1 Nagaemo nunumu huge keya aeꞌna ge huge huꞌna maiꞌnogenoꞌaeꞌmo Ala kava neꞌmoꞌa afiꞌniyaꞌmofeꞌmo agaefekeꞌmo nahau nayamopafiꞌmo neꞌnahaiye. 2 Keya aeꞌna ge huꞌnogeno geꞌnimo afiꞌniyaꞌmofeꞌmo ofaliꞌna afaꞌa maiꞌneꞌnaeꞌmo muki afinaꞌaeꞌmo keya aeꞌna ge huguve. 3 Falisuva kavaꞌmoꞌa nofi aegekana huno natafauno alagi huno maiꞌniye. Kanolufiꞌmo lamiguve, huꞌna nagesamo afiteꞌna nahausoli huteꞌna koli huꞌnove. 4 Ani kava huꞌna maiꞌneꞌna Ala kava nefeꞌmo, Ala kava nene, huꞌna, kahao ke hovanagi nagufamo alika katika nato, huꞌna keya aeꞌna ge huꞌnove.

5 Ala kava neꞌmoꞌa fiku hapa maeno apamige fatago kavaꞌamo huge huno neꞌmaiye. Gotitimoꞌa hau huno nelateya vekamo maiꞌniye. 6 Ala kava neꞌmoꞌa apamuꞌamo ohaneꞌnigeꞌa afiteꞌa oꞌageꞌnaya vayaꞌaiteꞌmo yagaino neꞌapate. Hosu yaꞌmo aliꞌnogenoꞌaeꞌmo naha maeꞌniye. 7 Ala kava neꞌmoꞌa alagepa huno naha maeꞌniyaꞌmofeꞌmo nauneꞌnameyo, huꞌna, maika aika afeleka maika falu huvo. 8 Ala kava neꞌnimogae, huꞌna, falisuva kavategatiꞌmo nagufaꞌnimo ago alika katika nateꞌneka naunumo aeka kalo paeka nateteka naiyafiꞌmo oꞌnahaesiyafeꞌmo yagaika nateꞌnane. 9 Nagaemo Ala kava neꞌmo aulagaleꞌmo ofaliꞌa afaꞌa maiꞌnaya vayaꞌaitegamo umenitata nehuve. 10 Nagesamo afiꞌna fatago nehuvaꞌmofeꞌmo ge huꞌnove. Ge huꞌnaeꞌmo, lusi hanageke yaꞌmo aliꞌnove, huꞌna ge huꞌnove. 11 Nagaemo, Muki vayaꞌaifeꞌmo aigofe vayaꞌmo maiꞌnae, huꞌna alagepa huꞌna nagesamo oꞌafiꞌneꞌna malage huꞌna ge huꞌnove.

12 Ala kava neꞌmoꞌa nagaetegamo lusi kava huno alagepa kavaꞌmo huꞌniyaꞌmofeꞌmo anonaꞌalefeꞌmo na agufa yaꞌmo amiguve. 13 Nagaemo lagufamo alino katino lateꞌniya kavafeꞌmo nagesamo afiteꞌna kapufi aniꞌmo aliꞌna neteꞌna Ala kava nefekeꞌmo keya aeꞌna ge huguve. 14 Nagaemo, naha maeꞌniyaꞌmofeꞌmo agaetegamo alagepa kavaꞌmo huguve, huꞌna huꞌnova gemo akame huꞌna Ala kava neꞌmo vayaꞌamogi apaulagaleꞌmo agaetegamo alagepa kavaꞌmo huguve. 15 Gotiꞌa vayaꞌaeꞌmo, hogote vayaꞌmo maiꞌnae, huno huteno agesamo neꞌafiyaꞌmofeꞌmo mago vayaꞌamo falisagenoꞌaeꞌmo, ina agufa vayane, huno osuno amuse huno apategaiye. 16 Ala kava nene, huꞌna, aliꞌyakamo neꞌaluva vekamo maiꞌnove. Itaꞌnimoꞌmo aliꞌyakamo neꞌaliya aꞌmo maiꞌniya kava huꞌna maiꞌnove. Hatu maeka nateꞌnanageꞌna afa vekamo maiꞌnove. 17 Kahao ke heꞌna ofalinimo kamiteꞌna kagaefekeꞌmo keya aeꞌna ge huguve. 18 Naha maeꞌniyaꞌmofeꞌmo Ala kava nefeꞌmo, kagaetegamo alagepa kavaꞌmo huguve, huꞌna huꞌnova gemo akame huꞌna vayaꞌamogi apaulagaleꞌmo agaetegamo alagepa kavaꞌmo huguve. 19 Yulusalemu taoni folagapiꞌmo Ala kava neꞌmo mono noꞌafiꞌmo huguve. Ala kava neꞌmo agiꞌaleꞌmo alitapa asaga hiyo.

<- Samu 115Samu 117 ->