SAMU DUPWA
Kenane Pii Dupwa
Kenane pingi dee ateŋa lenge dupwa buku Samu lenge dake pyasi palamo. Ee kana malu nembo akali wakale wakale dupwame kenane mana nyuo pyao ateŋa kanda soo lao kareyaminyipa enako kenane ateŋape dupwa malu palyuo yapo nyuo wambu dupwame ateŋa dupwa lao kenane dupwa pyao Anatu lakandokaralu kareyami. Enakana pii yapasi dokona kenane ateŋape pii dupwa bukunya pyao reteyami. Kenane rara wakale wakale dupwa pyasi palamo. Anatu lakandenge kenanepe Anatumi nyisinya lenge kenanepe Anatumi kyawa minyuo karena lengepe dee Anatumi lete wai pyao pyuo nyinya lengepe dupwa pyasi palamo. Anatumi yulu koo kame sakana lenge kenanepe Anatumi pyakamiyamo dupwana ange lengekenanepe dee Anatumi yanda pimwai wambu dupwa pinya lao pingi kenane rara dupwape peparae pyasi palamo. Ateŋa lenge pii dupwa lapo range mendaki mendakinya laope dee lapo Juu wambu peparaena lao lenge dupwa pyasi palamo. Lapo wambu mendakinya monarena ateŋa lenge dupwa palyuo dee lapo Anatunya wambu peparaena monarena palenge dupwa neta nyuo lao pingi dupwapyasi palamo.
Yesu baame Samu pii dupwa soo giso mana lao dee akali dupwame Nuu Tesamene pii dupwa pepa pyao dokopa Samu pii dapwa polo lao pepa piyamiko. Dopa piyaminyipa Kurisene wambu kanda soo elyambu piyaminyi dokopa buku Samu pii dupwa ama rungi rungi pingi lao suu piyami.
Samu pii malu mee 150 dupwa pyasi palamo. Dakena kenane rara wakale wakale dupwana lapo iki yapo nyepala pepa pilyamano.

Rae Maingi Renge Angi Doko

1 Akali mende koo pinya lao kunji pyaraminyi dupwa yaki nyuo

Satanena yulu pirami dokona mana koo nyii nao

Anatu kando giyalya giyana pyuo lenge dupwana role pyao kara nao piramo

akalinde ramo doko rae maiyuo pyakalyuo pyao karara ingilyamo.

2 Yulu koo pingi kandale doko suu pyao alowa pyuo banya rae maingi dokome Kamongona Mawa Pii lasi singi dokona warombo soo

yuu peparae kukwa korakamape yaka lao poraiyuo suu pingi.

3 Akali doko baa isa ipwa epo penge repeta ando karenge dopale doko.

Yuu gii jingi mondo lao lyingi yuu gii dokopa keyange pyuo lyingi.

Dee banya yoko dupwa yando naa nange.

Akali dokona yulu suu pingipi peparae kapa palyuo penge.

4 Akali koo pingi dupwa dopale ingya nange.

Yangi porambaiyeme poo lanyi nembenge dopale ingyuo penge.

5 Akali koo pingi dupwa Anatumi kote lao randa maira.

Koo pingi dupwa yulu rolae pingi dupwa pipya mendare ingya nara.

6 Kamongome rolae pingi dupwa kyawa minyuo kata lasaka pyuo karamo.

Dopa pyuo karapyamopape koo pingi dupwa koo dokona kimbu malyaro karaminyi.