148
Wambupi Bangepe Anatunya Wasisi Dupwa Peparaeme Anatu Lakando Palena
1 Kamongo doko baa lakandamana.
Yake panda range dupwame
Kamongo yake ketaerena karamo doko baa lakandalapape.
2 Banya aŋala dupwamepe dee aŋala peparae pyaso karaminyi dupwamepe
baa lakandalapape.
3 Neta kanapeme baa lakandalapape.
Dee bui lepo pyuo rao karenge dupwame baa lakandena.
4 Yake kamame ketae dorenape
dee ipwa yake dulurena ketaerena silyamo dokomepe baa lakandena.
5 Kamongome dopa pyuo pulyinya lao wasiyamo dupwa peparaeme
Kamongona kingi dokona lakando karena.
6 Baame suu pyao wasapala rangena panda wakale wakale dokonako kararami lao maiyamo dokona
kamba lao panda kareyamo dokona yaki nyii narami ingyaro karamo.
7 Isa yuu dakena range dupwame Kamongo lakandalapape.
Ipwa kotana lenge renge bange andake silyamo dupwamepe kota pete kyuwa dupwamepe Kamongo baalakandalapape.
8 Yuu pelepe randake kapape ipwa ase dokope kopape
porambaiye porai dupwamepe nakama pii laramuli pyuo pingi dupwame baa lakandalapape.
9 Yuu kyau kuki andakepe
isa jingi nengelyingi isa dupwape imwa isape
nakamame Kamongo lakandalapape.
10 Anda suwa menape suwa mena rae lengepe
kimbu kara nange rombame kata papingi kaupi yakape
nakamame Kamongo lakandalapape.
11 Kiŋipi mee wambupi kiŋinya ikinyingipi yuu isingi akali dupwamepe
baa lakandalapape.
12 Mapwae parangepe dee andapae wane nyaŋape
nakama opetae lakandalapape.
13 Nakama peparaeme Kamongona kingi doko lakandena.
Banya kingi doko andake wakasa ingilyamo dokona menge dupwa pipya manda manja nalyamo.
Banya neta renge yulu dokome yake yuupi andake ingyuo silyamo dolapo nyuo isa palyuo silyamo.
14 Baame banya Isaraele wambu mona wakasa retenge dupwame
baa lakando kararami lao porainyi pyambuya.