1 Ala kava neꞌmo ha le yaꞌnimo aepa vekamo maiꞌneno nagufamo alino katino neꞌnateya vekamo maiꞌniyaꞌmofeꞌmo ina lagifeꞌmo koliꞌapimo huguve. Ala kava neꞌmo himamuꞌnimo aepa vekamo maiꞌniyaꞌmofeꞌmo ina lagifeꞌmo atete huguve. 2 Hosu vayaꞌmo kame vayaꞌnimogi nagaetegamo hosu kavaꞌmo nehaya vayaꞌmogimo nagufamo nahaeꞌa nesayafeꞌmo nagaetegamo eꞌapaeꞌmo apagoꞌya faiꞌa asagauꞌa aiꞌnae. 3 Asole vayaꞌmogimo kame huꞌa natesayafeꞌmo eꞌa maiꞌnisageꞌnaeꞌmo naipamoꞌmo atete osugiye. Kame huꞌa natesayana naipamoꞌmo lokiya vaigiye. 4 Nagaemo Gotiꞌa magoke yaꞌmo alino namisiyafeꞌmo nahauꞌniyanageꞌna ani yaꞌmo alisuvafekeꞌmo kahauya huguve. Nagaemo Ala kava neꞌmo nopiꞌmo muki afaꞌa maisuva afinaꞌmo maiꞌneꞌna Ala kava neꞌmo konali yaꞌamo aulu heꞌna ageteꞌnaeꞌmo alopa mono noꞌafiꞌmo maiꞌneꞌna ge huꞌna afi gesuvafeꞌmo maigesuve. 5 Hanageke yaꞌmo afole aisiya afinaꞌmo alino fala kino natege alopa mono noꞌafiꞌmo alino fala kino natege huteno yatala yafateꞌmo nasaga huno faino nategaiye. 6 Nagaemo kame vayaꞌnimo aeꞌna apakaseteꞌna alopa mono noꞌafiꞌmo ofalinimo amiteꞌna alopa gefatiꞌmo nehuꞌnaeꞌmo namogaga aiguve. Ala kava nefekeꞌmo alopa gefatiꞌmo yokemo huteꞌna agiꞌaleꞌmo aliꞌna asaga huguve.

7 Ala kava nene, huꞌna, kagaefeꞌmo keya aeꞌna ge hisugekaeꞌmo geꞌnimo afiyo. Kahau huka nateteka geꞌnileꞌmo aeka atagaina huka naha paiyo. 8 Kagaemo nagaefeꞌmo hukaeꞌmo nagaefeꞌmo kahauya hulika eno huka nehanageꞌnaeꞌmo kagaefeꞌmo nagaemo kahauya huliꞌna uguve, huꞌna nehuve.

9 Kaugosamo alika fala kiliꞌneka kaipamo leka nateteka aliꞌyakamo neꞌaluva vekamo naha faika oꞌnatalo. O Gotiyo, huꞌna, naha maeꞌnananagi kakameꞌyamo namiteka nataleka oꞌuvo. 10 Itaꞌni afoꞌnilaꞌmoganimo anakameꞌyamo namisaꞌana Ala kava neꞌmoꞌa yagaino nategaiye. 11 Kame vayaꞌnimo maiꞌnayanagi kagae kaꞌmo nave ligeꞌna agetesugeka ani kateꞌmo navalelika uvo. 12 Kame vayaꞌnimogi aigofe gemo huge kamagigune huꞌa huge nehayanagi navaleka apayapiꞌmo oꞌapamiyo. 13 Nagaemo ofaliꞌna afaꞌa maiꞌnisugeno Ala kava neꞌmoꞌa alagepa yaꞌamo alino namigiye, huꞌna nagesamo afiꞌna fatago nehuve. 14 Ala kava nefekeꞌmo agava maiyo. Lokiya vaitapa maiꞌnigenoꞌao lokiya vaino lapateno. Ala kava nefekeꞌmo agava maiyo, huꞌna nehuve.

<- Samu 26Samu 28 ->