TAITESA

Taitesa baa Juu daa rara akali. Baa Anatunya waili pii keyange sepala mona kapu kyepala Yesu kapa ingingi lao suu pyapala Kurisene ingiya. Dopa pipala baa Pole pipya karo Anatunya yulu pyuo nyiso kareya. Poleme Taitesa yuu Kirita dokona Elyambu Pingi doko iso karena lamaiya. Taitesa dokona kareyamo dokopa Poleme pepa pase dake pyao renge remana lao pii lamaiya.

Yuu Kirita dokona wambu malu mee kopetame pyuo kareyami dokona suu pyapala Poleme Taitesa Elyambu Pinginya akali mupwa apa pyuo kararami lao lamaiya. Poleme Taitesa apa pyuowale alemo dupwape dee endemo dupwape dee akali parangepe kendemandepe dupwa mana lara lao lamaiya. Endemo dupwame mana nyepala enda angi dupwa range mana lamairami. Pii lumwa pyuo lao Poleme Taitesa apa pyuo karare lao lamaiya. Baa mona seramopa karo wambu dupwa pipya puu minyuo apiyanda pii nao mona mendaki palyuo karena lamaiya.

Buku Dakena Pii Palamo Dusipa

1. Pii kanda soo leya 1:1-4

2. Elyambu Pinginya akali mupwa dupwana yulu 1:5-16

3. Elyambu Pingi dokona akali endape dupwa apa pyuo kararami lao mana leyamo doko 2:1-15

4. Wambu dupwa yulu pinya lao porainyi pyambuo repe repe pii lamaiya 3:1-11

5. Pii lao oto leya 3:12-15

1-2 Namba Pole Anatunya kendemande akali ingyuo karo Yesu Koraisana aposele akali dokome pepa pase pyao jilyu.

Anatunya rombo palyisi wambunya kapa ingingi lao suu pingi doko andanyi pyambwapala pii angi namwana misi pii lenge doko nolakare lao Anatumi emba kyakale lao mapanyi peelyo pare langiya. Ene busiyamo dokopa Anatu kyambo laa nange dokome nakama lete karalu kararami lao kinyi lalu lao leya. 3 Banya yuu gii rolae dokopa waili pii dokona namwa nolako langiya. Langyapala dokopa waili pii doko namba keta jepala polo lamaikare lao namwana Lete Wai Pyao Nyingi Anatu dokome letonuli pyuo piri leya.

4 Nambana Kurisene wane angi Taitesa emba pepa dake pyao jilyu.

Rakane Anatu Koraisa Yesu namwana Lete Wai Pyao Nyingi dokopana mona keyange palyuo ipingipi mona kyuu lao singipi emba keta palena.

5 Nambame yuu Kirita dokona karo yulu lapo pyuo maleyono silyamo dupwana pyuo otakareŋe lapala yuu dokona karape leyo. Dopa pyuo taone dupwana yaka lao Elyambu Pinginya akali mupwa lapo rombo palyare lao leyo kande. Pii dusipa kame see napipi. 6 Elyambu Pinginya akali mupwa doko baa pii pali naramopa enda mendaki ikinya akalingi ingyuo karena. Banya wane wanake dupwa Kurisene inginya lao kando karo kingi lakami naraminyipa mena rae lenge ingyuo kamba laa nao ando pena lao rapu pyuo karena. 7 Elyambu Pinginya akali mupwa doko Anatunya yulu rapu pyuo karenge dokona yuu peparae rolae pyuo karena. Baa mena marakai ingya naope imbwualana wangu lakapala imbwua naope biya naa naope waiya lao langa pyakanda naope bange nyipuli lao suu pyaa nao karena. 8 Wambu eparami dokopa yako yako lao nenge pyuope yulu rolae dupwana mona retena. Baa range rapu pyuo karope rolae pyuope poo pyasi karope rangeme mondo lao rapu pyuo karena. 9 Waili pii angi Anatunya mana pii lengenyili pyuo pingi doko baa poraiyuo minyuo karena. Dopako pira ramo doko pii rolae lamaiyuo wambu serami dupwa andanyi nembo pirasa pira. Dopa pyuo pira dokome wambu pii rolae rae mai nange dupwana pii kyai ingilyamo lao lasaka pyuo nolakara.

10 Wambu malumi mee pii kopetame lapala pii angi doko nembo wakale dupwa kando panga soo lao karenge. Juu yanenge kalomasi dee Kurisene ingiyami dupwa panga sooko karaminyi. 11 Akali dopaleme kana mone nyimwali lapala yulu ama koo pyuo pii kopetame mana lamaiyuo ree palu wambu dupwana suu pingi bolombalo lanyi nembo randa mailyaminyi doko kaena lamairi. 12 Kirita wambu rangena poropeta akali mende dopa leya. Kirita wambu yuu peparae kyambo lao mena rae lenge dopale ingyuo maka suku suku napala nenge nyura nao pyuo karenge leya kande. 13 Pii doko kinyi leya. Dokona lao nakamana Anatu kapa ingingi lao suu pingi doko kapa andaramo dokona pii poraiyuo lao pyalana pyuo lamaiyuo karape. 14 Juu wambunya sinju pii dupwape dee isa wambu lapo pii angi yaki nyiyami dupwana mawa pii dupwape minyuo kara nana. 15 Wambu mona rolae singi doko kata yulupi dupwa peparae rolae ingyuoko penge. Wambu mona karo petenge Yesu mona mai nangena mona anda dee yulupi dupwa koo ingyuo singi dokona yulu peparae rolae ingyuo paa nange. 16 Nakama kambu dokome Anatunya wambuŋu lao yulu piminyi dupwame banya ingyuo paa nalyamo. Nakama kamba lao yango mende kando awa epekanda napala yulu koo pingi dokome yulu keyange pinya saka nalyaminyi.

TAITESA 2 ->