40
1-2 Kamongome lao, Jopo, embame Anatu Porai Wakasa doko makande pyuo karapi.
Epapu emba sikya pilyase panda isingi mende lare ingilyase? leya.
Jopome Kamongo Pii Lamaiya
3-4 Kamongo, namba kopyali ingyuo lao kareyo.
Dokona isingi aki pii larose?
Nambame dee mende laro ingya nalyamo.
5 Namba pii laroli dusipa lao otapu kandapi, leya Jopome.
6 Dokopa poraiya minyiyamo raka raka dokona Kamongo dokome Jopo dee kamba pii lamaiya.
Kamongome Pii Leya
7 Akali angingyuo roya karapala
nambana piso singi pii dupwa yano pyakape.
8 Embame namba rolae pii nangeŋe lao lasaka pyuo yapalya yapana pyuo koo keta palyapala
emba range rolae pingi inginyi pyambuo karese?
9 Emba porai namba yalese?
Nambana pii poraiyuo yuu gala lele lao lenge dopa pyuo embame lengese?
10 Doko kinyi ramo doko emba range lakando pyakalyuo pyao karo
kiŋi ingyuo suu pyao karape.
11 Wambu range mupwa lao suu pyao karaminyi dupwa kanda.
Kandapala embena imbu singi dokome nakama randa maiyuo kuki ingyuo inyimungu karena lare.
12 Kinyi, nakama range ketae pyambuo karaminyi dupwa kandapala isa nyepe.
Koo pyuo karaminyi panda dokona nakama pyao kokwa sepe.
13 Dopa pipala yuu dokona malu pepala
kumungi yuu dokona kiimbanyi palyalapape.
14 Dopa pirinyi dokopa akali mendeme lakandapa naraminyipa
nambame wambo embame yulu doko pyuo wambalene lamo lao lakandaro.
15 Mena ama kameya kingi Bimote lenge doko kandape.
Nambame doko waso emba wasoko piyu lyakande.
Baame mena bulamakao ingyuo isoko dupwa nao karenge.
16 Dopa pyuo nelyamopape banya yongo doko ama porai renge palenge.
Banya kingi minju isa mando yale dupwa aki porai lao see nalyo.
17 Banya konali doko isa siya ingyuo rolae roya karenge
dee banya kimbu dokona minju ama porai wakasa.
18 Banya kuli dupwa ama porai kana wasingi bange dopale
dee banya kimbu dupwa ane isa yale.
19 Wambu andareleme kata papingi bange wasiyu dupwa kando yamarangyuo karaminyipape mena dake kandapala kamame yamarangyuo kandenge.
Dopa pilyaminyipape wasiyamo dokome range sinyi nembo karenge.
20 Yuu kyau mena rae lenge dupwa male lao karenge dupwana
nenge nara isoko dupwa ando karenge.
21 Baa nepereke renge dupwana palyuo soo
dee ipwa pona waewae dupwana yalu pyuo soo pingi.
22 Neperekepe ipwa repeta karenge isape dupwana isarena rau lao singi.
23 Baa ipwa Jotane palipala ranjo epo banya lenge kambu petelyamo dokopa
baa paka nao elya kalo palyuo singi.
24 Apimi banya lenge lukupala baa minyarapala nyerase?
Apimi kone makapala gyaana minyaramo ramarase?
leya Kamongo dokome.