5 Kagaemo ma mopamo muki afinaꞌmo hanege hanege huno hanesiyafeꞌmo faika ateꞌnane. 6 Solovala aniꞌmo alika ateꞌnanageno eno ma mopamo aeno ati kaeteno avemo alino agaseꞌniye. 7-8 Solovala anifeꞌmo, kaune ho, huka huꞌnanageno aune heno uꞌniye. Hakalu huꞌnanageno afitenoꞌaeꞌmo nagu nagu huno lamiꞌniye. Aveletiꞌmo aino laki lamino aune hetaleno lamino ani yamufiꞌmo asagauno aiteno ateꞌnana noꞌaleꞌmo halate haneꞌniye. 9 Kegiꞌyamo huka ku aika ateꞌnananageno halate eno ma mopamo aeno ati okaegaiye.
10 Meti aniꞌmo alino ateꞌnigeno ani yamufiꞌmo nelamiye. 11 Nelamigeꞌapaeꞌmo muki afela afumogimo neꞌnae. Afela nokimogimo neꞌnagenoꞌaeꞌmo apainagamo hau nosiye. 12 Ani agiꞌnaleꞌmo haneꞌniya yosafiꞌmo nama anagaꞌmogi apanoꞌmo ki maleteꞌa yosa akopaleꞌmo maiꞌneꞌa apake neꞌaiye.
13 Anagamo akalo huka ki maleꞌnana nopatiꞌmo aniꞌmo alika aveleꞌmo lakiꞌnanagenoꞌaeꞌmo koꞌmo neꞌaigenoꞌaeꞌmo muki ma mopafi yaꞌmo nehage. 14 Muki pulumakamogi kahaumo nesayafeꞌmo alika hageka ateteka vayaꞌmogi hoyafiꞌmo hakalesaya neꞌyateꞌmo yagaiꞌneꞌa aliꞌa nesayafeꞌmo alika hageka neꞌatane. 15 Ani kava huka ma mopafi vayaꞌmogimo apamogaga aisayafeꞌmo nofi alagafati aniꞌmo alika apamige apaugosafiꞌmo uvelimo falesageno fayu fayu hisigeꞌa amuse hisayafeꞌmo uvelimo alika apamige apaipamo alino lokiya vaino apatesiyafeꞌmo peleti mayamo alika apamige huka alika neꞌamine. 16 Koꞌmo neꞌaigenoꞌaeꞌmo Lemanonigayagamo Ala kava neꞌmoꞌa fai maleꞌniya yosamoꞌmo lusi kava huno aniꞌmo neꞌaliye. 17 Ani yosaleꞌmo muki nama anagaꞌmogimo apanoꞌmo nekiye. Mago alopa namamogimo mago yosaleꞌmo apanoꞌmo nekiye. 18 Afela meme anagaꞌmogimo yatala aveleꞌmo umenitata nehageꞌapaeꞌmo mago afela afu anagaꞌmo yafa kapiꞌmo uꞌa fala nekiye.
19 Kagaemo kaimo alo hu maleꞌnanageno muki afinaꞌmo kaimo eno neꞌateya kavafeꞌmo lekana nepaiye. Yegemo lamino nefaleya afinaꞌmo agetageno lamino nefale. 20 Kagaemo hani huvo, huka nehanageno haniꞌmo nehigeꞌapaeꞌmo muki yagagafamo fala kiꞌa maiꞌnayategatiꞌmo eꞌa umenitata nehae. 21 Afela laiyoni anaꞌaumogi Gotitegatiꞌmo neꞌyaꞌmo aliꞌa nesayafeꞌmo kahauya huꞌa kae kae nehae. 22 Yegemo nelegeꞌapaeꞌmo kelifiꞌmo lamiꞌa havaeꞌa neꞌmaiye. 23 Fala kiꞌa neꞌmaigeꞌapaeꞌmo vayaꞌmo he tiꞌa uꞌa aliꞌyaꞌapimo neꞌaligenoꞌaeꞌmo yegemo lamino nefale.
24 O Ala kava nene, huꞌna, asole kavaꞌmo nehane. Ageteka afiꞌnana kavakaletiꞌmo muki ma mopafi yaꞌe vayaꞌeꞌmo alo hu maleꞌnanageꞌapaeꞌmo ma mopafiꞌmo kili paeꞌa maiꞌnae. 25 Solovala aniꞌmo muga afagiꞌaleꞌmo haneꞌnigeno lusi yatala aniꞌmo vasilonafiꞌmo muki apauneꞌapameꞌe yaꞌmo maiꞌnae. 26 Muga alopa anipiꞌmo asole sipimo neꞌvageꞌapaeꞌmo alopa noyamemogi nagosaꞌmo ailiꞌa uꞌeꞌa huꞌa yokalomo neleꞌaeꞌmo aeꞌa hailo huꞌa haiteꞌa emi eteꞌa nehae.
27 Mukiꞌamogimo neꞌyaꞌmo alika apamisanafeꞌmo apaka netegeꞌa kagava neꞌmaiye. 28 Neꞌyaꞌmo alika neꞌapaminageꞌaphaeꞌmo neꞌnae. Kayapatiꞌmo aliꞌa neꞌa apamu neae. 29 Kakameꞌyamo neꞌapaminageꞌapaeꞌmo kolikamo nehae. Apavamusateꞌmo neꞌalinageꞌapaeꞌmo faliteꞌa halate mopamo aliꞌa nehamalae. 30 Kaunekameꞌmo alika ateꞌnanageno uno alino afole aino neꞌapate. Muki haopalegamo saufa yaꞌe vayaꞌeꞌmo alo huteka alika afole aika neꞌapatane.
31 Ala kava neꞌmo ha le konali yaꞌamoꞌmo alagi hanege hanege huno haneno. Ala kava neꞌmoꞌa alo huꞌniya yatefeꞌmo amogaga aino. 32 Agaemo mopaleꞌmo aulu heno neꞌagegenoꞌaeꞌmo imima neꞌaliye. Aveleꞌmo ame neꞌaligenoꞌaeꞌmo halinamo neꞌaiye. 33 Nagaemo ofaliꞌna muki afinaꞌmo afaꞌa maiꞌneꞌnaeꞌmo Ala kava neꞌmo agiꞌaleꞌmo aliꞌna asaga huꞌna yoke huguve. 34 Ala kava nefeꞌmo namogaga neꞌauvaꞌmofeꞌmo agaefekeꞌmo nagesa afifi huꞌna neꞌmauvanageno amuse huno natesiyafeꞌmo nahauꞌniye. 35 Agaemo hosu vayaꞌmo ma mopafatiꞌmo alagi alino hano huno apatalesiyafeꞌmo nahauꞌniye.