1 Isaraele Wambunya Iso Karenge embame namwana pii soo karape.

Emba aŋala dupwana kyawa ingyuo karenge dokome

2 emba Eporaime rarape Benjamenena rarape Manasana rarape dusipa keta epo lasaka pyuo panape.

Embena porai renge namwa lasaka pyuo epo

namwa pyuonyepe.

3 Anatu embame namwa range sukusa nyepe.

Embena sakame kumungi renge doko lasaka pirinyi dokopa namwa kyawa minyinyale.

4 Anatu Porai Wakasa doko embame yuu akipare

embena wambunya ateŋa doko soo imbumi kumuo kararese?

5 Embame kondange renge doko nenge ingyuo nalapa lao jilini.

Ee ipwange kenda doko penge kapo dokona sero simbwapala ipwa ingyuo nalapa letene.

6 Namwana parali maki dupwame namwana yuu doko yanda pyuo nyinya lao panda maiyuo kaelene.

Yanda pimwai dupwame namwa kando pii mora nyuo giyalya giyana pilyaminyi.

7 Anatu Porai Wakasa dokome namwa range sukusa nyepe.

Embame sakame kumungi renge doko lasaka pirinyi dokopa namwa kyawa minyinyale.

8 Wamba dokopa embame isa girapo mende yuu Isipi dokona nyepala minyuo epepya.

Dopa pipala rara wakale dupwa pyao ralinyi karapala dokopa isa doko nakamana yuu dokona wara pinyi palyipya.

9 Embame andara panda doko panda pyuo renge pinyi nembeepya.

Baa pingi kamame koko pao andapala angi dokome yuu peparae minyarambu nyiya.

10 Isa girapo doko ando pangwapala isa imambu dokome yuu kyau doko pau lao sembeya.

Wangya pangepe dokome mee isa ama londe dupwa rau lanyi pyambuya.

11 Wangya pangepe pyao panguyamo dokome nanesa pao ipwa kota pete

andake Metitaraniane lenge doko kando nyuo

dee ipwa Yuporisa lenge nanesa epeya dokona kando nyuo pao suu lao piya.

12 Akipamo embame kame pirukarenge doko lalyinyi retelepe?

Wambu peparae kata papirami dupwame kandapala isa girapo jingi waa lyuo nyerami ingilyamo.

13 Isa girapo doko mena rae lengeme kalyuo pyarakwaminyi dokopa

wii saape mee dokome naopelyaminyi.

14 Anatu Porai Wakasa doko embame namwa kame soo kaeya napipi.

Yake dorena karo kandanyi malyo kandapala

namwa embena wambu dupwa pyuo nyepe.

15 Namwa embame isa girapo ingyuo wara piinyi palyipya dupwa nyisala ipu.

Namwa isa girapo ene nyaŋa dopale doko embame minyuo ando porainyi pyambui.

16 Namwana yanda pimwai dupwame pyakepo isarena yangeyami kande dokopa

embame imbu singi manjo kandapala nakama randa maiyuo kokwa sinyi nembape.

17 Namwa emba rangeme embena wambu lao rombo palyuo nyiinyi dokome range nyiso kando kyawa minyuo karape.

Embame namwa ando porai inginyi pyambui kande.

18 Namwa emba deeko yaki nyuo neta paa narama.

Namwa lete karalapa lao pirinyipa namwame embena kingi lakando kararama.

19 Kamongo Anatu Porai Wakasa dokome namwa range sukusa nyepe.

Embena sakame kumungi renge doko lasaka pirinyi dokopa namwa kyawa minyinyale.

<- SAMU 79SAMU 81 ->