1 Sipisipi Ikyane dokome pepa rongo pisi dokona isa roome upi lao rambu lasi yanda ipingi doko rekya lanyi nembeya. Nembeyamo dokopa yake dorena mendasa lyapu laope pii napala koo pyuku pyuku pao yuu mee lama mee siya. 2 Enakana kandeyono dokopa aŋala yanda ipingi Anatunya lenge kambu dorena bikuli lenge yanda ipingi maiyaminyi minyaro kareyami.

3 Dokopa aŋala mende pee golome wasisi rendamu pingi retenge pere mende lanyuo epapala rendamu pingi bange malupi dee Kurisene wambunya ateŋa lengepe nyuo pyasapala kiso maingi kana pyare doko kiŋinya petenge isa andake repeta siya dokona Anatu kiso maira ingiya. 4 Rendamu paleta isare sukwa doko Kurisene wambunya ateŋa dokopa rolae pyapeta aŋala dokome minyaro kareyamopa yake panda Anatunya lenge kambu siya dokona peya. 5 Dokopa aŋala doko kiso maingi pyare dokona isare lapo nyepala rendamu pingi penge dokona kisinyi palyiya. Palyapala isa yuunya pyao peeyara aopa yuu gala andake lao yuu pele pipala yuu dupwa yuusili minyiya.

6 Dokopa aŋala yanda ipingimi nakama bikuli dupwa nyepala lalana rapa rapa piru kareyami.

7 Aŋala mupwa baa banya bikuli leyamo dokopa randake kapa isarepe ranjama pale pale yuu dupwana kulimbuo epeya. Dokopa yuu muu dupwa remasa ingiyamopa liti mende rao oteya. Dee dokona isa kareyamo dupwa reyako. Dee isareme isoko dupwa rao pyalingi nyiya.

8 Dokopa aŋala lapo pyuo dokome bikuli leyamopa isareme yuu kyaunya renge dopale ingyalya ingyana pipala ipwa kota sukusa dokona pyao nembeya. Dokopa ipwa kota doko remasa ingiyamopa liti mendaki dokona ranjama ingiyamopa 9 lee renge bange dokona siyamo dupwa kumuo oteya. Dee sipu dokona papyuo kareyamo dupwa kokwa sisi siya.

10 Aŋala repo pyuo dokome banya bikuli doko leya. Dokopa bui mende kendapuli rele lao yake dokona piso isa pyakao epeya. Epeyamo dokopa ipwa epo penge dupwa liti pyuo remasa ingiyamopa dokona liti mendenape dee ipwa guu dupwanape pyakala papala rao kokwa siya. 11 Bui doko imambusa ingyuo (kingi Kau Pingi lenge) dokome ipwana pao paleyamosa ipwa liti pyuo rema dokona mende kau pyuo siya. Kau pyuo kwaese dokona neyami dokopa wambu ama soo kaeyo kumuyami.

12 Aŋala kisima doko bikuli leyamo dokopa neta kana dokonape dee bui dupwanape kanya remasa lao rombo pyao liti piyamopa liti mendaki dokona larapu iminjapa piya. Dopako pyuo kukwa doko remasa lao liti piyamopa dokona liti mende iminjo, dee korakama doko dopako piyamopa dokona liti mende iminjo piya.

13 Enakana nambame kandeyono dokopa yaka kambe yake dokona bii lao karo pii ama ketae lao, Kwao para, kwao para, isa yuunya palaminyi dupwa randa andake nyerami. Aŋala rema bikuli lapa nami dupwa oo lalana petaminyi dokona kama kwao parami ingyalopyamo leya.

<- OREPALAISANE 7OREPALAISANE 9 ->