1 Mena meme yuu kyauna karenge dupwa ikyane manjira yuu gii doko emba singisi?

Mena rae lenge kingi diya lenge dupwa ikyane manjana pingi dokopa emba isaro karengese?

2 Emba kana yaka lao karapala mena diya rae lenge

nyaŋa dupwa manjira yuu gii doko singisi?

3 Nakama romba puu rombo minyuo wale lapala

oo repeta yakane yuu muu dupwana pauwinya lao manjana pingi dokopa emba singisi?

4 Imwa andake dupwana mena diya yakane dupwa ando porayapala dokopa

nakama rae lao puu pao penge.

5 Apimi mena donge rae lenge dupwa mee mokwasi karena leyase?

Dee apimi mee dupwana papyuo karena leyase?

6 Yuu muiyane dupwa nambame nakamana anda inginyi pyambwakamyuo

dee yuu lama lama kota singi dupwana palyuo karena leyo.

7 Nakama yuu taone andake dupwana wambunya pii dupwa pakapala nyisa wakale palenge

dee mendemepe mondo pipala nyuo yulu maiya nange.

8 Yuu kyau dupwana isoko malu karenge nakamame nao karenge.

Dokona nakama narama lao rambi kyakange mende karape lao kota penge.

9 Mena bulamakao rae lenge dokome embena yulu pyakarase?

Dee yuu gii kukwa mendepa baa embena mena bulamakao palenge anda dokona rae maiyuo palirase?

10 Dokona mende embame puumi bukapala yuu ape ape pyakana larese

panda embena ee yuu dokona ape ape pingi masene doko ipinya larese?

11 Embame banya porai dokona mona yukupala

embena yulu kenda dupwa pyakaraŋa lao suu pilisi?

12 Embena nenge witi jingi lyingi dokopa

baame nenge pyao injingi mare dokona minyakao epara lao silisi?

13 Yaka oserese doko papake dokome puu lao makando penge.

Dopa pilyamopape yaka soko dokome waiya lao bii lao pao yaka oserese doko nyuo enakao penge.

14 Yuu popo dokome yaka kapa isasa piramopa seraŋa lao

yaka oserese dokome banya kapa dupwa yuu dokona retenge.

15 Retapala dokopa baa wambumi kimbu kalyo poro lao

mena rae lenge dupwame pyao kambo pirami doko suu pyaa nao mee retenge.

16 Baame banya kapa retenge dupwa banya lao suu pyaa napala

banya yulu andake doko mee ingyuo paralyamo lapala saka nalyamo.

17 Renge doko nambame baa kopyali inginyi nembapala

mona palenge renge doko mai nayosa pilyamo.

18 Dopa piyunupape baa kanda soo makandaramo dokopa

baame mena osepe ose matana petenge akali dupwape nyuo enakapala nakamba kando giyalya giyana pira.

19 Mena ose dupwa porai wakasa ingyuo wasapala

imanji matarena lamya mange imanji ingisi doko Jopo embame pyuo ingiisi?

20 Nakama goemba ingyuo pyaka pyaka pinya lao embame wasapala dee

nakamana guu gaa dokome akali dupwa paka sinyi retaraŋa lao piisi?

21 Nakama yuu pau dokona moko gulugalu lao panya soo pyale letasa yuu kyasinyi nemba nemba pyuo karo

nakamana porainya renge paleta dokome yanda pela penge.

22 Nakama keta paka renge doko see nange

dee yanda pingi dokopa wua gela doko kandapala kapu kyuo ralo paa nange.

23 Dokopa nakamana mata dokona petenge akali dupwana wiki pepona dolapo jaa jaa lao pingi dokopa

netame rapala lepolepo pipala lenge kiki pingi.

24 Nakama bikuli lenge dokopa ose dupwa suu makaro kara napala

rae maiyuo makandapala pyala panya walu walu lenge.

25 Bikuli ketae poraiyuo lenge yaka lao dokopa nakamana gyaa yasu kando ketae palyapala

yanda pingi maresa paa nao karo wambo ai singi.

Sepala yanda singinya akali mupwa dupwame dopa pinya dopa pinya lao pii ketae letaminyi doko singiko.

26 Yaka ulisapu dokome bii lao yuu donorena panya dokopa

banya papake bii lalana nyuo rolo piso dokopa apa pyuo bii laro lao emba piso singisi?

27 Yaka kambe dokome embame langirinyipa

banya anda yuu kyau dokona kamame ketae piru lao isaro petengese?

28 Yaka dupwame kana wangya ketae wambu paa naramili dupwana anda pingi.

29 Dokona piso nanesa repetape dupwana

baa bange lapo pyapala nara dokona suu pyao kando isaro petenge.

30 Bange lapo kumasi singi dupwana yaka kambe dupwa epo malu palyingi dokopa

yaka kambe yakane dupwame ranjama dupwa nyuo nenge.