1 Josuame Isaraele rara dupwa peparae kyakale lao nyuo yuu Sikeme dokona malu palyiya. Baame akali kyawape akali mupwa ingyuo karengepe jasi akalipi Isaraele wambunya iso karengepe dupwa peparae epena lao kyakale leyamo dokopa wambu dupwa peparae Anatunya lenge kambu siyamo dokona epo kareyami. 2 Dokopa Josuame wambu dupwa peparae kando lamaiyuo, Kamongo Isaraele wambunya Anatu dokome pii dake dopa letamo, leya. Ama yuu wamba nakamana rora ambasu dupwa ipwa Yuporisa wangu pakirename kareyaminyi dokopa bange wakale anatuŋu lao lakando kareyami. Nakamana rora amabasu dupwana akali mendaki baa Tera lenge doko Aporakamepa Nayopana rakange. 3 Yuu gii dokopa nakamana kauwange Aporakame ipwa Yuporisa wangu pakirename kareyamopa nambame nyuo lanyuo yuu Kenane peparae dokona sukusa mondo lao laminyuo peyo. Papala dokopa banya para pyasi ree palu andake inginyi pyambuyu. 4 Nambame baa wane Aisake maiyu. Maipala nambame dee Aisake keta Jekope Isopa maiyu. Dee yuu kyau kuki pingi singi yuu Itome lenge doko Iso banya yuu inginya lao maiyu. Dopa piyunupape nakamana rora ambasu Jekope lenge banya wane wanakepe dupwa pipya yuu Isipi dokona lano peyami. 5 Dokopa enakana nambame Mosese Eronepa mapanyi peyapala yuu Isipi keta randa andake pena leyo. Dopa leyonopape nambame nakama nyisa nyiyu. 6 Nakamana rora ambasu dupwa yuu Isipi kareyaminyipa nambame neta nyuo lanyuo epeyo. Lanyuo epeyonopa Isipi range wambu dupwame mena matana pisope dee mena oseme ipyuo penge uliuli dupwana piso pyao peta ralyuo nyela epeyami. 7 Epeyaminyi dokopa nakamana rora ambasu dupwa ipwa kota Kone lenge dokona kando nyepala namba keta ateŋa lao kandokondali pyuo nyisinya lao piso soo leyami. Leyaminyi dokopa nambame Isaraele wambupi Isipi wambupi dupwana kanya dokona liti pyuo yuu doko iminjanyi pyambuyu. Pyambwapala nambame Isipi range dupwa ipwa kota dokome nyuo yambe pyapala ipwame nena leyo. Nambame Isipi wambu dupwa keta yulu piyu doko nakama soo nyilyaminyi.

Nakama yuu muiyane dokona ee kana malu mee nembo paleyami. 8 Ipwa Jotane yuu neta pyakayo epenge dorena Amote wambu palenge dokona nakama nyuo lanyuo epeyo. Epeyo dokopa wambu dupwame nakama piyaminyipape nambame nakama nyisiyunusa wambu dupwa nyuo pyao anamasi minyiyami. Nakama pao kareyaminyipa nambame doloma pyao kokwa siyunusa nakamame nakambana yuu doko nyiyami. 9 Dee yuu Moape dokona kiŋi akali Beleke Sipona ikinyingi dokome nakama piya. Baame Biona ikinyingi Belame kareyamo dokona pii nembo piso soo nakama keta randa palena lakana leya. 10 Dopa piyamopape nambame Belameme pii leyamo doko sakame napuli lao suu piyu dokona baame nakama keta elyape pisiya. Dokona lao nambame nakama Beleke keta kingi raka lao nyiyu.

11 Dokopa nakama Jotane oko soo Jereko epeyami dokopa Jereko range akali dupwame nakama piyami. Dokopa Amote wambupi Perisi wambupi Kenane wambupi Iti wambupi Gukasi wambupi Ipi wambupi dee Jepusi wambupi dupwa peparaeme nakama yanda pyuo kareyaminyipape nambana porainya renge dokome nakama anamasi minyiyami. 12 Nakama epeyaminyi dokopa namba wambo pao wambu dupwa pakanyi andake pyambuyu. Dopa pyuo nakamame Amote kiŋi lama pyao raliyaminyisa piya. Nakamana yandape wua gelape dupwame mendali piyaminde daa. 13 Nambame yuu mendena nakamame mende yulu pyuo wara pii nange dokope dee taone nakamame waso pii nayami dupwape nyuo jiyu. Dokona lao epapu dakepa nakama yuu dokona karapala isa girapo olipipi dupwa nakamame wara pii nayami dupwana jingi lyuo nao palaminyi, Kamongome dopa letamo lao Josuame leya.

14 Dopa lapala Josua pii konda pyuo leya. Epapu dakepa Kamongo doko rape rape lao banya yulu rolae pyakamyuo yaki nyii nalapape. Nakamana rora ambasu dupwa yuu Mesopotemia dee yuu Isipi dokona bange wakale anatuŋu lao lakandeyami dupwa nyuo nembalapape. Nembapala nakamame Kamongona yulu iki pyakamilapape. 15 Dokona lao nakamame Kamongona yulu dokona pinya lao suu pyaa narami ramo nakamame mendena yulu pyakamirami lao suu piyami kande doko dakepa rombo palyuo lalapape. Nakamana rora ambasu dupwa yuu Mesopotemia dokona karo bange wakale anatuŋu lao lakandeyami dupwape panda yuu Amote karaminyi dokona wambunya anatu wakale dupwana lao rombo palyuo lalapape. Dopa piraminyipape nambamoo nambana ree palu dupwape Kamongona yulu pyakamirama, leya.

16 Leyamo dokopa wambu dupwame isingi lao, Kamongo Anatu yaki nyii napala anatu menge dupwana yulu pyakami narama ingilyamo, leyami. 17 Lapala namwana Kamongo Anatu dokome namwana rakange dupwape namwape yuu Isipi dokona kendemande yulu pyakamyuo kareyamano dokopa neta nyuo lanyuo epeya. Epeyamo dokopa yulu andake piyamo dupwa namwame kandeyama. Namwa panya peyamano dupwana akali rara wakale wakale dupwame namwa pyalana piyaminyipape Anatumi namwa nyuo retaro karo nyiso lanyuo peya. 18 Namwa epeyama dokopa namwana Kamongo Anatu dokome Amote wambu yuu dakena palenge dupwa pyao ralinyi nembakaya. Nembakayamo dokona lao namwa opetae Kamongona yulu pyakamirama. Baa namwana Anatu, leyami.

19 Leyaminyi dokopa Josuame wambu dupwa kando dopa lamaiyuo, Nakamame Kamongona yulu kapa pyakami narami ingilyamo rapisi. Baa Anatu poo pyasi wakasa dokome kyambo anatu dupwa lakanda narami lao suu pilyamo. Baame nakamana koo dupwa nyuo kame saka nara ingilyamo. 20 Dee mende nakamame Anatu yaki nyepala rara wakalena kyambo anatu lenge dupwana yulu pyakamyuo kararami ramo Anatu baame nakamana yanda pimwai ingyuo randa joo pira. Wamba baame nakama keta elyape ingyuo pisiyamopape epapu baame nakama pyao kokwa sera, leya.

21 Leyamo dokopa wambu dupwame Josua lamaiyuo, Doko daa. Namwame Kamongona yulu pyakamirama, leyami.

22 Leyami dokopa Josuame isingi lamaiyuo, Kamongona yulu pirama lao nakama range lalu lao lao karaminyi, leya. Leyamo dokopa nakamame dopa lao, Kinyi. Namwa rangeme lalu lao letamano, leyami.

23 Leyaminyipa Josuame lamaiyuo, Nakamame pii doo letaminyi dokona rara wakalena kyambo anatu nyisa nembapala Kamongo Isaraele wambunya Anatu doko iki yapalyepala mona kapu kyuo maipwape, leya.

24 Leyamo dokopa wambu dupwame Josua kando isingi lao, Namwana Kamongo Anatunya yulu pyakamyuo banya pii dupwa laramuli pyuo warombo soo kararama, leyami.

25 Leyaminyi dokona Josuame kana minyuo lalu lao lenge pii wambu dupwana lao pyao palyiya. Pyao palyapala yuu Sikeme dokona baame nakamame mawa piipi mana piipi minyuo pyuo kararami lao maiya. 26 Maipala Josuame mawa pii dupwa buku Anatunya lowa pii pyasi palenge dokona pyao reteya. Retapala kana andake mende nyepala Kamongona misi lenge panda dokona isa oke lenge kareyamo renge dokona reteya.

27 Retapala Josuame wambu dupwa lamaiyuo, Kamongome namwa pii langipyamo dupwa peparae kana dakeme sipyamosa namwame yuu peparae kana kandapala kana minyuo lalu lao lenge pii dokona lao suu pyarama. Suu pyapala kana dokome lasaka pili lao nakamame namwana Anatu baa kando kamba laa naramisa pira ingilyamo, leya. 28 Lapala dokopa Josuame wambu peparae dupwa nakama rangena yuu wakale wakale dupwana pena leyamopa peyami.

29 Enakana Josua Nanena ikinyingi baa Kamongona kendemande akali ee kana andete mendaki dee akalisa mendaki (110) nembo karapala kumuya. 30 Kumuyamo dokopa nakamame banya yuu angi dokona yuu Timinate Sera lenge dokona malu piyami. Yuu kyau kingi Gasi lenge dulurena yuu Eporaime kyau pyalya pyana pingi dokona malu piyami.

31 Josua baa lete kareyamopa Isaraele wambu dupwame Kamongona yulu pyakamyuo kareyami. Dopa pyuo karapala Josua kumapeyamo dokopa Kamongona yulu pyuoko kareyami. Karapala nakamana akali kyawa ingyuo karenge Kamongo banya wambu dupwana lao yulu andake pyakamiyamo dupwa rangeme kandeyaminyi dupwa lete kareyaminyi dokopa Kamongona yulu pyuo kareyamiko.

32 Isaraele wambu dupwa yuu Isipi yaki nyuo epeyaminyi dokopa Josepena kuli yeelyo minyuo epapala yuu Sikeme dokona malu piyami. Yuu malu piyaminyi doko akali Jekope baame Amo yuu Sikeme dokona rakange ingyuo kareyamo dokona ikinyingi dupwa kana kulingi andete mendaki (100) dokome ropo pyao nyiyamo doko Josepena para pyasi wambu dupwana ingyuo nyiyami.

33 Eliasa Eronena ikinyingi kumuyamo dokopa banya ikinyingi Pineyasena yuu Gipia dokona malu piyami. Yuu taone Gipia doko yuu Eporaime kyau kuki pingi singi dokona siya.

<- JOSUA 23