1 Kamongo embena mona reto puu penge dokona kenane pyao karalu karo

embame yaki nyii nange lao polo lamairu.

2 Embena mona retenge renge palu palyuo palira.

Dee embena yaki nyii nange renge yakena mendeko ingyuo pingi pyao sulu sera doko namba silyu.

3 Akali nambana rombo palyisi pipa lao kana minyilyu.

Nambana kendemande akali Dapitipa

4 para pyao nyere dupwa kiŋiko ingyuo parami.

Embena para pyao nyere wambu keta kiŋinya isingi yulu doko boneŋe sinya lao nyakaro lee kande.

5 Yake pandana aŋala dupwame keyange pilini dupwana kenane pilyaminyi.

Kamongo, embena mondo lao pingi dokona lao pilyaminyi.

6 Yakena karenge dupwa Kamongo emba yale daa.

Aŋala dupwa embapamanda manji nara.

7 Yake pandana aŋala mupwa dupwa wato lenge dokopa emba ketae nembo lenge.

Peparaeme emba mupwa lao suu pyaopako karenge.

8 Kamongo Anatu Porai Wakasa emba yale mende daa.

Yulu peparaena Kamongo emba isa paa nange.

9 Ipwa kotaporai doko minyuo iso karenge.

Kasakole minyuo naro ipupwa lao epenge doko meme pingi.

10 Koo renge mena poraingi Oreapa lenge doko emba yuu mendaki kalyuo pyao kumasii.

Embena porainya renge dokona embena yandapimwai dupwa nyuo anamasi minyii.

11 Yake doko embena ingyuo silyamo. Dee yuu doko opetaeko.

Embame yuupi yuu muu dupwana bange wakale wakale singi dupwape wasii.

12 Yuu parali dolapo wasiinyi silyamo.

Yuu Tapo Emonepa kyau dolapome embena lao rae maiyuo kenane pyakange.

13 Anemapwae. Emba ama porai renge wakasa palenge.

Embena porai renge doko bange mendepa manda manjipa nalyamo.

14 Embena isingi yulu doko rolae pingi rengepe kote rolae lenge rengepe dolapona ingyuo renge kuiyaro karapyamo silyamo.

Embena mona reto pingipi mondo lao pingipi dolapo yulu pipi dokona panelyamo.

15 Emba mona joo misi kenane pyao kingi wapambupi lakandenge wambu nakama rae maiyuo paramilyamo.

Nakama embena anjiki pingi renge eŋa pasi dokona moko ware pyuo karenge.

16 Emba karenge dokona lao nakama rae maiyuo pao yuu kwuanyi serenge.

Dopa pyuo embame keyange pingi dupwana lakandenge.

17 Emba keta renge kuiyuo namwa anamasi minyingi renge jingi.

Embena mona retenge dokona moko karo anamasi minyingi.

18 Kamongo embame namwa kyawa minyara doko rombo palyiipya.

Emba doko Isaraele wambunya Anatu Poo Pyasi dokome namwa kiŋi doko jiipya.

19 Yuu wamba embena kendemande akali yulu mondomondo lao pingi dupwa keta pii repa repa pyuo lao,

Nambame ami yanda pyuo mupwa ingiyamo doko kiŋinya kyawa rarange maiyuo

namba wambu kareyaminyi dokona rombo palyiyu doko kiŋinya petenge isa doko maiyu.

20 Nambame nambana kendemande akali Dapiti

baa mamba poo pyasi dokome kiso kiŋi ingyuo karena lao piyu.

21 Nambana porai renge dokome baapa yuu peparae role pyao karara.

Nambana porai dokome baa porai sinyi pyambwara.

22 Banya yanda pimwai dupwame baa randa mainya pyuo lisa pirami.

Koo pingi dupwame baa kapa pyuo anamasi minya narami.

23 Banya yanda pimwai dupwa kalyuo inji ranji pinyi nembapala

baapa epe kanda nalyaminyi dupwa pyao kumakaro.

24 Nambame baa mona wakasa reto baa keta renge renge soo kararo.

Nambamebanya yanda pimwai anamasi minyingi inginyi pyambwaro.

25 Nambamebanya isingi yulu doko

ipwa kota andake Metitaraniane pete lenge dokona piso renge kuiyapala pao ipwa Yuporisa dorena ando nyimbunya lao piru.

26 Dokopa baame namba kando,

Emba nambana rakange dee nambana Anatuŋu, lara.

Emba nambana kyawa minyingi dee nambana lete wai pyao nyingi akali karene, lara.

27 Nambame baa wane mupwasa ingyaro.

Kiŋi doloma peparae manda manji nao ketaele karena lao piru.

28 Nambame baapa pii lalu lao leyo lao suu pyao kararo.

Deelao kana minyiyambano doko sulu soo sera.

29 Baa keta piso kiŋi para pyao paraminyi dokona mendeko kiŋi ingyapa pira.

Banya isingi yulu doko yake doko pingi pyaro karamo dopako ingyuo puu para.

30 Dopa pyuo paramopape banya para pyao nyeramo dupwame nambana mawa pii minya nao kamba lapala

nambana yulu katape singi dokona paa napala

31 mata joo karapala

nambana mana pii laronuli pyuo moko minyuo paa narami ramo

32 doko nakamana koo dupwana lao randadokome peponame ingyuo pyaro.

Nambame nakamana kyai pirami dupwana randadokome isareme ingyuo kisaro.

33 Dopa pirunupape nambame Dapitipamona retenge kata doko rokwa napala

baapa pii mende lalu lao leyo dokonaisa nemba naroko.

34 Nambame baapa kana minyuo lalu lao leyono doko yala naowape

dee pii lalu lao leyono dupwana mendepe nyuo alowa pyuowape pii naro.

35 Nambana kingi poo pyasi dokona lao yuu gii mendakisa leyo doko yuu peparaena ingyuo pena lao lalu lao leyonosa piya.

Doko Dapitipa kyambo ingyuo pena lao pii naro.

36 Yuu peparae banya para pyao pyaramo dupwa rembe naa naramopa

banya kiŋi yulu doko nambana lenge kambu dokona neta rao karamo dopale ingyuo soo puu para.

37 Dopako pyuo kana doko yake dokona rao karalu karengeŋe lao panenge doko suu pyao

banya isingi yulu doko pano sera.

38 Dakepa kiŋi emba range rombo palyii dokona lao

emba baa mata maipala yaki nyuo imbwualene.

39 Embena kendemande akali kiŋi dokopa kana minyuo pii lalu lao leene doko mee inginyi nembee.

Embame kiŋinya kyawa rarange doko yuunya kupinyi yaki nyipisa mee yuu parapala kwaelyamo.

40 Embame banya taone dokona kame porai doko pyao lalyanyi nembee.

Dopa pipala banya anda porai dupwa pyao kokwa sii.

41 Wambu baa repetale kata pumi dupwame banya bange dupwa waa nyuo kaelyaminyi.

Banya parali maki dupwame peparae baako kando giyalya giyana pilyaminyi.

42 Embame banya yanda pimwaimi baa pyao anamena lao kae.

Nakamana monarename rae mainyipyambwakamii.

43 Embame banya yanda kakupi dupwa nyuo nenge kara nange ingyanyi pyambwapinyisa

yanda angi dokona baa anamasi minyilyaminyi.

44 Embame baa kiŋi ingyuo kara nanale lao nyuo isa palyapisa

banya isingi yulu doko otelyamo.

45 Embame baa banya yuu gii oto emapa napyamopa kanya kapwa pyuo minyuo pyaminyisa

baa elyako nyilyamo.

46 O Kamongo, emba yuu peparae yalu pyuo karalu kararese?

Yuu akipare embena imbu singi doko isare ingyuo rao kararamo kararese?

47 Kamongo embame akali dupwa yuu malu kararaminde daa lamo doko suu pyao karape.

Embame namwa wasiinyipape namwa kumungi dokona ingyuo pelyamo laosuu pyaowako karape.

48 Api mendeme kuma nao mee karalu kararase?

Apa pyuo malu anda paa naro lao range porayapala karalu kararamisi?

49 Kamongo embame baa mona retalu reto reteene doko anja peyape?

Embena lalu lao lenge pii Dapitipa leyambinyi dupwa anja silyase?

50 Kamongo namba embena kendemande kandale doko kame soo kaeya napipi.

Dopande pyuo kilya kando lalyaminyi lao sowako karape.

Namba wambu Anatu suu pyaa nange dupwa peparaeme kaeya nao elya kendape dupwa jiminyi silyamo.

51 Kamongo, embena yanda pimwai dupwame embena rombo palyisi kiŋi doko kilya kando

anja mendasa para dupwa mee lao nembowakopelyaminyi.

52 Kamongona kingi doko lakando karalu karamanadoko.