɔɔs mɛtn jeegen kɛn Yaudge eyo taa je taara ro jeege tun took aal maakɗe do Isa al‑Masi ki. 3 Ute naan̰ se kic ɓo, Pɔl ute Barnabas tiŋgoga dɛna maakŋ gɛgɛr kɛn ese ɔɔ naaɗe taaɗ taar Mɛljege se jeege tu ɔɔ naaɗe taaɗɗen taa bɛɛ Raa kɛn naan̰ tɛɗɗen se, aal doɗe sɛn̰, ɓeer eyo. Ɔɔ gɔtn se, Raa ɔlɗen naaɗe tɛɗ nakŋ‑kɔɔɓge ute nakgen deel doa taa Ꞌtaaɗn jeege tu ɔɔ taar naaɗe taaɗ se, taar mɛt ki. 4 Do taarɗe ki se, jeegen maakŋ gɛgɛr kɛn ese se ɓaa gaaŋ naapa gɔtɔ kaam dio: jeegen mɛtin̰ge ɓaa mɛtn Yaudge ɔɔ kɛngen kuuy se lɛ ɓaa mɛtn jee kaan̰ naabm al‑Masige tu.
5 Gɔtn se Yaudge ute jeegen kɛn Yaudge eyo ute magalɗege se, dɔɔkga taarɗe gɛn ɓaa koocn̰ *jee kaan̰ naabm Isa al‑Masige taa aɗen tund tɔɔl ute koa. 6 Kɛn Pɔl ute Barnabas jaay booy taar ese se, bin se, naaɗe aan̰ ɓaa taa naaŋ Likaoni ki. Kɛn naaɗe jaay aan gɔtn naane se, naaɗe ɓaa tiŋg maakŋ gɛgɛr kɛn Listir ute kɛn Derbe ki ɔɔ ute naaŋge tun cɛɛs ki cɛɛs ki. 7 Kɛn naaɗe jaay aan gɔtn naane se kic ɓo, naaɗe taaɗ Labar Jigan gɛn Isa al‑Masi se jeege tu.
Pɔl ute Barnabas maakŋ gɛgɛr kɛn Listir ki
8 Maakŋ gɛgɛr kɛn Listir ki se, ɔk gaaba kalaŋ bin se gɔtn tiŋgin̰ ɓo naaŋ ki sum. Ɔɔ gaabm se, gɔtn kꞋjꞋoojin̰ tap ɓo k‑ruŋguyu; ɓii kalaŋ naan̰ lee te eyo. 9 Ɓii kalaŋ, naan̰ iŋg booy booy taar Raa kɛn Pɔl taaɗ se. Gɔtn se Pɔl ɔndin̰ kaama tak, taa naan̰ aak jeel gaabm se aalga maakin̰ do Isa *al‑Masi ki se, Ꞌkɔŋ lapia. 10 Gɔtn se, Pɔl uun mindin̰ raan ɗeekin̰ ɔɔ: «Iin̰ Ꞌɗaara!» Ɔɔ gaabm se naar iin̰ ɗaar kirit ɔɔ baag lea. 11 Kɛn jee dɛnge jaay aak nakŋ Pɔl tɛɗ se, naaɗe paac baag kul taara gajalaŋ ute taar Likaoni kɛn taar naaŋɗe se, ɔɔ naaɗe taaɗ ɔɔ: «Ɓɛrɛ, raage se dɛlga jikilimge ɔɔ bɔɔy ɓaaɗoga gɔtjege tu!» 12 Gɔtn se Barnabas se naaɗe daŋin̰ Zeus. Zeus se je ɗeekŋ ɔɔ: gaar gɛn raage. Ɔɔ Pɔl lɛ, naaɗe daŋin̰ Ɛrmɛz. Ɛrmɛz se je ɗeekŋ ɔɔ: debm taaɗin̰ bɛɗin̰a. 13 Raaɗen Zeus se, ɓeen̰ cɛɛ taa ɗoob kɛn jꞋɛnd maakŋ gɛgɛr ki se, ɔɔ debm kɛn lee tɔj sɛrkŋ maakŋ ɓee kɛn se, tɔk ɓaano ute kɔs‑taarge dio ɔɔ tamarɗeno ute pɔɔn̰ kaagge jaay ɓo ɓaanɗeno taa ɓee kɛn ese, taa naan̰ ute jee dɛnge se dɔɔkga taarɗe je tɔjn̰ *sɛrkɛ Barnabas ute Pɔl ki.
14 Gaŋ kɛn *jee kaan̰ naabm Isage, Barnabas ute Pɔl, jaay booy taar ese se, naaɗe maakɗe tuju ɔɔ nɛɛpm te kalɗege ɔɔ gɔtn se, naaɗe naar aan̰ ɓaa ɔŋ jee dɛnge se, taaɗɗen makɔn̰ɔ ɔɔ: 15 «Ay, naase ara, kɛse naase Ꞌtɛɗki nakŋ‑kɔɔɓm ɗi bini! Ɓɛrɛ, naaje se k‑jikilimge aan gɔɔ naase se sum kici. Naaje kꞋtaaɗsen Labar Jiga se taa naase anki rɛsn ute raagen rɛn̰ rɛn̰ se. Ɓɔrse, Ꞌtɛrlkiro maakse do Raa ki naan̰ kɛn tiŋg zɛɛrɛ se! Naan̰ ɓo debm aalo maakŋ raa ute do naaŋa ɔɔ aalo baar ɔɔ nakgen ɓaa se paac. 16 Do dɔkin̰ se, mɛtjil jeegen gay gay kic ɓo, Raa ɔn̰ɗen naaɗe uun ɗoobm kɛn naaɗe maakɗe jen ro ki. 17 Ute naan̰ se kic ɓo, Raa se daayum tɛɗɗen bɛɛ ɔɔ bɛɛ kɛn naan̰ lee tɛɗɗen se, naan̰ eeɗɗen maane oojɗen nakɗege ɔɔ ɛɗɗen kɔsɔ ute maraadin̰a ɔɔ raapɗen maakɗe sakan̰.»
19 Kɛn nakgen se jaay deel se, Yaudgen iin̰o Antiɔs ki ɔɔ kɛngen mɛtin̰ge iin̰o Ikɔniɔm ki ɓaaɗo Listir ki ɔɔ ɔɔs mɛtn jee dɛngen gɔtn ese ɔɔ taaɗɗen taar Pɔl ute Barnabas taaɗ se, taar mɛt ki eyo. Gɔtn se, Pɔl naaɗe tundin̰ ute koa ɔɔ tiik teecn̰sin̰ naatn maakŋ gɛgɛr ki se ɔɔ ɓaa undin̰ naata, naaɗe saap ɔɔ kaaɗ naane, naan̰ ooyga. 20 Num kɛn gɛnaagen ɗoobm Isa al‑Masi ki jaay ɓaaɗo tus gurugin̰ se, gɔtn se Pɔl iin̰ ɗaara ɔɔ ɔk tɛrl ɓaa maakŋ gɛgɛr kɛn Listir ki. Mɛtbeen̰ki se, naan̰ ute Barnabas iin̰ gɔtn ese ɔɔ ɓaa Derbe ki.
Pɔl ute Barnabas ɔk tɛrlo Antiɔs kɛn taa naaŋ Siri ki
21 Kɛn naaɗe jaay aan maakŋ gɛgɛr kɛn Derbe ki se, Pɔl ute Barnabas taaɗ Labar Jigan gɛn Isa *al‑Masi se jeege tu. Gɔtn se, jeege dɛna took aal maakɗe do Isa al‑Masi ki. Naaɗe iin̰ ɔn̰ gɔtn ese, ɔk tɛrl ɓaa maakŋ gɛgɛr kɛn Listir ki ɔɔ Listir ki se naaɗe iin̰ ɓaa maakŋ gɛgɛr kɛn Ikɔniɔm ki ɔɔ Ikɔniɔm ki se, naaɗe iin̰ ɓaa maakŋ gɛgɛr kɛn Antiɔs ki kɛn taa naaŋ Pizidi ki. 22 Maakŋ gɛgɛrge tun, naaɗe aanga tak ɓo naaɗe ɛɗɗen kaay kaama jeege tun aalga kaal maakɗe do Isa al‑Masi ki ɔɔ taaɗɗen ɔɔ ɗoobm Isa al‑Masi ki se jꞋɔkin̰ tɔɔgɔ ɔɔ tɛr taaɗɗen ɔɔ: «Naajege se, jꞋutu jꞋaki dabar dɛn jaay ɓo jꞋaki kɛnd *maakŋ Gaar Raa ki.» 23 Gɔtn kɛn naaɗe aanga jaay ɔŋga *egliz se, naaɗe bɛɛr tɔndɗen jeegen Ꞌtɛɗn naanɗege. Gɔtn se, naaɗe uun *siam ɔɔ eem Raa jaay ɓo, jee se naaɗe ɔn̰ɗen kaam ji Mɛljege Isa al‑Masi kɛn naaɗe aal maakɗe don̰ ki se.
24 Gɔtn se, Pɔl ute Barnabas ɓaa ɓaa se, naaɗe aal teeco taa naaŋ Pizidi jaay ɓaaɗo taa naaŋ Pampili ki. 25 Kɛn naaɗe jaay aan maakŋ gɛgɛr kɛn Pɛrg ki se, naaɗe taaɗ taar Raa jeege tu jaay iin̰ ɔn̰ gɔtn ese ɔɔ ɓaa maakŋ gɛgɛr kɛn gɔtn kꞋlee kꞋɗaar markabge ɔɔ gɛgɛr se ron̰ Atalia. 26 Naaɗe iin̰ maakŋ gɛgɛr kɛn ese, ook maakŋ markab ki uun ɗoobm gɛn tɛrl maakŋ gɛgɛr kɛn Antiɔs kɛn taa naaŋ Siri ki. Gɔtn se ɓo, mɛtn‑jiki naaɗe iin̰o ro ki ɔɔ maakŋ gɛgɛr kɛn ese ɓo, jee Raage ɔn̰ɗeno kaam ji Raa taa Ꞌtɛɗn naabm kɛn ɓɔrse naaɗe tɛɗ aasin̰oga se. 27 Kɛn naaɗe jaay aan Antiɔs kɛn taa naaŋ Siri ki se, Pɔl ute Barnabas daŋ tus jee egliz ki. Gɔtn se, naaɗe taaɗɗen mɛtn taar nakgen kɛn Raa ɔlɗen naaɗe tɛɗo se ɔɔ tɛr taaɗɗeno ɔɔ: «Ɓɔrse se, Raa ɔɔɗga ɗoobo jeege tun Yaudge eyo taa kaal maakɗe do Isa ki kici.» 28 Gɔtn se, naaɗe tiŋgoga dɛna ute gɛnaagen aalga kaal maakɗe do Isa ki.
