115
Anatu Angi Doko Mendaki Iki Karamo
1 Emba yeelyo Kamongo. Embena kingi doko iki lakandarama.
Namwana kingi doko isa palena.
Emba mondo lao pyuo karo mona retalu reto retapinyi dokona lakandarama.
2 Akipamo wambu yuu muu dupwana peparaeme piso soo,
Embena Anatu doko anja karase? letaminyi.
3 Namwana Anatu doko yake panda karamo.
Baame pinya suu pilyamuli pyuo pingi.
4 Nakamana anatu dupwa kana kulingipi golope dokome wasisi.
Nakamame wambunya kingi dokome yeelyo pyuo wasiyami.
5 Kingimi wasisi dupwa nenge kata singi dokome pii kapa laa nange.
Lenge rao karenge dokome kapa pyuo kanda nange.
6 Nakama kale kata singi dokome pii angi see nange.
Gyaa kata singi dokome kapa ai see nange.
7 Nakama kingi karenge dokome kapa minyanda nange.
Moko karenge dokome kapa kata papya nange.
Nakama kula kalu lao jaa laowape pii nange.
8 Wambu mee bange dupwa wasiyaminyi dupwape dee wambu bange dupwa keta mona pyamalyuo karenge dupwa
nakama pao mee isa kanape dopale ingyuo pena.
9 Isaraele wambu dupwa Kamongo doko kapa ingingi lao suu pyalapape.
Baame nakama nyiso kyawa minyuo karamo.
10 Nakama Anatunya purisi akali dupwa Kamongo doko kapa ingingi lao suu pyalapape.
Baame nakama nyiso kyawa minyuo karamo.
11 Baa mupwa lao kingi wapambu lakao karenge wambu dupwame Kamongo doko kapa ingingi lao suu pyalapape.
Baame nakama nyiso kyawa minyuo karamo.
12 Kamongome namwa suu pyao karamo dokome baame namwaelyape keta pisara.
Baame Isaraele wambu dupwa elyape keta pisara.
Dee Anatunya purisi akali peparae elyape keta pisarako.
13 Wambupeparae koo epengepe baa ketae pyambungi dupwa
baame kapa elyape keta pisara.
14 Kamongome nakama keta wane wanakepe jinyale.
Nakamape dee nakamana wane wanakepe dee dupwana para pyao nyeraminyi dupwa ketajinyaleko.
15 Yake pandape isa yuupi pyuo wasiyamo Kamongo dokome
nakama renge keyange jinyale.
16 Yake panda doko Kamongonaiki silyamo.
Sipyamopape Kamongome isa yuu doko mee akali dupwa keta maiya.
17 Wambu kumaraminyi dupwame Kamongo baa lakanda narami.
Wambu lapo kumungi panda pao palyuo otaraminyi dupwame lakanda naramiko.
18 Dokona namwa wambu epapu lete petamano dupwame Anatu baa kando sangyu lao
dakepape rengyape lao karalu karo kararama.