9
Poleme Isaraele Dupwa Pipya
Mona Kendaya
1 Namba Koraisana ingilyamo dokome kyambo laa nalyo. Pii dake ama kinyi leto. Imambu Poo Pyasimi nambana monarena suu pingi dokona iso karamo. Dokona namba kinyi rolae leto doko soo gisilyu.
2 Namba rangena wambu ranjama mendaki dokome nakamana lao monarena randa pyuo karalu karamo. Dopako pyuo kondona renge doko andelyamo.
3 Dokona nakamana reke lao Anatunya randa namba keta sinya lao Koraisa yaki nyera dokome nakama nyisaro pili doko rae maipala dopa pyuo pipuli.
4 Nakama Isaraele wambu dupwa Anatunya yapo nyisi karaminyi. Anatumi nakama banya wambu inginyi pyambwapala banya yanga paupau lenge dokona nyuo pisiya. Baame mende piru lao lalu lao lapala nakama pipya kana minyiya. Minyapala banya Lowa doko nakama keta reto apa pyuo Anatu lakandarami lao kata dokona mana lamaiya. Lamaiyamopa nakama Anatunya lalu lao lenge doko kando nyiyami.
5 Anatunya akali andake lapo nakamana rakange kyawa ingyuo kareyami. Koraisa akali ingyuo nakamana rara dokona epeya. Anatu baame wambu dupwa iso karalu karenge dokome banya kingi lakando karalu karena, doko kinyi.
6 Anatunya lalu lao lenge pii doko isa pengendena lao laa nalyo. Dokona lao Isaraele wambu dupwa peparae Anatunya yapo nyisi wambu ingyuo karaminde daa. 7 Dopako pyuo Aporakamena para pyasi dupwana lapo iki Anatunya wane wanakepe ingilyamo. Dokona Anatumi Aporakame lamaiyuo, Aisakena wambu para pyaramo dupwa iki embena ingyarami. 8 Pii doko wane mee wambumi mandengenyili pyuo manjirami dupwa Anatunya wane wanakepe ingya nara. Ingya naramopape Anatunya lalu lao lenge pii soo nyiyaminyi dupwana wane dupwa yapo Aporakamena para pao peyami lao suu pilyu. 9 Anatumi pii dasipana minyuo lao kana minyiya. Yuu gii angi dokopa namba dee eparanopa Serame wane mende manjira leya.
10 Pii dasipa iki laa nalyo. Enda Orepekana wane lama dolapo namwana rakange kyawa Aisakeme mandeya. 11-12 Wane lama ene manjaraŋa lao dokopa Anatumi mende mupwa ingyara lao doko wambo rombo palyiya. Anatu rangeme rombo palyuo, Wane wambo dokome enakana dokona yulu pyakamira lao Orepeka lamaiya. Lamaiyamopa nakamba yulu koope panda keyange mendena wambo pipa nayambinyi dopa lao rombo palyinyi reteya. Reteyamuli pyuo Anatunya rombo palyiya doko nakambana yulu piyambi dokona daa. Banya leyamo kata dokona ingyuo peya. 13 Anatunya pii pyasi dokona lao dokopa, Nambame Jekope mona retapala Iso epekanda nayo lao palamo.
14 Dokona namwa apa larama? Anatu baa rolae daaŋa laramase? Ama daa. 15 Anatumi Mosese kando, Namba rangeme mendali sakao nyiso nyuo kararo laro ramo doko sakao nyiso nyuo kararo. Dee wambu lapo kondo nyisaro laro ramo doko kondo nyisaroko leya. 16 Doko akalimi keyange pirami dokona lao pii nara. Dee akalinya pinya lao suu pyarami dokona palyuo pyakamirande daa. Anatunya sakao nyiso karenge renge dokome range pira. 17 Anatunya pii pyasi dokona kiŋi Perao lamaiyuo, Renge dokona lao emba kiŋi rombo palyiyu letamo. Dopa pyuo emba keta nambana porainya renge doko lasaka pyuo nambana kingi doko yuu muu dupwana sinya lao piyu leya. 18 Dokona lao Anatumi mendali kando sakame kumapuli lao suu pilyamuli pyuo sakame kumuo dee mendalinya mona kana pokanyi pyambwalana suu pilyamuli pyuo mona kana pokakamingi.
Anatunya Imbu Singipi Sakao
Nyiso Karenge
19 Nakama mendalimi namba langyuo, Pii lapinyi doko rolae ingyapyali doko apa pyuo Anatumi akali koo paleta karamo lao kando nyipyalisi? Api mendeme Anatunya pinya suu pingi doko nyuo isa palyarase?
20 Emba apiyakalendeme karapala dokopa Anatu kando kamba larese? Kapo yuumi wasisi dokome, Emba akipamo namba dopa pyuo wasipi lao piso see nange kandale.
21 Kapo wasingi akali dokome yuu doko nyepala baa range maso pira. Baame yuu lapo nyepala koo keyangepe wasalana suu pyaramuli pyuo wasingi.
22 Anatumi wambu pinya dopako pyuo piya. Baame banya imbu singi lasaka pyuo banya porainya renge doko nolakalana suu pyao kareya. Wambu baame imbu singi mandeyamo dupwa keta oo randa nyerami ingiyamopape waiya lao randa mailana suu pyaa naya. 23 Baame yanga paupau lenge andake doko opetae namwa keta lasaka pinya suu pyapala banya sakao nyiso karenge renge paleyamo dokona doko namwa keta kulimbuo jiya. Anatumi banya yanga paupau lenge nyerami lao rapa rapa piyamo dupwa keta panalana suu piya. 24 Dokona lao baame namwa kyakale leyamo wambu dupwa. Juu wambu yango sukusa ikisa kando laa naya. Rara wakale dupwa opetaesa leyamo piya. 25 Dokona lao baame pii mende buku Osia lenge dokona lao piya.
Wambu neta dupwa nambana wambuŋu laro lao
rara namba wambo mona nyii nange doko
nambana mona retenge rara laro leya.
26 Nakama Anatunya wambu daaŋa leyaminyi panda dokona,
nakama Anatu lete karengena wambu larami leya. 27 Aisayame Isaraele wambu dupwana lao pano lao kareya. Isaraele wambu dupwa ipwa pota kee kana ingyuo paramopape mendasipa iki sukusa epena laro leya. 28 Doko Kamongome wambu yuu muu peparaena kote doko muu pinya palyapala waiya lao lao koo piyami dupwana bakimi pyuo pira leya. 29 Pii doko Aisaya leyamo kata dokonako pelyamo. Kamongo Anatu Porai dokome namwana rakange kyawa dupwa para pyao jii nayali doko namwa yuu Sotoma Gomorapana piyamo dopale ingyuo pupyali.
Isaraele Wambu Waili Pii Keyange Sepala Apa Piyamisi?
30 Dokona lao namwa apa laramase? pii laro dake. Rara menge dupwa rangeme wambo Anatupa rolae karamwali lao suu pyaa nayami. Nakama kapa ingingi lao suu piyami dokome Anatupa rolae ingyuo peya. 31 Dopa piyaminyipape Anatunya rombo palyisi wambu dupwa nakama lowa dokome Anatupa rolae karamwali lao piyaminyipape angi rolae koto nyelana saka nayami. 32 Akipamo saka nayamipi? Renge doko Anatu kapa ingingi lao suu pyaa nayami. Mee yulu dokona minyuo rolae karalana suu piyami. Nakama lukumungi kana dokona lukumuyami. 33 Lukumungi kana dokona lukumuyami doko Anatuya pii poo pyasi dokona lao,
Kandalapape, nambame yuu Sayone wambu lukumarami lao kana reteyo.
Kana dokona pyalyaminyapala pao palirami.
Dopa piramopape mendali baa mona mairamo dokome baa elya nyii nara.
<- OROME 8OROME 10 ->
