Paleta Dusipa
2 Dokopa aŋala mupwa ingyuo dokome Anatunya imbu singi perena siyamo dupwa kulimbwanyi palyiya. Dokopa wambu bange mena koona make palyuo bange mena koo dopale kingimi wasapala kingi lao karenge dupwana yanenge dokona rete andake poro lao piya.
3 Enakana dee aŋala lapo pyuo dokona banya perena siyamo doko ipwa kota dokona kulimbuya. Dokopa ipwa kota doko akali kumasinya ranjama dopale ingiya. Dokopa ipwa kota dokona lee renge bange peparae kumuo oteya.
4 Dee aŋala repo dokome dopako pyuo banya perena siyamo doko ipwape dee ipwa guupi dupwana malyiyasa ranjamako ingiya. 5 Nambame siyu dokopa ipwana aŋala dokome dopa leya. Emba wambape dakepape mee kareneko karenge. Emba ama rolae poo pyasi ingingi dokome nakamba kando kote kapa rolae lapala randa mailyinyi leya. 6 Nakambame Anatunya wambupi dee poropetape dupwana ranjama dupwa kulimbwakamiyami. Dokona lao embame nakama ranjama dupwanako nena lao kapa mailinyi. 7 Dee enakana rendamu pingi kiso maingi kana pyare dokona piso pii mende leyamo siyu doko, Kamongo Anatu Ama Porai ingyuo karene doko embena kote pii dupwa rolae lenge leya.
8 Aŋala kisima dokona banya perena siyamo dupwa neta dokona kulimbwanyi palyiyamo dokopa Anatumi akali dupwa kyawa yaki nyuo kaeyamopa neta dokome akali dupwa reya. 9 Neta isare ingyuo rao alyasi dokome akali dupwa rao raukusi reya. Rao raukusi rapalape Anatu baa randa koo dopale wambu keta mee kapa mairali doko kando kilya kando leyami. Lapala nakamba mona kapu kyuo banya kingi dokona lakandao lao pii nayami.
10 Aŋala kingi paki dokona Anatunya imbu singi banya perena siyamo doko kulimbwanyi bange mena koona petenge isa dokona palyiya. Dokopa bange mena koona isingi panda dorena iminjiya dokopa akali banya arapunya karenge dupwa sii leyasa kambu nakepanyi nembo siyami. 11 Nakambana yulu koo piyami dupwa konda napala rete pyuo sii lao piyamo dupwana lao Anatu yake panda karenge doko baa kando kooŋo lao lao nembeyami.
12 Enakana aŋala pakinyamange dokona perena siyamo doko ipwa andake kingi Yuporisa lenge dokona kulimbwanyi palyiya. Dokopa ipwa doko soko rali piyamo dokona kiŋi neta pyakaenge dorena karenge dupwa epena lao kata wapwakamira ingiya. 13 Enakana kandeyono dokopa imambu koo rema mungi dopaleronende kau pambeyana nenge kata dokonape dee mena koo nenge kata dokonape dee kyambo lenge poropetana kambupi dusipana neta epeyami. 14 Nakama imambu koo ingyapala wambumi pii nange yulu dupwa kemali pyuo pyuo papiyami. Imambu koo rema dupwame yuu muu peparaena papyuo kiŋi akali peparae Anatu Porai dokona yuu gii andake pyaka seramo dokopa yanda pirami dokona suu pyao kyakale lao nyuo sukusa sukusa pyuo epena leyami.
15 Pii dake selapa. Namba waa nala penge dopale ingyuo eparo. Dokona nakama komau wapuo karo lenge rao karalapape. Dokome wambunya lenge kambu dokona papara paa nao rae maiyuo elya napala kararami.
16 Enakana imambu koo dupwame kiŋi dupwa lanyuo yuu mende Ipuru pii lao kingi Amaketono lenge dokona peyami.
17 Dokopa aŋala yanda ipingi dokome banya perena siyamo doko porambaiye dokona kulimbwanyi pyambuya. Dokopa tembole anda petenge isa dokona piso pii rekyae lao epo, Yulu doko pyuo kaelyamo leya. 18 Dokopa yuu pele pyuo rali pipala yuu gono lao yuusili kopetame minyiya. Anatumi yuu wambupi kanda soo ingiyamo yuu gii dokona piso yuusili dopale mende minya nange doko minyiya. 19 Taone andake doko remasa lao liti pyuo rali piya. Dee yuu mure lao rara wakale dupwana taone dupwa boo leya. Dokopa Anatumi yuu andake Bapilone lenge doko kame see napala banya kapona waene imbu singi renge paleta siyamo doko nao goe lena leya. 20 Leyamopa panda dokona yuu kyau dupwape dee panda lapo ipwa sukusa siyamo dupwape mee ingyuo rali piya. 21 Apu andake randake kapa reeko lasi kope byake dopale paleta isa epeyamo dokopa wambu dupwa piya. Dopa pyuo piyasa randake kapa dokome randa koo napala Anatu kando kilya kando leyami.