5
1 Jopo embame mendeme isingi letape lao kandalase kyakale lao kandape.
Aŋala mende karara ramo doko emba nyisinya larese?
2 Wambu dupwame emba keta kapa pii nalyaminyi lao suu pyanyi pyano karo kumare ramo doko
suu pingi pali nao kopyali ingyuo pirisa pira.
3 Nambame akali mona pali nange lapo mee mona palenge karele lao karaminyi kandapunupape
nakamana anda yuupi dupwa kwaeyo pena lao piyu.
4 Nakambana wane dupwa moŋo ketako kararami kotena paraminyi dokopa
mendeme nyisa narami ingyara.
5 Lopange wambu dupwame kopyali dokona ee kwaipi dupwana epo manjo narami ingyara.
Witi jingi ikyaikyana andara dupwa lyuo naraminyipa
ipwa nano kararaminyi wambu dupwame kando lyanolyano pyuo kararami.
6 Koo dupwa mee yuu dokona sisu lao pulya nao
randa doko yuu dokona mee sisu lao sipura naoko pingi.
7 Wambu rangeme isare ingyuo ango karo randa nyingi.
8 Namba emba pyali namba Anatu keta pyamalyuo randa doko baa lamaipuli.
9 Baame bange andake dopa pyuo pilyamo dupwa namwa kapa soo ota nalyamano.
Dee baame wambumi pii nange yulu dupwa pyuo karamo dupwa ama malu ingilyamo.
10 Baame yuu doko pau lena lao
apunda peyo karenge.
11 Anatu baame wambu inyimungu karenge dupwa minyalyuo
ee lao karenge dupwa rae mainyi pyambuo pingi.
12-13 Baame akali panga singi dupwana mende piru lao rapa rapa pingi dupwa nyuo laowa pipakamipala
isa wambunya singinya renge dokome nyepala range randa maiyuo mangena minyingi.
Dopa pilyasa nakamana yulu peparae kapa pali nange.
14 Nakama mee korakama karelyaminyipape kata angi doko kukwama ingilyamo karenge.
15 Anatumi wambu pendewa koo keta palenge dupwa yaki nyii nao
pyao isa palyilyaminyi karenge dupwa kyawa lete nyuo pingi.
16 Baame pendewa dupwa rengya nyera dupwana soo karena lao suu pingi maiyuo koo pingi dupwa kambu pyarambuo karena lao pingi.
17 Wambu mende Anatumi sukunde ingyuo kiso rolara dokopa rae maiyuo karare ingilyamo.
Dokona pyalana pyuo mana leya kande dokopa kapa laa nalyamo lao suu pyaa napipi.
18 Anatumi emba ranjama nyuo pyapala dokopa pyaramo panda doko baa rangeme yaki pyakange.
Banya kingimi emba pyapala dee kingi dokomeko umbwa pyuo nyingi.
19 Yuu gii pao epo piramo dupwa peparaena emba koo keta palirinyi lao kyawa minyuo karenge.
20 Lopo singi dokopa emba nenge joo karenge.
Yanda sipurelyamo dokopa emba pyaa nana lao kyawa minyuo karenge.
21 Piimi emba lao koo keta palyaraminyi dokopa Anatumi emba kiiramo nyera.
Koo keta paliri yuu gii eparamo dokopa emba kyawa lete nyuo pira.
22 Ee kwaipi apa nao lopo seramo yuu gii dokopa emba mee giyuo karare.
Mena rae lenge dupwa emba paka nareko ingilyamo.
23 Yulu pirinyi panda dupwana yuu kapa doko iki seramopa
mena rae lenge dupwame emba mona jeraminyi karare.
24 Embena ree palu pipya komau anda dokona mona seramo palyuo karare.
Embena mena sipisipi dupwa mondo lao kararaminyi dupwa kapa kandare.
25 Embena wane wanakepe dupwa yanginya kuku palu palu piramo mendeme yaka laa narami.
26 Witi jingi poo relyamo nyingi doko suu pyao
emba karo pao yaku nao kumare.
27 Jopo pii dupwa yuu malu mee mana nyimwanopa kinyi ingilyamo.
Dokona dakepa emba soo nyepe.
6:1—13:28 Elipase baame Jopo kando pii leyamopa Jopo isingi lamaiya. Bilitatepa Sopapa Jopo pii lamaiyambinyipa Jopome nakamba isingi lamaipa piya. Wambo pii lao kareyaminyi dupwa rombo 14 dokona pii lao otenge.