NIYAMAYA

Buku Esera dokome lao yaki nyiyamo dokona piso buku Niyamaya lenge dakeme nyekonyo letamo. Arome pii rema dasipa kunjisi ingyuo pyasi palamo.

1. Rombo 1:1—7:73a Yuu Pesa kiŋi Sairoseme akali Niyamaya lenge doko yuu Juta dokona wambu dupwa iso karala pena leya. Niyamaya yuu Jutana taone mupwa Jerusaleme dokona epeyamopa Juu wambu kareyaminyi dupwame Jerusaleme dokona kana kame andake doko dee kamba waso piyami. Piyaminyi dokopa Niyamaya baame yulu doko rapu piya. Eserana Anatu lakandenge yulupi dee role pyao yango pipya karenge yulupi yulu dopale wambu dupwana au pyuo sero karena lao kareya.

2. Rombo 7:73b—9:37 Rapu pingi Esera baame Anatunya Mawa Pii buku andake piyamo doko yaka lao ketae pyambuo wambu dupwa polo lamaiyuo kareya. Yaka leyamo dokopa Juu wambu dupwame pii doko soo nyepala nakamana yulu koo dupwa polo lamaiyami.

3. Rombo 9:37—13:31 Yuu Juta dokona Niyamaya baame iso kareya pii lapo konda pyuo piyami dupwa pyasi palamo. Niyamaya baame Anatu keta pyamalyuo karo ateŋa lamaiyuo kareyamo doko ama renge andake ingyuo palamo.

Niyamaya baa yulu poraiyuo pingi. Ateŋa wakasa lenge dee Anatu kapa pira lao suu pyao otenge akali.

Yuu Pesa kiŋi akali Atasesisi baa kiŋi yulu kanda soo pyuo karo enakana ee kana akalisa lama banya yulu minyiyamopa kana Kisilepe dokopa yuu taone mupwa Susa lenge dokona kareyo. 2 Kareyono dokopa nambana yangonge Ananimoo Juta akali lapo pipya epeyami. Epeyaminyi dokopa nambame Juu akali dupwa pyao kumaka nao yuu wakale mendasa puu maiyuo nyii nayami dokona lao piso siyu. Dopako pyuo yuu Jerusaleme dokona lao opetae piso siyu. 3 Piso siyunu dokopa nakamame namba langyuo, Wambu yuu Jerusaleme karaminyi dupwa akali dupwa pyao kumaka nao yuu wakale mendena puu maiyuo nyii nayami dupwa nakama randa andake nyuo elyame kumuo karaminyi. Karaminyipa Jerusaleme kana kame kameya awali lao piro karenge doko lalyuo bolombalo lasi silyamo. Dee Jerusaleme kambu dowa kameya dupwa isareme rao lalyuo kokwa siya, leyami. 4 Leyaminyi doko sepala yuu gii lapo ee lao kumanda peteyo.

Pisipala dokopa namba nenge naa nao Anatu yake panda karenge doko ateŋa lao kandalyo kando peteyo. 5 Pisipala dokopa dopa leyo, O Numi Anatu, Emba Kamongo mupwa wakasa ingyuo karene doko namwa pako karamano. Wambu emba kando mona retenge dupwape embena mawa pii yaki nyii nao minyuo pyuo karenge dupwape pipya emba pii lao kana minyuo kinyi lalu lao lenge doko minyaro karene. 6 Embena kendemande Isaraele wambu dupwa emba kando koo piyama dupwana kondapala polo langyuo kukwa korakamape ateŋa lao pyuo karo doko emba kando sepe. Kinyi nambape nambana rakangena ree palupi koo piyamako, lamaiyu. 7 Lamaipala dokopa embena kendemande akali Mosese keta mawa pii jiinyi dupwape moko minyuo pyuo kara nalyamano. Dopa pyuo karo embame namwa pelapa langiinyi dupwa kamba lao yulu kopetame pyuo karamano. 8 Pii embena kendemande akali Mosese lamaii. Embame baa dopa lamaiyuo, Nakama Isaraele wambu dupwa langirunuli pyuo kara narami ramo dokopa nambame nakama yuu wakale dupwana bolombalo lao nembaro doko kame see nao karape. 9 Dokopa nakama namba karo dakena dee kamba kapa kyuo epapala nambana mawa pii doko yaki nyii nao minyakao kararami ramo dokopa nakamana wambu dupwa yuu nanesa puu maiyuo nyuo minyuo paraminyipape nambame nakama yaki nyii napala range nyuo sukusa sukusa pipala yuu mupwa enenge mendena namba lakando kararamiŋi lao yapalyo nyepala dokona karalapa lao jero, lamaii kande, leyo.

10 Lapala dokopa Kamongo doko dapwa embena kendemande emba rangena wambu kandale. Embena porainya renge andake dokome kiiramo nyii dupwa karaminyi. 11 Embena kendemande akali Niyamayana ateŋa lenge dokope embena Isaraele kendemande wambu menge dupwa emba rape rape lao karalana suu pingi dupwana ateŋa lenge dupwape sepe. Epapu namba embone pisinyi pyambuo akali kiŋi karamo dakeme namba kandapala kondana lao nyisinya lao karape, Anatu lamaiyu.

Yuu gii dusipana namba kiŋi akalinya nenge ipwa waenepe minyakamyuo epo maipapu pingi akali ingyuo karapala yulu dupwa pyuo kareyo, leya Niyamayame.

NIYAMAYA 2 ->