1 Wambu dupwa peparae kana kame kambu kingi Ipwa lenge repeta kamapi dokona sukusa sukusa pyuo malu palyiyami. Dopa pipala dokopa nakamame Mawa Pii mana lenge akali kingi Esera lenge doko lamaiyuo, Mosesena Mawa Pii buku Anatumi Isaraele wambu maiyamo doko minyuo epena lamaiyami. 2 Purisi akali Esera dokome baa Mawa Pii buku doko wambu malu palyuo peteyaminyi dokona minyuo epeya. Epapala dokopa kana yanda ipingi yuu gii mendaki dokona enda akalipi wane wanakepe api mendeme Mawa Pii seramili dupwame soo peteyaminyipa Esera Mawa Pii doko yaka leya. 3 Dopa pyuo leyamopa yangamana piso pao korakama kana kame kambu kingi Ipwa lenge repeta dokona kanda kanda piso yaka leya. Dokopa wambu peparaeme kale yukupala pii sokondali pyuo peteyami.

4 Mawa Pii mana lenge akali Esera doko baa pii lao karenge ratende pyuo wasiyami dokona ketae kareya. Kareyamopa akali Matitayamoo Sema Anaya Uraya Ilikaya dee Masayamoo dusipa banya kingi rolaerena kareyami. Kareyaminyi dokopa akali Petayamoo Misaele Malikasa Asumu Asapatana Sakaraya dee Mesulamemoo dusipa banya kingi kyairena kareyami.

5 Dopa piyaminyipa Esera baa rate dokona ketae kareyamosa wambunya lenge kambu dokona buku doko lumbuyamopa kapa kandapala nakama peparae roya kareyami. 6 Kareyaminyi dokopa Eserame Kamongo Anatu andake ingyuo karamo doko lakandeya.

Dopa pyuo lakandeyamopa wambu peparaeme nakamana kingi ketae pyambuo kinyi kinyi lamaiyami. Lamaipala dokopa nakamana wapambu pii pyaro piso Kamongona kingi lao ayemba pongwa nao peteyami.

7 Wambu dupwa soo kareyaminyi dokopa Jesuamoo Bani Serepaya Jamini Akupu Sapetae Otaya Masaya Keleta Asaraya Josapate Anane Pelayamoome wambu dupwa Mawa Pii dokona polo lamaiyami. 8 Polo lamaiyuo dokopa nakamame Anatunya Mawa Pii buku dokona kambunya eŋa nembo leyami. Dokona lao wambu dupwa soo nyeramiŋi lao renge angi polo yaka leyami.

9 Wambu dupwa peparaeme mawa pii sepala dokopa ee leyami. Dokona lao yaka leyaminyipa Niyamaya baa Jerusaleme gapomane yulu pyuo kareyamo dokope Esera purisi yulupi mawa pii mana lenge yulupi pyuo kareyamo dokope dee Lipae wambumi mawa pii polo lamaiyuo kareyaminyi dupwape nakama peparaeme wambu dopa pyuo lamaiyami, Yuu gii dake nakamana Kamongo Anatunya yuu gii poo pyasi ingyuo silyamo dokona nakama ee lao kumaralerale nyii nalapape, lamaiyami. 10 Dokopa Esera nakama lamaiyuo, Nakamana anda wakale wakale keyange papala nenge dupwa nao waene ipwange rende pingi doko nao dee wambu dolo nenge rapa rapa pii nayami dupwa mokwa soo maiyuo pyuo pupwale. Renge doko yuu gii dake namwana Kamongopa poo pyasi ingyuo silyamo dokona yamarangyuo ee laa nalapape. Kamongona rae maingi renge dokome nakama porainyi pyambwara, leya.

11 Lipae akali dupwame wambu peparae mona sinya lao lao, Yuu gii dake poo pyasi ingyuo silyamo dokome ee lao kumaralerale nyii nalapape, lamaiyami. 12 Pii doko soo nyiyaminyi dokome wambu peparae kata nyuo papala nenge nao ipwa nao nenge mokwa soo maiyuo raeme kumuo piyami.

13 Mawa Pii mana nyeramaŋa lao yuu gii lapo dokopa ree palunya rakange kyawa dupwape purisi akalipi Lipae akali dupwapeme Esera mawa pii mana lenge akali kareyamo dokona epo pyasiyami. 14 Dokopa nakamame mawa pii pepa pyasi Kamongo dokome Mosese keta pyao retena leyamo doko Isaraele wambu dupwa nenge yalya kando nenge nenge kana yanda ipingi dokopa anda kauwa dupwana mee palirami leyamo doko kando nyiyami. 15 Dopa pyuo kando nyepala dokopa yuu taone dupwanape yuu Jerusaleme dokonape pyao reto lamaiyuo, Anda kauwa pinya karo dokopa yuu kyau kuki dupwana papala isa olipi anginya wangyape olipi ayangena wangyape isa metilipi bona isape dee isa wakalena wangyape nyerami lao pyasi palamo dokona letamuli pyuo pirama.

16 Dopa pyuo wambumi pao nyepala dokome nakamana semene anda yangi ketae warake dupwanape kamapi dupwanape Anatunya anda kamapi dokonape kame kambu kingi Ipwa lengena kamapi dokonape dee kame kambu kingi Eporaime lengena kamapi dokonape dusipana peparae anda kauwa rangena piyami. 17 Dokopa wambu yuu nanesa karapusi ingyuo palyuo epeyami dupwame anda kauwa pipala paleyami. Doko yuu gii Josua Nanena ikinyingi kareyamo dokona piso pao anda kauwa dopale pii naoko pao dolomame kanda soo piyami. Dopa pyuo pipala nakama raeme kumuyami. 18 Koro mendakinya nenge nao peteyaminyi dokopa yuu peparae lao Esera baame Anatunya Mawa Pii palenge buku dokona yaka lapa piya. Dee yuu gii mange lama dokopa Mawa Pii leyamuli pyuo misi lao kii palyiyami.

<- NIYAMAYA 7NIYAMAYA 9 ->