JOPO 42

1 Jopome dee Kamongo kando isingi leya.

2 Kamongo emba keta porai renge peparae palenge doko namba soo karo.

Embame pinya suu pyare ramo dupwa mee kapa piri ingilyamo.

3 Namba mona kumuo kyawa kana palyapala nambame kopyali ingyuo lao karapu dokopa

emba pipinyi dupwana akipamo nambame piso silini lao piso silyane.

Doko yulu andake dupwana lapo kamame reeko ingiyasa

Namba soo gisa nange dokona lao leyo.

4 Embame namba langyuo, Embena pii leto doko sokondali pipala isingi yano pyaka, lenge.

5 Dokopa nambame emba doko wambu menge dupwame langilyaminyi doko iki singi.

Dopa pipunupape dakepa doko nambana rangena lenge angi dolapome emba kandelyo.

6 Dokona lao namba pii peparae lapunu dupwana elyalyo

dokona kondome kumuo pee awaipi pyapala pisiru,

leya Jopome.

Pii Lao Lumwa Pyuo Lenge Doko

7 Kamongome pii dupwa peparae Jopo keta lao otapala dokopa baame akali Elipase lamaiyuo leya. Nambana kendemande akali Jopome namba kando pii kinyi lengenyili pyuo embape embena puu minyingi lama dolapope laa nayaminyi dokona nambame nakama pipya imbwualyo. 8 Dokona epapu mena bulamakao kali yanda ipingi nyepo sipisipi kali yanda ipingiko nyepala minyuo Jopo karamo dokona papala emba rangena ingyuo pyao kisape. Dokopa Jopome ateŋa lakara dokopa nambame banya ateŋa doko isingi yano pyakaro dee embame yulu kopetame pipinyi dupwana nambame elya renge jii naro. Baame nambana lao pii kinyi dupwa lengenyili pyuo laa nami.

9 Akali Elipase Bilitate Sopamoome Kamongome pinya lamaiyamuli pyuo piyami dokopa Kamongo dokome Jopona ateŋa doko isingi yano pyakamiya.

10 Dokopa enakana Jopo banya puu minyingi rema dupwana lao ateŋa lakamyuo otapeyamopa Kamongome bange keyange ama malu retena lao maiyamosa bange isa peyamo dupwa dee wai kiso nyakamyuo dokopa mee lama kamame konda pyuowale maiya. 11 Dokopa Jopona yangonge pemalengepe dee banya wamba puu minyingi dupwape peparae baa kando yako lala epo banya anda nenge nyuo malu palyuo nao peteyami. Kamongome Jopo randa maipya dokona kondalyamano lao baa mona minyarambunyi pyambuo epeyaminyi dupwame mendaki mendaki lao kana lapope dee kana golo uriŋipi maiyami.

12 Kamongome wambo dokopa Jopo elyape keta pisiyamopape enakana randa maipaesa kamame wakasa elyape keta pisiya. Yuu gii dokopa Jopona mena sipisipi taosande akalisa ipisu kisima (14,000) mena kamele lenge taosande pakinyamange (6,000) mena bulamakao taosande lama (2,000) dee mena donge taosande mendaki (1,000) pyuo minyiya. 13 Dee banya wane yanda ipingi nyepo wanake rema dusipana rakange ingyuo kareya. 14 Banya wanenge porai doko kingi Jemaema lenge dokona kanya doko kingi Keseya lenge dee enakana doko kingi Kerenapuku lao mandeya. 15 Yuu muu dupwana Jopona wanenge ama keyange dusipa yale mende mendasa pisa nange. Nakamana rakange dokome wanake dusipape dee pemalenge dusipape peparae banya moyange bange dupwa kapa kapa pyuo mokwa soo maiya.

16 Maipala Jopo baa ee kana andete mendaki dee akalisako pao kisima (140) nembo kareya. Karapala banya wanena wane mandeyaminyipape dee dupwana mandeyaminyipape dupwa kapa pyuo kandeya. 17 Enakana baa ama emo alemo ingyuo sepala sukundala peya.

<- JOPO 41