1 Anum kɛn naaje jaay jꞋɔŋ te labarse ey se, jꞋɔŋ jꞋaasin̰ te eyo, naaje kꞋjꞋuuno doa gɛn kɔɔpm kiŋg maakŋ gɛgɛr kɛn Atɛn ki kalje ki, 2 ɔɔ Timote se ɓo naaje kꞋjꞋɔlin̰o gɔtse ki. Timote se naan̰ gɛnaaje ɔɔ naaje kꞋtɛɗ naabm *Raa kalaŋ. Labar Jigan gɛn Isa *al‑Masi se, naaje kꞋtaaɗin̰ jeege tu tɛlɛ. Naaje kꞋjꞋɔlin̰ gɔtse ki se taa asen noogo ɔɔ asen kɛɗn kaay kaama ɔɔ taa naase aki kiŋg tɔɔgɔ ɗoobm al‑Masi ki. 3 Bin ɓo, dubargen aan ɓɔrse dose ki se asen kɔŋ kɔl naase anki rɛsn ute ɗoobm Raa eyo. Taa naase mala kic Ꞌjeelin̰ki, dubargen bin se, utu Ꞌkaan dojege tu. 4 Kaaɗ kɛn naaje kꞋjꞋiŋgo gɔtse ki se, naaje kꞋtaaɗsenoga jꞋɔɔ naajege se jꞋutu jꞋajenki dabara ɔɔ nakŋ se aanga dojege tu ɔɔ naan̰ ese se, naase kic Ꞌjeelin̰ki. 5 Taa naan̰ se ɓo, maam mꞋɔŋ mꞋaasin̰ te gɛn kiŋg booy dɛn eyo, maam mꞋɔlsen Timote, taa ɓaa gɔtse ki taa amo ɓaa ute labarse, naase utu iŋgki do kaal maakse ki se ɗey la? Maam mꞋɓeer mꞋɔɔ sɔm daan naane *Ɓubm sitange naamsenga ɔɔ ute naan̰ se naabjen kꞋtɛɗ daanse ki se Ꞌkutn cɛrɛ.

6 Ɓɔrse, Timote kɛn iin̰o gɔtse ki se aan ɔŋjenga ɔɔ naan̰ ɓaanjenoga ute labar jiga gɛn kaal maaksen do Raa ki ɔɔ gɛn maak‑je kɛn naase ɔkki ute naapa. Naan̰ taaɗjen ɔɔ daayum naase utu Ꞌsaapki doje ki jiga, ɔɔ je ajeki kaaka aan gɔɔ naajen kꞋje jꞋasen kaak se kici. 7 Bin num gɛnaamge, maakŋ nakge tun ɔɔn̰ɔ ute dubargen aan dojege tu paac se, naase ɛɗjekiga kaay kaama ute kaal maakŋ naasen aalki do Mɛljege tu se. 8 Ɓɔrse naase utu iŋgki tɔɔg ɗoobm Mɛljege tu se, taa naan̰ se naaje kic kiŋgje tɛɗga jiga. 9 Naaje jꞋɔk taar kɛn Ꞌkaasn jaay jꞋan tɔɔm Raa se tap ɓo gɔtɔ, taa maak‑raapm kɛn naaje jꞋɔko taa naase naan Raa ki. 10 Nɔɔrɔ katara naaje kꞋtɔnd mɛtin̰ te maakje paac, taa ajen kɔɔɗn ɗoobo tɛr jꞋasen ɓaa kaaka ɔɔ jꞋaseno dooy nakŋ kɛn naase Ꞌjeelki te mɛtin̰ ey ɓɔrtɔ ɗoobm al‑Masi ki taa aki ɓaa ute naan se.

11 Ɔn̰ Raa Bubjege mala ute Mɛljege Isa ajen kɔɔɗn ɗoobo kꞋɓaa gɔtse ki. 12 Maakje kɛn naase ɔkki do naapge tu ɔɔ do jeege tu paac se, ɔn̰ Mɛljege asesin̰ ziiɗn ɓaa ute naanin̰a, tecn̰ aan gɔɔ kɛn naaje kꞋjese naase se kici. 13 Ɔɔ tɛr, ɔn̰ Mɛljege asen tɔɔgŋ maakse taa naan Bubjege tu Raa ki se naase aki tɛɗn jeegen *salal ɔɔ nam Ꞌkɔŋ ɗim aak kus rose ki eyo, ɓii kɛn Mɛljege Isa al‑Masi aɗe ɓaa ute jeen̰ge paac se.